Endi júrgizýshi kýáligin aýystyrý men kólik quralyn tirkeý memlekettik qyzmetterin Egov.kz elektrondyq úkimet portaly arqyly onlaın formatta alýǵa bolady.
Búgin «Azamattarǵa arnalǵan úkimettiń» Qyzylorda oblysy boıynsha fılıal qyzmetkerleri osy qyzmetterdi avtokólik ıeleri arasynda keńinen aqparattandyrý jáne tanymal etý maqsatynda keń kólemdi aksııa ótkizdi.
Is-shara bir mezette oblys ortalyǵy men aýdan ortalyqtaryndaǵy maqsatty aýdıtorııa kóp jınalatyn mamandandyrylǵan HQKO-da, kólik satatyn bazarlarda, avtosalondarda ótti.
«Atalmysh qyzmetterdi onlaın-rejımde alý mehanızmi óte qarapaıym. Ol úshin egov.kz portalyna kirip, tıisti ótinimdi toltyryp jáne óziniń jeke elektrondy sıfrlyq qoltańbasymen (ESQ) qol qoısa bolǵany.
Buryn kólik quralyn satýshy jáne satyp alýshy osy qyzmetti kórsetýge ótinim berý úshin «Azamattarǵa arnalǵan úkimettiń» front-ofısine (HQKO, mamandandyrylǵan HQKO) bir ýaqytta barlyq qajetti qujattarymen barýy qajet bolatyn. Endi azamattar úıden shyqpaı-aq, onlaın rejıminde ótinish berý múmkindigine ıe boldy», - deıdi memlekettik korporasııanyń oblystyq fılıal dırektorynyń orynbasary Aınur Tobaeva.
Mysaly, kólik quralyn satýshy portalda avtorızasııalanady, «Kólik jáne kommýnıkasııa» bólimine aýysady jáne «Kólik quralynyń tirkeý úshin elektrondyq ótinish berý» degen qyzmetti tańdaıdy. Sodan keıin qajetti kólik quralynyń tizimin anyqtaıdy, alańdy toltyrady jáne óziniń elektrondyq qoltańbasyn paıdalana otyryp, qol qoıady. Onlaın qyzmeti satýshynyń barlyq aıyppuldary men salyqtaryn tolyq tóleýdi, ózekti tehnıkalyq qarap tekserý bolýyn talap etedi. Osydan keıin, kólik satyp alýshy portalynyń jeke kabınetine ol ótinimmen tanysa alady jáne qyzmetalýshyǵa «tanysty, suraý salýǵa ótýine bolady» degen habarlama keledi.
Eger satyp alýshy mámilege kelisim bergen jaǵdaıda, ol tólenbegen aıyppuldar men salyq bereshegin bolýyna tekseriletin kelesi qadamǵa barady.
Sondaı-aq, osy kezeńde, satyp alýshynyń jaı nemese joǵary suranysqa ıe memlekettik tirkeý nómirin tańdaýǵa múmkindigi bar.
Al júrgizýshi kýáligin aýystyrý tipti ońaı. Elektrondy portalda ótinimge fotosýret jáne qoltańbanyń skanerlengen sýreti qosa júkteısiz. Jeke kabınette qujattyń daıyn ekendigi týraly habarlama alǵannan keıin mamandandyrylǵan HQKO-ǵa baryp tek daıyn júrgizýshi kýáligin alyp ketetesiz.
Mamandandyrylǵan HQKO-nyń qujat berý bóliminde aýystyratyn eski júrgizýshi kýáligin, jeke basyn kýálandyratyn qujat, memlekettik baj tólegeni týraly elektrondyq chek pen ótinishti usynady.
Júrgizýshi kýáliginiń memlekettik baj quny burynǵysynsha ózgertýsiz qaldy – 1,25 AEK kóleminde, ıaǵnı 3 006, 25 teńge.
Eger siz júrgizýshi kýáligin merzimi ótip ketkennen keıin aýystyratyn bolsańyz, onda Sizge psıh - jáne narko - dıspanserden anyqtama, sondaı-aq 083-formadaǵy medısınalyq anyqtama qajet bolady.
Aıta keteıik, qyzmet iske qosylǵannan beri 150-ge jýyq qyzylordalyq jańashyldyqtyń ıgiligin kórip, atalmysh qyzmetterdi onlaın túrde alǵan.
Oblys kóleminde ótip jatqan búgingi aksııa barysynda 1000-ǵa jýyq aqparattyq broshıýralar taratylyp, keńes berildi. Shara aldaǵy ýaqytta da jalǵasyn tappaq.