«Rýhanı jańǵyrý» jobasynyń aıasynda uıymdastyrylyp, jaz basynda óńir boıynsha jolǵa shyqqan Sporttyq kerýen sońǵy núkte – Qaraǵandymen irgeles Buqar jyraý aýdanyna jetip, saparyn aıaqtady.
Sońǵy kerýen sapynda Qaraǵandy oblysynyń Dene shynyqtyrý jáne sport basqarmasynyń basshysy Dmıtrıı Karpov, «Shahtıor» fýtbol klýbynyń burynǵy kapıtany, jattyqtyrýshy Andreı Fınonchenko jáne Beıjiń Olımpıadasyna qatysqan jeńil atlet Sergeı Zasımovıch te boldy. Sonymen qatar, kerýen quramynda oblystyń belgili sportshylary – akrobattar Aleksandra Rýdakova men Damıra Talǵat, semserlesýden Qazaqstan chempıondary Lıontıı Mýsalov, Sofııa Spıchova, Jasmın Kapadjı, Angelına Nurmaǵambetova jáne Anastasııa Kýlık, sondaı-aq, daryndy boksshylar men palýandar boldy.
Sportshylar shalǵaı aýyldarda jetkinshekterge sheberlik sabaqtaryn ótkizip, óskeleń urpaqty salamatty ómir saltyn, sporttyń ıgilikterin nasıhattady. Kerýen bıylǵy jaz ishinde Qarqaraly men Buqar jyraý, Nura men Osakarov aýdandaryn aralap úlgerdi. Osy kerýenniń septesýimen Botaqara men Nura eldi mekenderinde jańa sport alańdary paıda boldy.
Kerýen oljaly oraldy deýge bolady. Endi oblys ortalyǵynda osy sapardyń qorytyndylary boıynsha murajaı ashylmaq. Ol Qaraǵandydaǵy Nurken Ábdirov atyndaǵy Sport saraıynda ornalasady. Tusaýkeseri qarasha aıyna josparlanǵan murajaıǵa qoıylatyn jádigerler kerýen aralaǵan eldi mekenderden jetkiziledi jáne olardyń qataryn tolyqtyrýǵa oblystyń áıgili sportshylary da kómektespek. Aıtalyq, fýtbolshylyq dáýrenin eshqaıda taban aýdarmastan «Shahterdiń» sapynda ótkergen, kenshiler komandasy el chempıony bolǵan jyldary onyń kapıtany bolǵan Andreı Fınonchenko óziniń áıgili «14» nomerli fýtbolkasyn murajaı qoryna tapsyryp ta qoıdy. Murajaı jas urpaq, sportsúıer qaýym úshin qyzyqty ári tárbıelik de zor bolýy tıis. Sporttyq kerýenniń de kózdegen maqsaty osy edi.
Qaırat ÁBILDA,
«Egemen Qazaqstan»
QARAǴANDY