Qadirli oqyrman, ǵasyrmen úndesken «Egemen Qazaqstan» gazeti óziniń 100 jyldyǵy qarsańynda jarqyn jobalardy qolǵa alǵan bolatyn. Sonyń biri ári biregeıin ózderińizge usynýdyń sáti búgin túsip otyr. Biz jyl basynda álemdik medıa keńistiktegi amerıkalyq alpaýyt New York Times gazetiniń bas keńsesinde bolyp, áriptestik baılanys ornatý maqsatynda kelissóz júrgizdik.
Sol kelissózder nátıjesinde New York Times-tiń materıaldaryn kóshirip basý quqyǵyna qol jetkizip, arnaıy memorandým jasadyq. Sonyń negizinde jýrnalıstıkanyń bıik shyńy sanalatyn Pýlıtser syılyǵyn 125 ret alǵan New York Times gazetinde jaryq kórgen kolýmnıster men sarapshylardyń eń tańdaýly maqalalary men pikirlerin, saraptamalary men sholýlaryn egemen.kz saıtynyń aǵylshyn tilindegi nusqasynda jarııalap qana qoımaı, qazaq tiline de aýdaryp, qalyń oqyrmanǵa usynýdy bastap otyrmyz.
Bul qadam elimizdegi medıa keńistiktiń aıasyn keńeıtip, jurtshylyqtyń sapaly aqparat kózderine degen qoljetimdiligin arttyrady dep oılaımyz. Sonymen qatar otandyq baspasózge stıldik, mazmundyq jáne tildik turǵydan tyń serpilis ákelip, jalpy qazaq jýrnalıstıkasynyń damýyna oń yqpalyn tıgizetinine senimdimiz.
Gazetimizdiń búgin qoldaryńyzǵa tıgen sanyndaǵy arnaýly bette álemge áıgili New York Times-te basylǵan materıaldardyń alǵashqy legi jarııalanyp otyr. Arnaýly bet aldaǵy ýaqytta apta saıyn turaqty túrde shyǵatyn bolady.
Qurmetpen, Darhan QYDYRÁLI