Oblystyq Dostyq úıinde dańǵaıyr dıqan, ataqty mehanızator, Sosıalıstik Eńbek Eri, qazaqtyń aıaýly qaza Kámshat Dónenbaevany eske alý keshi ótti. Bul shara Kámshat Baıqazyqyzynyń týǵanyna 75 jyl tolýyna oraı uıymdastyryldy. Oǵan zamandastary, burynǵy birge jumys istegen áriptes, eńbek ardagerleri, týystary men balalary jáne jalpy Kámshatty qurmetteıtin jurtshylyq ókilderi qatysty.
Keshke qatysýshylar aldymen Kámshat Baıǵazynyń ómiri men eńbek jolyn eske túsiretin sýretter kórmesin tamashalady. Apaıdyń úlken kelini Aqmaral Jaqsybaeva enesi týraly kópshilik bile bermeıtin aqparattardy da ortaǵa saldy.
«Anamyz týraly onyń kózi tiri kezinde kóptegen fotosýretter jarııalanyp jatatyn. Biraq qolymyzda áli eshkim kórmegen, anamyzdyń úlbiregen jas shaǵyndaǵy sýretteri bar. Ony byltyr enem qaıtys bolǵannan keıin bir ájemiz ákelip berdi. Kóne sýretti biz óńdetip aldyq. Sonymen qatar Vengrııada túsken, enem bir vengr balasyna kindik sheshe bolǵandaǵy sýreti de biz úshin qundy» dedi Aqmaral.
Aqmaraldyń aıtýynsha, Kámshat apanyń óziniń qaıtar aldynda tapsyrýymen, ol kisi týraly barlyq materıaldardy jınaqtap, balalary kitap shyǵarý isin qolǵa alypty. Qazaqstanda talaı qyzdyń aty Kámshattyń qurmetine onyń esimimen atalǵany da belgili. Keshte kózkórgender byltyr ǵana aramyzdan ketken qazaqtyń dana qyzy týraly estelikter aıtty. Onymen egis alqabynda birge eńbek etken, Meńdiǵara aýdanynyń Sosnov selolyq okrýgi ardagerler keńesiniń tóraǵasy Anatolıı Shabanov tolqı sóıledi.
«Menen «Kámshat Baıǵazyqyzy qandaı bolyp edi?» dep suraıtyndar kóp. «Ol kisi sen men men sııaqty óte qarapaıym bolǵan» dep jaýap beremin. Biz 1972 jyldan birge eńbek ettik.Maǵan sharýashylyqta traktor aıdaıtyn áıel bar degen soń, ózim izdep baryp tanysqanmyn. Kámshat aldymen MTZ traktoryn aıdady,onyń ishi sýyq, jazda jeldetkishi de bolmaıtyn. Keıin oqyp, «Kıroves» traktoryn aldy. О́te eńbekqor edi. Ol alqapqa tańerteń erte baratyn, sodan úıine túnde bir-aq qaıtady ǵoı. Kámshatty barlyǵy syılaıtyn, aldynan ótpeıtinbiz.Ol kisi sharýashylyqqa kelgen K-700 traktoryn synaýǵa da kelisken bolatyn. Traktor synyp qalyp, jıyn-terin kezinde jumys toqtap qalǵanda, ol kisi Lenıngradtaǵy zaýytqa ózi telefon shalyp, jóndeıtin topty aınalasy bir kúnniń ishinde alǵyzǵany esimde. Qarapaıymdylyǵy, izettiligimen qatar, osyndaı talapshyldyǵy da bolatyn» dep áńgimeledi Anatolıı Shabanov aqsaqal.
Názıra Járimbet,
«Egemen Qazaqstan»
QOSTANAI