Áıgili kúıshi-kompozıtor Qurmanǵazy Saǵybaıulynyń IýNESKO deńgeıinde atalyp jatqan mereıtoıy aıasynda «Naǵyz qazaq – dombyra!» atty respýblıkalyq aksııaǵa 1700 dombyrashy qatysty. Oral qalasyndaǵy Tuńǵysh Prezıdent alańynda ótken sharaǵa qatysýshylar Qurmanǵazynyń «Balbyraýyn» jáne «Adaı» kúılerin oryndady.
- Dombyra kýlti, ulttyq aspabymyzǵa degen qurmet ár shańyraqtan bastaý alýy kerek. Búgingi aksııaǵa dombyra ustap, kúı tarta alatyn batysqazaqstandyqtar óz erkimen qatysyp otyr. Bul úlken patrıottyqtyń belgisi. Búgin alańǵa Batys Qazaqstan oblysynyń ár túkpirinen 1500-den asa dombyrashy jınaldy. Meniń oıymsha, elimizde munsha kóp adam bir mezgilde bir shyǵarmany oryndaǵan joq. Qazaqstan rekordy jańaratyn shyǵar, - dedi shara bastalar aldynda Batys Qazaqstan oblysy ákiminiń orynbasary Ǵabıdolla Ospanqulov.
Kún bulttanyp, kúzdiń qara sýyq yzǵary soǵyp tursa da alańǵa jınalǵan halyqtyń qarasy shynynda da kóp edi. «Daryn» memlekettik jastar syılyǵynyń jáne «Qurmet» ordeniniń ıegeri, Dáýletkereı atyndaǵy ult-aspaptar orkestriniń kórkemdik jetekshisi ári bas dırıjeri Erkin Nurymbetovtiń «syıqyrly taıaǵyna» baǵynǵan myń san adam bir mezette Qurmanǵazynyń «Balbyraýyn» kúıin oınaı jóneldi. Alǵashqy kúı oınalyp bitken soń sál-pál úzilisten keıin adýynda «Adaı» kúıi kúmbirlep ketti.
- Búgingi tarıhı is-sharaǵa qatysqan barsha ónerpazǵa alǵysymdy aıtamyn. Shynynda da búgin tarıhı kún, ata-babamyzdyń ańsaǵan armanyna jetken kún. Qurmanǵazy babamyzdyń ómiri kúrespen, arpalyspen ótti. Kúıleriniń ataýy da «Túrmeden qashqan», «Kisen ashqan» bolyp keledi. Erkindikti, azattyqty súıgen kúıshi babamyzdyń da armany elimizdiń táýelsizdigi bolǵany anyq. Endeshe osy baqytymyzdy baǵalaýymyz kerek, qadirleýimiz kerek. Táýelsizdigimizdi saqtaıyq! – dedi Batys Qazaqstan oblysynyń ákimi Altaı Kólginov tolqyp turyp.
Budan keıin minbege kóterilgen Qazaqstan rekordtar kitabyna rekordtardy tirkeý departamentiniń dırektory Baqytjan Tastúlekov búgingi «Naǵyz qazaq – dombyra!» atty respýblıkalyq aksııaǵa qatysýshylar sany 1700 adam bolǵanyn jarııalady. «Men búgin Oral qalasynda Qurmanǵazy kúılerin buqaralyq oryndaýda jańa rekord jasalǵanyn kýálandyramyn! Budan úsh jyl buryn Atyraý qalasynda ótken sharaǵa 1017 adam qatysqan bolatyn. Búgin jańa rekord jasaldy» dedi Baqytjan Sábıtuly.
Aksııa sońynda osy sharany uıymdastyryp ótkizýge atsalysqan Qazaqstan Respýblıkasynyń eńbek sińirgen qaıratkeri, kúıshi, professor Aıtjan Toqtaǵan, Qazaq Ulttyq óner ýnıversıtetiniń professory, kúıshi Orynbaı Dúısen, Qazaqstan Respýblıkasynyń eńbek sińirgen artısi, «Daryn» memlekettik jastar syılyǵynyń ıegeri, professor, kúıshi-dombyrashy Aıgúl Úlkenbaeva, «Qurmet» ordeniniń ıegeri, Qazaqstan Respýblıkasynyń eńbek sińirgen óner qaıratkeri, dáýlesker kúıshi Ermek Qazıev, «Daryn» memlekettik jastar syılyǵynyń jáne «Qurmet» ordeniniń ıegeri, Dáýletkereı atyndaǵy qazaq ult-aspaptar orkestriniń kórkemdik jetekshisi ári bas dırıjeri, kúıshi Erkin Nurymbetov, Qazaqstan Respýblıkasy mádenıet salasynyń úzdigi, Qurmanǵazy atyndaǵy Oral saz kolledjiniń dırektory Nurjan Sertek arnaıy sertıfıkatpen marapattaldy.
Qazbek QUTTYMURATULY
«Egemen Qazaqstan»
Sýretti túsirgen Dınara KENDIRBAEVA
Batys Qazaqstan