27 tamyzda Nıý-Iorkte AQSh-tyń ashyq birinshiligi bastalady. Álemniń eń úzdik tennısshileriniń basyn qosatyn «Úlken dýylǵa» sanatyndaǵy týrnırde Qazaqstannyń úsh oıynshysy óner kórsetedi. Olar – Iýlııa Pýtınseva, Zarına Dıas jáne Mıhaıl Kýkýshkın.
Áıelderdiń álemdik reıtınginde 51 orynda turǵan elimizdiń birinshi raketkasy Iýlııa Pýtınseva amerıkalyq Bernarda Peramen sheberlik baıqasady. Ol WTA tiziminde 94 orynda tur. 23 jastaǵy AQSh oıynshysy dúbirli dodalarda áli de aýyz toltyryp aıtarlyqtaı tabystarǵa qol jetkize qoıǵan joq. Bıyl Pera Avstralııanyń ashyq birinshiliginde úshinshi kezeńge deıin jetti. Ázirge onyń eń úzdik nátıjesi osy.
WTA reıtınginde 62 oryndy ıemdengen Zarına Dıas alǵashqy aınalymda óte myqty qarsylasqa tap kelip otyr. Sońǵy jyldary 26 jastaǵy Chehııa tennısshisi Karolına Plıshkova dúbirli dodalardyń kóbinde únemi úzdikter sanatynan kórinip júr. Atap aıtsaq, 2017 jyly Rolan Garrostyń jartylaı fınalyna deıin jetip, birqatar halyqaralyq týrnırlerde top jardy. Sonyń nátıjesinde álemniń birinshi raketkasy atandy. 2016 jyly AQSh-tyń ashyq birinshiliginiń fınalyna shyqsa, bıyl Melbýrndegi básekede ozyq segiz oıynshynyń qataryna qosyldy. Qazirgi kezde Plıshkova álemdik reıtıngte 8 orynda tur.
Erler saıysynda jalǵyz Mıhaıl Kýkýshkınge úmit artylyp otyr. ATR tiziminide 84 orynǵa taban tiregen jerlesimiz Nıý-Iorkte Noa Rýbınmen kúsh synasady. 22 jastaǵy AQSh-tyń ókili de pálendeı tabystarǵa jete qoıǵan joq. Bul kúnderi ol álemdik reıtıngte 135 oryndy enshileýde.
AQSh-tyń ashyq birinshiliginiń bıylǵy jylǵy júldelik qory 25 282 400 dollardy qurap otyr. Bul jarys 9 qyrkúıekte óz máresine jetedi.
Ǵalym SÚLEIMEN,
«Egemen Qazaqstan»