Taıaýda Almaty oblysynyń Jetigen eldi mekeninde ornalasqan Qazaqstan Respýblıkasy Ulttyq ulanynyń arnaıy maqsattaǵy jaýyngerlik jáne ádistemelik daıyndyq ortalyǵynda Ulttyq ulandaǵy barlyq áskerı bólim komandırleriniń oqý-ádistemelik jıyny ótti.
Úsh kúnge sozylǵan oqý-ádistemelik jıyn Ulttyq ulan bas qolbasshysynyń arnaıy buıryǵy negizinde osy jyldy Ulttyq ulan quramynda «2018 jyl – kásibı biliktilik jyly» dep jarııalanýymen ushtastyrylyp, keń kólemde alǵash ret uıymdastyryldy. Mundaǵy kózdelgen negizgi basymdyq áskerdiń aldyńǵy býyn ofıserleriniń kásibı biliktiligin joǵarylatýǵa baǵyttalǵan. Iаǵnı, arnaıy maqsattaǵy áskerı bólimderi, túzeý mekemeleri men asa mańyzdy nysandardy kúzetý jónindegi áskerı bólimderi jáne tótenshe jaǵdaılar boıynsha áskerı bólim komandırleri teorııalyq jáne tájirıbelik synaqtar tapsyrdy. Naqtylaı tússek, qatysýshylar jaýyngerlik daıyndyqtyń negizgi túrlerinen: atý qarýymen, dene daıyndyǵy, ádistemelik, memlekettik-quqyqtyq daıyndyq pen jalpy áskerı jarǵydan, taktıka men jedel sheshim qabyldaýdyń sheberliginen jáne áskerdi basqarý ónerinen synaqtar tapsyrdy.
Sharanyń alǵashqy kúni komandırler psıhologııalyq testen ótip, arnaıy qurylǵylar arqyly olardy psıhologııalyq jáne psıhofızıologııalyq dıagnostıkadan ótkizý jumystary da josparǵa saı júrgizildi. Osy oraıda aıta keterlik jaıt, búgingi tańda ýaqyt talabymen úndesetin zamanaýı dıagnostıkadan ótkizýge arnalǵan mundaı qurylǵylarmen Ulttyq ulannyń úsh óńirlik qolbasshylyǵy tolyq derlik qamtylǵan.
Sonymen qatar jıynǵa qatysýshylar jetekshi qujattar men buıryqtardy bilý jóninen arnaıy testileýden ótti. Jıynǵa jetekshilik etken Ulttyq ulan bas qolbasshysynyń orynbasary, general-maıor Albert Matkarımovtiń aıtýynsha, oqý-ádistemelik jıynnyń sabaqtary negizinen tájirıbelik turǵyda mashyqtandyrýǵa arnalǵan. Sonyń aıasynda uıymdastyrýshylar oqý-ádistemelik jıynǵa qatysýshy ofıserlerdiń qarý túrlerin kúndiz ben túnde paıdalanýyn, arnaıy jattyǵý qurylǵylarynda jaýyngerlik tehnıkalardy tizgindeý qabiletin tanyta otyryp, óz sheberlikterin kórsetýine basymdyq berildi. Bólim komandırleri jaýyngerlik urys jaǵdaıyna beıimdelgen túrli sıpattaǵy dabyl boıynsha óz sheberlikterin shyńdady.
Sondaı-aq jıyn barysynda komandırlerge áskerge jańadan kelip jatqan sońǵy úlgidegi kózdeý quraldary men jattyǵý qurylǵylary, naqtylap aıtsaq, lazermen ımmıtasııalanǵan mýltımedııalyq atý tıriniń jáne basqa da qurylǵylardyń qyr-syry tanystyryldy.
Sheberlikti shyńdaýǵa baǵyttalǵan oqý-ádistemelik jıyndy Ulttyq ulan bas qolbasshysy general-leıtenant Rýslan Jaqsylyqov qorytyndylap, Ishki ister mınıstri men bas qolbasshynyń áskerı bólimderdiń jaýyngerlik daıarlyǵyn jetildirýge qatysty aldaǵy ýaqytqa naqtylanǵan tapsyrmalary berildi.
Esterińizge sala keteıik, Ulttyq ulannyń arnaıy maqsattaǵy jaýyngerlik jáne ádistemelik daıyndyq ortalyǵy 2016 jyly Memleket basshysy – Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen ashylǵan bolatyn. Halyqaralyq talapqa saı keletin atalǵan ortalyqta IIM men Ulttyq ulannyń áskerıleri jáne ózge de kúsh qurylymdarynyń mamandary kásibı biliktilikterin shyńdap keledi.
«Egemen-aqparat»