Byltyr Shyǵys Qazaqstanda oblys ákimi Danıal Ahmetovtiń bastamasymen «Altay Athletics» kásibı jeńil atletıka klýby qurylǵan bolatyn. Klýb quramyna London Olımpıadasynyń chempıony, Azııa oıyndarynyń tórt dúrkin jeńimpazy Olga Rypakova, bıylǵy Azııa oıyndarynyń qola júldegeri Nadejda Dýbovıskaıamen qatar, Nora Djerýto, Deızı Djıpkemeı, Karolın Kıpkırýı sekildi kenııalyq jelaıaqtar da alynǵan edi. Jaqynda О́skemende oblystyq dene shynyqtyrý jáne sport basqarmasy klýbtyń bir jyldyq jumysyn qorytyndylap, baspasóz máslıhatyn ótkizdi. Osy jıynda klýbqa jańa músheler qabyldanǵany jaıynda aıtylyp, klýb dırektory Ashat Seısembekov marafonshy qazaq qyzy Gúljanat Janatbekti tanystyrǵan-dy. Baspasóz máslıhatynan keıin shetelde jattyǵýǵa múmkindik alǵan jeńil atletti áńgimege tarttyq.
– Gúljanat, Siz 5, 10 shaqyrym qashyqtyqtar boıynsha qyzdar arasynda Qazaqstannyń úsh dúrkin chempıony, Gonkongte ótken Azııa chempıonatynyń qola júldegerisiz. Rıo-de-Janeıro Olımpıadasyna da qatystyńyz. О́skemendik «Altay Athletics» kásibı jeńil atletıka klýbyna qashan shaqyrtý aldyńyz?
– Men Taldyqorǵan qalasynda dúnıege kelgenmin. «Altay Athletics» klýbymen kelisimshart jasasqaly eki aıdan astam ýaqyt boldy. Osy klýbqa qabyldanǵannan keıin Kenııaǵa baryp, sol eldiń jeńil atletterimen birge jattyǵý ótkizip keldim.
– Kenııadan alǵan áserińiz qandaı? Ol jaqtyń jelaıaqtary qalaı jattyǵady eken?
– Eki aıdaı sol elde boldym. Kenııa – jelaıaqtar eli. Qazir bizdiń elde de jeńil atletıkaǵa, buqaralyq sportqa jaqsy kóńil bólinip,«Astana marafony», «Almaty marafony», «Shymkent marafony» sekildi jarystar ótkizilip keledi. Men 42 shaqyrymǵa júgiretin marafonshymyn. Kenııa maǵan kásibı turǵydan damýyma kómektesedi dep oılaımyn.
– Sonda sizdi Kenııada jattyǵyp júrgen alǵashqy qazaq deýimizge bola ma?
– Bolatyn shyǵar. Kenııa astanasy Naırobı qalasynda jattyqtym. Bul shahar «chempıondardyń qalasy» dep atalady. Eki dúrkin Olımpıada, eki márte álem chempıony Devıd Rýdısha men jartylaı marafonnan álemniń úsh dúrkin chempıony Merı Keıtanı de osy qalada jattyǵady.
– Siz kimdermen birge jattyǵasyz?
– Bapkerim – Kennet Rotıch. Men Nora Djerýto, Deızı Djıpkemeı, Karolın Kıpkırýı, Shedrak Koech sekildi kenııalyq jelaıaqtarmen birge jattyǵamyn.
– Kenııada eki aıdaı boldyńyz. Ne túıdińiz? Kenııalyqtardyń jelaıaq bolýynyń syry nede?
– Birinshiden, júgirý olardyń qandaryna sińgen qasıet. Bizdiń elde sporttyń boks, aýyr atletıka, kúres sııaqty túrlerine jaqsy kóńil bólinse, ol jaqta júgirýge aıryqsha den qoıady. Qaı jerge qarasań da, júgirip júrgen adamdardy kóresiń. Tańǵy 5-te tursań da kóshede júgirip bara jatqandarǵa kóziń túsedi. Álemniń kóptegen myqty sportshylary osynda jattyǵady. Bul jerdiń aýa raıy da ózgeshe, teńiz deńgeıinen 2500 metr bıiktikte ornalasqan.
– Eki aıda óz nátıjeńizdi jaqsarta aldyńyz ba?
– Bıyl Almatydaǵy ál-Farabı atyndaǵy Qazaq ulttyq ýnıversıtetiniń magıstratýrasyn bitirdim. Sabaqqa kóbirek kóńil bólip, emtıhan tapsyryp, dıplom qorǵap, jarystarǵa durys qatysa almadym. Biraz ýaqyt jattyǵýdy toqtatýǵa týra keldi. «Altay Athletics» klýbyna shaqyrtý alǵannan beri jattyǵýdy qolǵa alyp jatyrmyn. Nátıje birden bolmaıdy ǵoı. Áýeli Kenııanyń aýa raıyna, tamaǵyna beıimdelý kerek. Kelesi jylǵa deıin nátıjemdi jaqsartamyn dep oılaımyn.
– Kenııaǵa qaıta barasyz ba?
– Birer kúnde ushamyz. Qarashaǵa deıin sol elde jattyǵamyn. Osy aıda 42 shaqyrymdyq úlken marafon ótedi. Qazir soǵan qatysýǵa ázirlenip jatyrmyn. Meniń júgirýdegi eń jaqsy nátıjem – 2 saǵat 38 mınýt. Bul – Qazaqstan boıynsha jaqsy kórsetkish. Al álemdik deńgeıge jetý úshin 42 shaqyrymdy
2 saǵat 30 mınýtta júgirýiń qajet. Demek, 8 mınýt túsirý kerek. Olımpıada oıyndarynda jaqsy kórsetkish – 2 saǵat 20 mınýt.
– Aldaǵy josparyńyz qandaı?
– Endigi jospar – halyqaralyq deńgeıdegi jarystarǵa qatysý. 42 shaqyrymdy 2 saǵat 35, 2 saǵat 30 mınýtta júgirýdi maqsat etip otyrmyn. Azııa oıyndaryna deıin eki aı Kenııa sportshylarymen birge jattyqtym. Olardan úırenerimiz kóp. О́kinishke qaraı, Qazaqstanda uzaq qashyqtyqqa kásibı túrde júgiretin sportshylar saýsaqpen sanarlyq. Buǵan bilikti jattyqtyrýshylardyń joqtyǵy da sebep. Úlken qashyqtyqqa júgirý úshin keminde 6 aı, 1 jyl kóleminde daıyndyq kerek. Sonda ǵana nátıje shyǵady. Degenmen, Tokıoǵa jaqsy daıyndyqpen baramyz dep oılaımyn. Osy múmkindikti paıdalanyp, shetelde jattyǵýyma, tájirıbe jınaýyma múmkindik bergen Shyǵys Qazaqstan oblysynyń ákimi Danıal Ahmetovke, oblystyq dene shynyqtyrý jáne sport basqarmasynyń basshysy Asqar Mojanovqa, «Altay Athletics» kásibı jeńil atletıka klýbynyń dırektory Ashat Seısembekovke alǵysymdy bildirgim keledi.
– Áńgimeńizge rahmet.
Áńgimelesken
Azamat QASYM,
«Egemen Qazaqstan»
О́SKEMEN
Sýrette: Gúljanat bapkeri Kennet Rotıch jáne jelaıaq Karolın Kıpkırýımen birge