Jylý maýsymyna daıyndyq barysyn baıandady

Baspasóz máslıhatyn ótki­zý­shilerdiń málimdeýinshe, jyl basynan beri respýblıkada elektr energııasyn óndirý kólemi 74 mlrd KVt/saǵ qurady, al tutyný kólemi 70 mlrd KVt/saǵat boldy. Bul – ótken jyldyń osy mer­zimindegiden 6%-ke joǵary.

Aldaǵy jylytý maýsymyna daıyndyq barysy týraly áńgime qozǵaǵan Q. Bozymbaev bul máseleniń mınıstrliktiń turaqty baqylaýynda bolatyndyǵyn atap kórsetti. Bul iske Úkimet tara­pynan da jiti kóńil bólinýde. 22 tamyzda Úkimet otyrysynda jáne 27 tamyzda Premer-Mı­nıs­tr­diń birinshi orynbasary A.Ma­mın­niń tóraǵalyq etýimen ótken ke­ńeste osy másele arnaıy qaralǵan.

Energetıka men Inves­tı­sııalar jáne damý mınıstrleriniń birlesken buıryǵymen 2018-2019 jyldardaǵy jylý be­rý maýsymynyń turaqty ótýin qam­tamasyz etý úshin daıyn­dyqty baqylaý, jylý maýsymyn ótkizý, elektr stansalaryn, kom­mýnaldyq sektordy jáne halyqty kómirmen qamtamasyz etýdi qadaǵalap, isti úılestirý shta­by quryldy. Shtab quramyna mınıstrlikter men ákimdikterdiń jaýapty tulǵalary engizildi. Buıryq sheńberinde Energetıka mınıstrligine kúzgi-qysqy kezeń­ge daıyndalý men ótý monı­torıngin júrgizý jáne eldiń elektr stansalarynda otynnyń nor­matıvtik qoryn jınaqtaýdy kún­delikti qamtamasyz etý beki­tilgen. Investısııalar jáne damý mı­nıstrligi aptalyq negizde kómir óndiretin uıymdardan kó­mir óndirý men tıeýge, kómirdi kom­mý­naldyq-turmystyq sektor­ǵa jáne halyqqa tıep-jónel­týge, usynylǵan ótinimderge sáı­kes kómir tıeý vagondarymen qamtamasyz etý boıynsha ju­mys­tar júrgizýi tıis.

Budan basqa Energetıka mı­nıs­trligi Investısııalar jáne damý mınıstrligimen, ákim­dik­termen jáne «KEGOC», «Qazaqstan temir joly», «Sa­muryq-Energo», «QazTransGaz» ulttyq kompanııa­larymen bir­lese otyryp aı saıyn barlyq energetıkalyq ká­siporyndarmen selektorlyq ke­ńes ótkizý jóninde uıǵarym ja­saldy.

Aldaǵy 2018-2019 jyl­dar­daǵy kúzgi-qysqy kezeńde elimiz­diń tutynýshylaryn turaqty energııamen jabdyqtaý úshin 8 energoblokty, 56 energetıkalyq qazandy jáne 45 týrbınany kúrdeli jáne keńeıtilgen aǵym­daǵy jóndeý josparlanǵan bolatyn. Qazir elektr stansalarynda 4 energoblok (jyldyq kólemniń 50%-i), 32 qazandyq (57%) jáne 24 týrbına (53%) jóndeldi. Bul rette týrbınalar men qazan­dyqtar boıynsha jumys qarqyny ótken jylǵy deńgeıden 10%-ke joǵary ekendigin atap ótken jón.

Sonymen qatar elimizdiń bir­tutas elektr energetıkalyq júıe­sin 2018-2019 jyldardaǵy kúzgi-qysqy kezeńge daıyndaý úshin jalpy uzyndyǵy 28 477 shaqyrym elektr jelilerin jón­deý josparlansa, sonyń 24 myń sha­qyrym jelisi jóndeldi. Bul jyl­dyq jospardyń 85%-in quraı­dy. Munyń syrtynda 4,5 myń qosalqy stansa da jóndeý­den ótkizilip otyr. Ortalyq­tan­dyrylǵan jylýmen jabdyqtaý aımaǵynda 500 qazandyqtyń 439-y (jyldyq jospardyń 88%-i) jóndeldi. Jalpy jóndeý ju­mystaryn oryndaý keste boıynsha júzege asyrylýda.

Elektr stansalarynyń otyn qoımalarynda 3,3 mln tonna kómir men 78 myń tonna mazýt jınalǵan, bul jalpy norma­tıvtik kólemge sáıkes keledi. Jy­lytý maýsymy bastalǵanǵa deıin kómir boıynsha normatıv Kókshetaý qalasynyń MKK «Kókshetaý Jylý» №2 qazandy­ǵynda (20 táýlik norma ishinde 7 táýlik qalǵan) jasalatyn boldy.

Ortalyqtandyrylǵan jylýmen jabdyqtaý aımaǵyndaǵy qazandyqtarynda 1,1 mln ton­na kómir jınaqtaldy. Bul jos­pardyń 84%-i. Al jınaqtalǵan mazýt kólemi 25 myń tonnany qurady. Bul jospardyń 18%-i ǵana. Osyǵan oraı Soltústik Qazaqstan jáne Pavlodar oblys­tarynda kómir, al Aqmola jáne Qaraǵandy oblystarynda mazýt daıyndaý qarqynyn arttyrý qajettigi atap kórsetildi.

Baspasóz máslıhatyna qaty­sýshylar Qazaqstanda 8 aıda shamamen 70 mln tonna kómir óndirilgendigin, bul ótken jyl­dyń osy kezeńimen salystyr­ǵanda 4,6%-ke artyq ekendigin málimdedi.

Suńǵat ÁLIPBAI,

«Egemen Qazaqstan»