«Jetisý» geografııalyq qaýymdastyǵy qurylǵaly beri óńirdiń tumsa tabıǵatyn qorǵaý men aımaqtyń týrıstik áleýetin arttyrýǵa eńbek sińirip keledi. Ásirese, uıym músheleriniń Jetisýdyń aspanǵa qol sozǵan taýly aýmaǵyn zerttep, adam aıaǵy baspaǵan bıik shyńdardy baǵyndyrýǵa umytylysy keremet.
Bıyl geografııalyq qaýymdastyq músheleri Astana qalasynyń 20 jyldyǵyna oraı Almaty oblysy aýmaǵyndaǵy 7 shyńdy ıgerýge bel býǵan. Jaz boıy alpınıster men tabıǵattanýshylar Labasy, Fýrmanov, Panorama, Bashýta,Týrıst, Tekeli ataýlaryn ıelengen Joǵar Alataýy shyńdarynyń basyna shyqty. Al Hańtáńiri shyńyna arnaıy medıa-ekspedısııa baryp, qaıtty. Bıyl geografııalyq qaýymdastyq músheleri jalpy bıiktigi 20 myń metr bolatyn taý basyna aıaq basyp, elimizdiń kók týyn quz basyna qadady. Baǵynǵan shyń-quzdyń eń bıigi 7 myń metrlik Hantáńiri bolsa, eń alasasy 1500 metrlik Tekeli shyńy boldy.
- Taý asyp, shyń basyna shyǵý táýekeli kóp, qaýip-qateri mol jumys. Kásibılik pen jaýjúrektilik qana emes, týǵan jerge, tabıǵatqa degen súıispenshilikti te talap etedi. Jalpy, qaýymdastyqtyń maqsaty óńirdegi taý týrızmin damytý men jastar arasynda salaýatty ómir saltyn qalyptastyryp, alpınızmge qyzyǵýshylyqtaryn oıatý. Qazir 12 múshemiz bar. Qaýymdastyq qataryna qosylǵysy keletinder bar. Aldaǵy kúnderi Jetisýdyń geografııasyn, tarıhyn, etnografııasyn zertteýge yqylasty jastardy múshelike qabyldamaqshymyz, - deıdi «Jetisý» geografııalyq qaýymdastyǵynyń jetekshisi Ánýar Demegenov.
Qalmahanbet MUQAMETQALI,
«Egemen Qazaqstan»
Almaty oblysy