1 qyrkúıek - bilim kúni
Búgin, ıaǵnı 1 qyrkúıek kúni Qazaqstanda 7024 mektepte alǵashqy qońyraý soǵylady. Bıylǵy oqý jylynda elimizdegi mektepterde 3 mıllıonnan astam oqýshy bilim alatyn bolady.
Bilim jáne ǵylym mınıstrliginiń málimetine súıener bolsaq, jaz kezinde Qazaqstanda 21 mektep ashylǵan.
Respýblıkalyq bıýdjet qarajaty esebinen oǵan qosa 110 mektep salynyp jatyr. Onyń ishinde 72-si bıyl paıdalanýǵa beriledi. Jergilikti bıýdjet esebinen 94 mektep, 29 mektepke qosalqy qurylys salynýda. Onyń 17 mektebi men 15 qosalqy qurylysy paıdalanýǵa berilgen. Sonymen qatar, 166 mektepte jóndeý jumystary júrgizilgen. Mektepterde órtke qarsy qaýipsizdik turǵysynan jalpy 4 mlrd teńgeden astam somaǵa ottan qorǵaý, órt sóndirgishti toltyrý, avtomattandyrylǵan órt sóndirý júıesin jóndeý jumystary júrgizilgen.
3, 6, 8 synyp oqýshylaryna oqýlyqtar satyp alý úshin bıyl 28,6 mln teńge bólingen. BǴM aqparatyna sener bolsaq, 20 tamyzdaǵy jaǵdaı boıynsha baspalardan oqýlyqtardy jetkizý úlesi 82,7 paıyzdy qurap otyr. Sonymen qatar, tegin ystyq tamaqpen 275 876 adamdy qamtamasyz etý josparlanǵan.
Bul jekelegen bilim alýshy sanattarynyń 95,2 paıyzyn quraıdy. Jergilikti bıýdjetterdiń jáne demeýshilik kómek esebinen tegin ystyq tamaqtandyrýmen 495 086 mektep oqýshysy nemese oqýshylardyń 17,6 paıyzy qamtamasyz etiledi. Qalǵan oqýshylardyń mektepte tamaqtandyrylýyn jergilikti atqarýshy organdar ata-analar esebinen uıymdastyrady. Respýblıkanyń úsh aımaǵynda ákimderdiń bastamasymen tegin ystyq tamaqtandyrý bastaýysh synyptardyń barlyq oqýshylary úshin uıymdastyrylǵan. Mektepteri joq aýyldy eldi mekenderde turatyn 24084 balany oqý ornyna tasymaldaý (98 paıyzǵa) sharasy uıymdastyrylǵan.