Rıdder qalasyndaǵy ınternasıonal jaýyngerlerge arnalǵan saıabaqtyń aýmaǵyndaǵy shaǵyn shirkeý qurylysy 2014 jyly bastalǵanymen, belgisiz sebeptermen aıaqsyz qalǵan edi. Atalǵan saıabaq Aýǵan soǵysynda kóz jumǵan 5 rıdderlik bozdaqtyń qurmetine 2008 jyly ashylǵan bolatyn.
Musylmannyń ulyq merekesi - Qurban aıt meıramyna oraı ótken saltanatty sharada Rıdder ákimi Jomart Muratov merekege jınalǵan halyqty asarǵa shaqyryp, ǵıbadat ornynyń qurylysyn aıaqtaýǵa atsalysýdy ótingen edi. «Asar – qazaq halqynyń ejelden kele jatqan eldi tutastyqqa, bereke-birlikke shaqyratyn taǵylymy mol rásimderiniń biri. Shahar basshysynyń shirkeý qurylysyn aıaqtaý jónindegi usynysyn qalalyqtar qýana qabyl aldy. Arnaıy esepshot ta ashyldy.
Erekshe atap óterligi, ıgi iske eń birinshi bolyp Rıdder qalalyq meshitiniń ımamy Jaqsymbet Nurıslam, kásipkerler Adam Gılderman men Bolathan Kúzembaev ún qosyp, qurylysqa qarjylaı kómek kórsetti. Qazir arnaıy ashylǵan esepshotqa jan-jaqtan qarjy aýdarylyp jatyr. Túsken qarajat 500 myń teńgeden asty. Bizdi qýantqany - kóp jyl qurylysy aıaqtalmaı turǵan shirkeýdiń Qurban aıt merekesinde qurylysyn aıaqtaý jóninde sheshim qabyldanǵany. Bul – elimizdiń tutastyǵyn, ulttar arasyndaǵy tatýlyqty anyq ańǵartsa kerek», - deıdi Rıdder qalalyq Ishki saıasat bóliminiń basshysy Anar Oralqyzy.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder qalasy