Túrkistan qalasynda taıaý arada salynýǵa tıis nysandar kóp. Shahardyń jańa ákimshilik-iskerlik ortalyǵynda ákimdik ǵımaraty, basqarmalar men departamentter úıi, drama teatry, Kongress-holl, fılarmonııa, kitaphana, mádenıet saraıy, sport kesheni, stadıon, júzý basseıni, Nazarbaev zııatkerlik mektebi, saıabaqtar, kópqabatty turǵyn úıler, mektepter, balabaqshalar, kórme ortalyǵy, murajaı, opera jáne balet teatry, densaýlyq saqtaý jáne basqa da áleýmettik-mádenı nysandar qurylystaryn júrgizý, olarǵa qajetti ınfraqurylymdar tartý birinshi kezekte qolǵa alynatyn is.
Árıne, bul kóp qarjyny, ýaqyt pen tynymsyz eńbekti qajet etetin sharýa. Osy oraıda Túrkistan oblysynyń ákimi Janseıit Túımebaev oblystyq, aýdandyq, qalalyq máslıhat depýtattarymen jáne kásipkerlermen kezdesip, josparlanǵan jumystardy júzege asyrýǵa qoldaý kórsetýge shaqyrdy. Isker azamattardy qalany kórkeıtý úshin túrli áleýmettik nysandar men oıyn-saýyq ortalyqtary syndy halyqqa qajetti ǵımarattar salýǵa úndedi. «Túrkistandy túletýge erekshe nazar aýdarǵan Elbasy oǵan respýblıkalyq bıýdjetten bólek, elimizdiń ózge óńirlerin, ulttyq kompanııalar men bıznes ókilderin atsalysýǵa shaqyrǵan bolatyn. Túrkistan qalasynyń týrıstik áleýeti óte joǵary. О́tken jyly 1 mıllıonnan astam týrıst kelgen bolsa, aldaǵy ýaqytta olardyń sanyn kóbeıtý kózdelip otyr. Osy maqsatta qalaǵa jańa áýejaı, temir jol vokzaly men avtovokzal, servıstik qyzmet kórsetetin áleýmettik mádenı nysandar salyp, olarǵa qajetti ınjenerlik ınfraqurylymdy júrgizý josparlanýda», dedi J.Túımebaev.
Kezdesý barysynda bir ańǵarǵanymyz, kásipkerler tarapynan kómektesýge daıyndyǵyn bildirgender baıqala qoımady. Kerisinshe «Bizge jobalardy júzege asyrýǵa qarjy bólinse» degendi aıtyp, bergisi emes, alǵysy keletinin emeýrinmen tanytqandar tabyldy.
Asa qulshynys bildirgender bolmaǵan soń, oblystyq máslıhat hatshysy Qaırat Balabıev Memleket basshysynyń 26 jyl boıy kásipkerlerge járdem kórsetip kelgenin, endigi kezekte isker azamattar elge, memleketke qyzmet etetin ýaqyt jetkenin aıtyp qamshylaǵandaı da boldy. Sondaı-aq hatshy kásipker ulynyń sporttyq keshen – fıtnes ortalyǵyn salýdy uıǵaryp qoıǵanyn jetkizdi. Oblys ákimi de kásipkerlerdiń memleketten alǵan kómekterin umytpaǵanyn qalaıtynyn bildirdi. «Kim ne alǵanyn ózderi jaqsy biledi. Endi sony qaıtaratyn kez keldi», dedi J.Túımebaev.
Degenmen, jańa oblys ortalyǵyn damytýǵa kómek kórsete bastaǵan kásipkerler de joq emes. Máselen, esimi elge málim bıznesmen, oblystyq máslıhat depýtaty Serikjan Seıitjanov qonaqúı salýdy bastap ketse, túriktiń bir isker azamaty da bes juldyzdy ekinshi qonaqúıdi turǵyzýdyń jobasyn jasap qoıypty.
Igi iske Shymkent qalasynyń ákimdigi de atsalyspaq. Osy oraıda Túrkistan oblysy men Shymkent qalasy əkimdikteriniń arasynda memorandým jasaldy. «Elbasy Parlament palatalarynyń birlesken otyrysynda Túrkistan men Shymkentti damytý məselesine erekshe toqtalyp ótti. Qyrǵyzstanda ótken Túrki memleketteri basshylarynyń keńesinde de Túrkistannyń mańyzdylyǵyna mán berdi. Shymkent – Túrkistan oblysyna eń jaqyn qala. Sondyqtan óńirdiń damýyna birinshi kezekte Shymkent qalasynyń qosar úlesi zor. Biz bir-birimizdi qoldaı otyryp, oblys pen qalany, sol arqyly respýblıkamyzdy damyta berýimiz kerek», dedi Janseıit Qanseıituly.
Sondaı-aq oblys ákimi qalanyń erteńgi kelbetine qatysty birqatar usynysyn jetkizdi. Mysaly qaladaǵy úılerdiń bıiktigin 5 qabattan asyrmaı, saıaly etý, kólik qozǵalysyn azaıtý úshin kóshelerdiń enin keńeıtpeý qajettigin aıtty.
Túrkistanda 66 toıhana bar eken, olardy basqa maqsatta paıdalaný jolyn qarastyrý da mańyzdy. Al Shymkent qalasynyń əkimi Ǵabıdolla Əbdirahymov Bas jospar bekitilgen soń, Túrkistanǵa eń birinshi bolyp úlken ǵımarat salyp berýge úshinshi megapolıs ázir ekendigin málimdedi.
Jıynǵa qatysýshylar Túrkistan qalasyn damytý maqsatynda jasalǵan jobalarmen tanysty.
Ǵalymjan ELShIBAI,
«Egemen Qazaqstan»
Túrkistan oblysy