Qyrkúıektiń 1-i kúni Aqtaý qalasyndaǵy Nazarbaev Zııatkerlik mektebinde Bilim kúnine arnalǵan dástúrli saltanatty sharada Mańǵystaý oblysynyń 100 balasy zııatkerlik mektepke qabyldandy. Bilim ordasy jańa oqý jylyn 650 oqýshymen bastady.
Saltanatty jıyn «О́rken» bilim grantyn jeńip alyp, zııatkerlik mektepte bilim alý múmkindigine ıe bolǵan 7-synyp oqýshylarynyń sherýinen bastaý aldy. Aıta keteıik, ótken oqý jylyndaǵy konkýrstyq irikteýge Mańǵystaý ólkesinen bilim granty úshin 800-den asa oqýshy qatysqan edi.
2018-2019 oqý jylynda mektep jańa zııatkerlermen qatar jańa ustazdarmen de tolyqty. Bilim ordasyna bıyl 30-dan asa tájirıbeli pedagogtar keldi. Mektep ákimshiligi ustazdarǵa bilim ordasynyń sharfyn tabys etti.
-Bıylǵy oqý jyly zııatkerilk mektepter úshin óte erekshe jyl. Sebebi bıyl «Nazarbaev Zııatkerlik mektepteri» derbes bilim berý uıymynyń qurylǵanyna 10 jyl tolyp otyr. Biz úshin de bul mereıtoıdyń mańyzy zor, dedi mektep dırektory Ermek Serikuly Paızov.
Jıyn «Nazarbaev Zııatkerlik mektepteri» DBBU jazǵy mezgilge arnalǵan arnaıy jobalarǵa qatysqan oqýshylardyń jetistigin tanystyrý sherýimen jalǵasty. Aıta ketý kerek, bilim ordasynda jaz boıy «Eki apta aýylda», «Ata-ana jumysyndaǵy 10 kún», «Jazǵy mektep -2018» áleýmettik jobalary júzege asty. Munymen qosa, ótken oqý jylynda úzdik nátıje kórsetken zııatkerler Amerıka Qurama Shtattarynyń Stenford, Djon Hopkıns jáne Kolýmbııa Ýnıversıtetteri janyndaǵy Jazǵy mektep kýrstaryna, Nazarbaev Ýnıversıtetindegi kýrstarǵa, Gonkong qalasyndaǵy ýnıversıttetteriniń kýrsyna qatysyp, bilimderin tolyqtyryp, tildik ortada bolyp qaıtty.
2018-2019 oqý jylynyń bastalýyna arnalǵan «Alǵashqy qońyraýdy» soǵý qurmetine «О́rken» granty boıynsha eń joǵary 917 ball jınaǵan Tórebaev Nurǵasyr Bazarbaıuly men 909 bal jınaǵan Sultanǵalıeva Mıra Pamırqyzy ıe boldy.
Bilim kúninde zııatkerlik mektep oqýshylary «Men Otanymnyń patrıotymyn» forýmyn ótkizdi. Munda bilim ordasynyń oqýshylary elimizdegi jáne shet eldegi joǵarǵy oqý oryndaryndaǵy jazǵy mektepter men kýrstary, qatysqan áleýmettik jobalary jaıly baıandap, saparlarynyń nátıjesin aıtyp, basqalarǵa motıvasııa syılady.
-Men 7-19 tamyz aralyǵynda AQSh-taǵy Stenford ýnıversıtetiniń Stanford Pre-Collegiate International Institutes(SPCII) kýrsyna qatystym. Bul meniń qazirgi tańda aınalysyp júrgen ǵylymı jobamdy, boıymdaǵy kóshbasshylyq qabiletti damytýǵa arnalǵan óte paıdaly, qyzyqty kýrstardyń biri boldy, - deıdi 12-synyp oqýshysy Nurdaýlet Tórebaı jazǵy demalysy jaıly.
Shara mektepke jańa qabyldanǵan oqýshylarǵa arnalǵan kampýs-týrmen jalǵasty. Sodan soń, olarǵa «7 synyptardy zııatkerlikke qabyldaý» sharasy ótkizilip, oqýshylarǵa tósbelgi taǵyldy. Olarǵa mektep mıssııasy, urany, qundylyqtary, akademııalyq adaldyq erejeleri túsindirildi.
Aıta ketý kerek, Aqtaýdaǵy Nazarbaev Zııatkerlik mektebi úshin bıylǵy oqý jyly aıryqsha. О́ıtkeni bilim ordasy bıylǵy oqý jylynda ekinshi túlegin ushyrǵaly otyr. Bıyl zııatkerlik mektepti 57 oqýshy aıaqtamaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy