Parlament Senatynyń Tóraǵasy Qasym-Jomart Toqaev QHR Ortalyq áskerı keńesi Tóraǵasynyń orynbasary Sıýı Sılıandy qabyldady, dep habarlaıdy QR ParlamentiSenatynyń baspasóz qyzmeti.
Senat basshysy Qazaqstan men Qytaı arasyndaǵy strategııalyq áriptestikti odan ári damytýda bul sapardyń mańyzy zor ekenin atap ótti. Q.Toqaevtyń aıtýynsha, eki el arasyndaǵy strategııalyq áriptestikti nátıjeli damytý Eýrazııa qurlyǵynyń aýqymdy bóligindegi beıbitshilik pen qaýipsizdikti qamtamasyz etý men nyǵaıtýdaǵy mańyzdy másele bolyp tabylady.
Áskerı saladaǵy ózara is-qımyldyń deńgeıi men keleshegin talqylaı kelip, taraptar ekijaqty sıpatta da, ShYU aıasynda da yntymaqtastyqty údete túsýdi qanaǵattanǵandyqpen atap ótti. Júzdesýshiler eki eldiń joǵary basshylyǵynyń júıeli túrdegi kezdesýleriniń erekshe nátıjeli bolatynyn aıta kelip, Qazaqstan Prezıdenti N.Nazarbaevtyń bıylǵy shildede QHR-ǵa resmı saparynyń jáne Sındao qalasynda ótken Shanhaı yntymaqtastyq uıymynyń Sammıtine qatysýynyń qorytyndylaryn joǵary baǵalady. «ShYU aıasyndaǵy ózara is-qımyl Qazaqstan syrtqy saıasatyndaǵy negizgi basymdyqtardyń biri bolyp tabylady», - dedi Q.Toqaev.
Sıýı Sılıan óz sózinde Prezıdent N.Nazarbaevtyń basshylyǵymen Qazaqstannyń áleýmettik-ekonomıkalyq damýynda qol jetken zor tabystaryna, bizdiń elimizdiń halyqaralyq arenadaǵy bedeli arta túskenine, Qazaqstan Elbasynyń Qytaıda keńinen tanymaldyǵyna toqtaldy.
Júzdesýshiler barlyq saladaǵy yntymaqtastyqty nyǵaıtý maqsatynda Memleketter basshylarynyń qol jetkizgen ýaǵdalastyqtaryn tolyqtaı júzege asyrý qajettigi týraly oılaryn ortaǵa saldy.
«Áskerı baılanystar – memleketaralyq qatynastardyń mańyzdy bóligi. Áskerı yntymaqtastyqtyń joǵary deńgeıi – memleketter arasyndaǵy qatynastar deńgeıiniń kórsetkishi», - dep atap ótti QHR Ortalyq áskerı keńesi tóraǵasynyń orynbasary. Ol ShYU-da birlesken jattyǵý ótkizý kezinde qoldaý bildirgeni úshin Qazaqstanǵa alǵysyn jetkizdi.
Kezdesý barysynda jańa qaterler men qaýipter turǵysynda aımaqtyq qaýipsizdik máseleleri de talqylandy. «Nurly jol» strategııasy men «Jibek jolynyń ekonomıkalyq beldeýiniń» ushtasýynyń erekshe mańyzy týraly da aıtyldy. Q.Toqaev parlamentaralyq yntymaqtastyqty odan ári damytý men Halyq О́kilderi Búkilqytaı Jınalysy Turaqty komıteti Tóraǵasynyń Qazaqstanǵa aldaǵy saparynyń mańyzyna toqtaldy.