Aqtóbe oblysynda Memleket basshysynyń bes áleýmettik bastamalaryn iske asyrý is-sharalary josparynyń oryndalýy oblys ákimi Berdibek Saparbaevtyń tóraǵalyǵymen ótken jıynda talqylandy.
Halyqtyń ál-aýqatyn jaqsartýǵa baǵyttalǵan bes áleýmettik bastamany Memleket basshysy bıylǵy jyldyń naýryz aıynda jarııalady. Osydan keıin, «Árbir otbasy úshin turǵyn úı satyp alýdyń jańa múmkindikteri» bastamasy aıasynda Qazaqstan Respýblıkasynyń Ulttyq Banki «7-20-25» jańa ıpotekalyq baǵdarlamasyn bekitken bolatyn. Qazirgi ýaqytta osy baǵdarlama boıynsha nesıe alýǵa qabyldanǵan ótinishterdiń sanyna qaraı Aqtóbe oblysy respýblıkada 4-shi orynda tur. 1 qyrkúıektegi jaǵdaı boıynsha ekinshi deńgeıli bankter 1 mlrd. teńgege jýyq zaem alýǵa 115 ótinim qabyldady. 76 ótinim maquldandy, olardyń 26-y qazirdiń ózinde berildi, - dep habarlady oblys ákiminiń orynbasary Serik Tólenbergenov.
Aımaq basshysy «7-20-25» baǵdarlamasyn iske asyrý qarqynyn, sondaı-aq turǵyndarǵa jańa ıpotekalyq baǵdarlama boıynsha aqparattyq-nasıhat jumystaryn arttyrý qajettigin atap ótti. Oblys ákimi jıynda ekinshi deńgeıli bankterdiń ókilderine «7-20-25» baǵdarlamasyna qatysýshylarǵa zaem alý boıynsha barynsha kómek kórsetýge usynys jasady.
- Memleket basshysynyń barlyq bes bastamasy halyqtyń ál-aýqatyn jaqsartýǵa baǵyttalǵan, biz olardy sapaly jáne ýaqytyly oryndaýymyz kerek. Men barlyq adamdarǵa óz jumystaryn qatań baqylaýda ustaýdy suraımyn, - dedi oblys ákimi jınalys qatysýshylaryna. О́z isin bastaýdy qalaıtyn azamattardy mıkronesıeleý boıynsha jumysty belsendendirý tapsyryldy. Memleket basshysy halyqty shaǵyn nesıelendirýdi eki ese arttyrýdy tapsyrdy. 28 tamyzdaǵy jaǵdaı boıynsha, tek ónimdi jumyspen qamtý baǵdarlamalary men jappaı kásipkerlik boıynsha 364 azamat shamamen 1,5 mlrd teńgege jýyq shaǵyn nesıe aldy. Osy baǵytta jumystar jalǵasýda.
Jıyn barysynda Prezıdenttiń salyqtyq júktemeni tómendetý jónindegi bastamasy 32,5 myńnan astam aqtóbelik turǵyndardyń jalaqysyn kóterýine yqpal etkendigi atap ótildi.
Budan basqa, qosymsha bilim berý granttaryn bólý, 8 stýdenttik jataqhana qurylysy, sondaı-aq eldi mekenderdi gazdandyrý máseleleri qaraldy. Búginde tabıǵı gazben aımaqtyń jalpy halqynyń 88% nemese 752 myńnan astam adam qamtamasyz etilgen.
Energetıka jáne turǵyn úı-kommýnaldyq sharýashylyq basqarmasynyń málimetterine sáıkes, bıylǵy jyldyń sońyna deıin Áıteke bı aýdanynyń Araltóbe aýyly men Hromtaý aýdanynyń Jazyq aýylyn gazdandyrý aıaqtalady.
Budan basqa, jalpy quny 6,4 mlrd. teńgege 19 gazben jabdyqtaý jobalaryn júzege asyrý jalǵasýda. Jobanyń aıaqtalýymen 2019 jyly 11 aýyldyq eldi mekenderdiń 7 myńnan astam turǵyny tabıǵı gazǵa qol jetkizedi.