Tolaǵaılar qatary tolyǵyp keledi

Qysqa ǵana merzim aralyǵynda Qazaq­stan aýyr atletıkasynyń osyndaı bıikke kóterilýi osy sport túrinde jeńis­pen órilgen baı dástúri bar kópte­gen mem­lekettiń qytyǵyna tıse kerek. Bireý­ler qyzyǵa qarasa, bireýler qyz­ǵana bastady. Bir ǵana mysal: London Olım­pıa­dasynda jerlesterimiz orasan zor tabysqa qol jetkizgende Reseıdiń Sport mınıstri Vıtalıı Mýtkonyń BAQ ókilderine bergen bir suhbatynda: «Meni aýyr atletıkadaǵy qazirgi jaǵdaı qatty qynjyltady. Sonda Qazaqstan álemdik aýyr atletıkanyń astanasyna aınalǵany ma? Jyldar boıy aıtýly eldiń ziltemirshilerin eshkim baqylaǵan da, qadaǵalaǵan da joq. Nátıjesinde olar árbir jarys barysynda tańdaı qaǵarlyq nátıje kórsetýde», dep tistene sóılegeni esimizde

Onsyz da Qazaqstanǵa jıi kelip, árbir qadamymyzdy ańdyp júrgen Halyq­aralyq dopıngke qarsy kúres agent­tigi (VADA) aqyry «ilik» tapty. Qısy­ny kelse de, kelmese de «ruqsat etil­megen dári-dármekterdi paıdalandy» degen aıyppen talaı myqty otandas­tarymyzdy ataq-dańqynan aıyryp, mańyzdy jarystardan shettetti. Ol azdaı, ulttyq komandamyzdyń dúbirli dodalarǵa qatysýyna shekteý qoıdy. Biraq bul jaǵdaı bizdiń eldiń jigitteriniń jigerin jasyta almady. 2016 jyly Rıo­da alaýy tutanǵan Olımpııa oıyndaryna Qazaqstannyń shoq juldyzdary qa­tys­paǵanymen, jalyndy jastar óz jankúıer­lerin jerge qaratqan joq. Zilte­mir­shi­lerimiz bul dodada 1 altyn (Nıjat Rahımov), 1 kúmis (Jazıra Jap­parqul) jáne 4 qola (Karına Gorıcheva, Farhad Harkı, Denıs Ýlanov, Aleksandr Zaıchıkov) medaldy oljalap, komandalyq esepte besinshi orynǵa taban tiredi.

Búgingi tańda Qazaqstan aýyr atletı­ka­synyń bolashaǵyna barsha jankúıer­ler alańdaýly. Sebebi birqatar beldi zil­temirshilerdiń úlken sporttan shet­tetilý merzimi áli aıaqtalǵan joq. Onyń ústine, osy iske tikeleı jaýapty halyq­aralyq uıymdar Qazaqstan qurama komandasyna oń qabaq tanytpaı otyr. Olar 2020 jyly alaýy tutanatyn Tokıo Olımpıadasyna Qazaqstannan eki aýyr atlet qatyssa da jetkilikti degen úkimin áli ózgertken joq.

Qalaı bolǵan jaǵdaıda da Qazaqstanda bul sport túri quldyramaıtynyna senim­dimiz. Oǵan biz jýyrda ǵana Taldyqo­r­ǵanda ótken el birinshiliginde anyq kóz jetkizdik. Shekteý merzimderi aıaqtalyp, úlken sportqa qaıta oralǵan Zúlfııa Chınshanlo (55 kılo) men Ilıa Ilın (102 kılo) áli de babynda ekenderin taıǵa tańba basqandaı etip dáleldedi. Ekeýi de esh múmkindik bermesten, óz qar­sylastarynan kóp ozyp ketti.

Rıo Olımpıadasynda júlde alǵan Farhad Harkı (67 kılo), Denıs Ýlanov (89 kılo) jáne Aleksandr Zaıchıkovtyń (109 kılo) da ústemdigi esh kúmán týǵyzǵan joq. Sońǵy kezderi kózge túsip júrgen sportshylar arasynan Rýstam Sybaıdy (96 kılo) erekshe atap ótýge bolady. Kezinde jasóspirimderdiń Dúnıejúzi­lik Olımpıadasynda qola medaldy ıelenip, erlerdiń Azııa birinshiliginde top jar­ǵan tastúlek Taldyqorǵanda óte tamasha óner kórsetti. Salmaǵy Ilıa Ilınnen bir dáreje tómen bolǵany­na qaramastan, ol dańqty sportshymen ıyq tiresýge jarady. Qossaıystyń qorytyndysy boıynsha Ilıa 380 (172+208) kelilik, al Rýstem 378 (171+207) kelilik ziltemirdi erkin eńserdi.

Qazaqstan chempıonaty barysynda tosyn nátıjeler de tirkeldi. 81 kılo salmaq dárejesinde baq synaǵan 2016 jylǵy Rıo Olımpıadasynyń jeńimpazy, 2015 jylǵy álem chempıony Nıjat Rahımov osy jarystyń basty favorıti sanaldy. Alaıda 2015 jylǵy Azııa birinshiliginiń jeńimpazy Aıdar Qazov asa shıelenisti tartysta ataqty qarsylasynyń aldyn orady. Nıjattan tórt keli artyq salmaqty kótergen Aıdar altyn tuǵyrdan qol bulǵady.

Mamandar men jankúıerlerdiń barlyǵy da 64 kılo salmaqtaǵy saıys­ta Karına Gorıcheva bas júldeni talassyz alýǵa tıis dep oılady. Biraq kópshilik qatelesti. Olımpıada men Dúnıe­júzilik Ýnıversıadanyń jeńis tuǵy­ryna kóterilgen áıgili sportshy bul báse­kede qurlyq birinshiliginiń qola júl­degeri Ásem Sadyqovaǵa ese jiberdi. Tal­dyqorǵan tórinde Ásem Karınadan baqandaı 20 keli artyq salmaqty eńserdi.

Mine, Taldyqorǵanda ótken el chempıonatynda osyndaı da oqıǵalar boldy. Birneshe kúnge sozylǵan básekeler barysynda biz otandyq ziltemirshilerdiń bo­ıynan jeńiske degen erekshe qushtar­lyqty baıqadyq. Jas órenderdiń ózderi ataq­ty qarsylastarynan qalys­paý úshin baryn salyp aıqasty. «О́lispeı berispeý­ge» bekingender de jeterlik. Al eń bastysy, Jetisý óńirinde ótken jarys Qazaqstanda jalyndy jastardyń qalyń shoǵyry ósip kele jatqanyn ańǵartty. Qazaqstannyń aýyr atletteri boıyndaǵy dál sol zor qulshynysty biz aldaǵy ýaqytta ótetin Olımpııa oıyndary men álem chempıonattary barysynda kórgimiz keledi.

Ǵalym SÚLEIMEN,

«Egemen Qazaqstan»