Qarǵa adym jerdi muń qylǵan densaýlyǵynyń kináratyna qaramaı, bala kúninen kıiktiń asyǵyndaı shymyr, ámanda alyp ushyp alǵa umtylyp turatyn shıraq bolyp ósti. Mektepte táýir oqydy. Kem bolsa da qatarynan qalǵysy kelmegen. Derjavınsk qalasyndaǵy kásiptik-tehnıkalyq kolledjde baǵdarlamashy mamandyǵyn ıgerdi.
Eshkimge alaqan jaıdyrmaıtyn, kún kórisin aıyratyn kásip izdegen. Tyńnan soqpaq salmaq. Áli eshkim qolǵa almaǵan ilkimdi sharýaǵa ilinip ketse jarar edi. Eldegi kásipkerlermen aqyldasyp, zamana aýjaıyn ańdaǵan. Ǵalamtordy da san ret súzip ótti. Qolynan keledi-aý degen birtalaı jumystardyń jaı-japsaryn kóńil eleginen ótkizgen. Aqyry tapty. Qala ishindegi kishigirim qoımany jalǵa alyp, beı-bereket shashylyp jatatyn karton qaǵazdaryn, aıaqqa oralyp ybyrsyǵan plastık bótelkelerdi, tesilip, jaramsyz bolyp qalǵan temir ydystardy jınaı bastady.
Bireýdiń sharýasyna bireý qaraılasa qoıa ma, eshkimnen járdem tilegen joq. Qala ishin aralap, ózine qajetti shıkizat izdeýge kiristi. Isi ońynan ońǵarylǵan soń teńgelep bolmasa da tııandap qor jınala bastaǵan. alǵashqy aqshasyna velosıped satyp aldy. Oǵan zat salatyn arnaıy jáshikter ornatty.
О́tken jyldyń kúzinde «Nur Otan» partııasynyń aýdandyq fılıalyna kómek surap kelgen. Ondaǵylar betin qaıtarǵan joq. Qaıta jaǵdaıyn túsinip, janashyrlyq kórsetti. Qajetti qujattardy jınastyryp, qoımany senimgerlikpen paıdalanýǵa qol ushtaryn sozdy.
–Sergeı óz jumysyn karton jınaýdan bastap edi. El ishinde mundaı zat tolyp jatyr ǵoı. Jınaýy qıyn bolmaǵanymen, oblys ortalyǵyna jóneltý aýyr bolyp tur,–deıdi aýdandyq partııa fılıalynyń keńesshisi Ádil Nurbekov.
Ekinshi toptaǵy múgedek Sergeı Prıvalov «Bastaý bıznes» baǵdarlamasyna qujattaryn tapsyryp qoıǵan. Aldaǵy ýaqytta nesıe alyp, bıznesimdi keńeıtsem degen nıette.
–Aldymen qoqys óńdeıtin seh ashar edim,–deıdi jas kásipker,–bul isim bir jaǵynan ózime paıdaly bolsa, ekinshi jaǵy qala tazalyǵyna da septigin tıgizedi emes pe. At kópir bolyp jatqan qoqys ataýlyny kádege jaratyp, qaıtadan óńdeý arqyly qurylys zattaryn shyǵarýdy armandaımyn.
On eki múshesi saý keı azamat eki qolǵa bir kúrek taba almaı osharylyp otyrǵanda, sezimi sergek Sergeıdiń isine tánti bolasyńdaǵy.
Baıqal BAIÁDIL,
«Egemen Qazaqstan»
Aqmola oblysy,
Jarqaıyń aýdany.