Elbasy óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda «Týǵan jer» baǵdarlamasyn qolǵa alý kerektigin aıta kelip, «Týǵan jerge, onyń mádenıeti men salt-dástúrlerine aıryqsha ińkárlikpen atsalysý – shynaıy patrıotızmniń mańyzdy kórinisteriniń biri» degen bolatyn. Bul rette «Týǵan jer» baǵdarlamasy aıasynda Jambyl óńirinde de birqatar jobalar qolǵa alynyp keledi.
Máselen «Qazfosfat» jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirov, Taraz ınnovasııalyq-gýmanıtarlyq ýnıversıtetiniń rektory Erbolat Saýryqov, «Araıstroımarket» jaýapkershiligi shekteýli seriktestiginiń dırektory Arman Edilbaev jáne ózge de azamattar «Týǵan jer» baǵdarlamasy aıasynda 543 mıllıon teńgeniń jumysyn júzege asyrýda.
Sonymen qatar, Shý aýdanynyń Belbasar aýylynda Bolat Saýranbaev quny 350 mıllıon teńge bolatyn sport kesheniniń qurylysyn júrgizýde. Munyń barlyǵy da azamattardyń týǵan jerge tartýy, atalǵan baǵdarlamanyń laıyqty júzege asyp kele jatqanynyń kórinisi.
Jýyrda Taraz qalalyq ákimdiginde ótken qaıyrymdylyq sharasy kezinde «Týǵan jer» jobasy aıasynda kásipqoı bokstan áıelder arasynda elimizden shyqqan tuńǵysh álem chempıony Fırýza Sharıpova az qamtylǵan Joldybaevtar otbasyna «Renault Iogan» avtokóligin syılap, kómek kórsetti. Sharıpova kópshilikke eki salmaq dárejesinde WIBA, WBC (silver), IBO tujyrymdary boıynsha álem chempıony retinde tanymal. Kásipker bolmasa da qaıyrymdylyq qaǵıdatyn berik ustanǵan qarshadaı qyzdyń bul áreketine kópshilik qýandy. Shara barysynda Taraz qalasynyń ákimi Ǵalymjan Ábdiraıymov ta Fırýzanyń bul kómegi kópke úlgi ekenin atap ótken edi.
Qaıyrymdylyq jasaý árbir jaǵdaıy kelgen adamnyń paryzy. Adamshylyq turǵysynan da solaı. Biraq Fırýza bul qaıyrymdylyqty ózin nasıhattaý úshin jasamaǵanyn aıtady. Qaıta Elbasynyń «Týǵan jer» baǵdarlamasy sheńberinde árbir jaǵdaıy kelgen azamat az qamtylǵan otbasyna kómek qolyn sozsa eken deıdi. Rasynda da óńirde qaıyrymdylyqqa muqtaj qanshama adam bar. Solardyń janyna demeý, kóńiline medeý jandar kóp bolsa, bul da eldiktiń kórinisi.
Al avtokólik ıesi atanǵan tórt balanyń anasy Rıza Seıiljanova úshin bul kútpegen jaǵdaı bolypty. Alaıda eki birdeı múmkindigi shekteýli balany ósirip otyrǵan ananyń Fırýzaǵa alǵysy sheksiz. Búginde Nurasyl men Erasyl on bir jasqa kelipti. «Buryn balalardy kóterip júre beretinmin. Qazir qıyn. Búgin kómek kórsetip otyrǵan Fırýzǵa alǵysym sheksiz. Jeńisten jeńiske jete berýine tilektespin», deıdi Rıza ana. Sol jıynǵa qatysqan júzýden Rıo-de-Janeıro Paralımpııadasynyń chempıony Zúlfııa Ǵabıdýllına da rızashylyǵyn bildirdi. Al dalaǵa shyǵyp, qala ákimi men chempıon qyz avtokólik ıesi atanǵan anany kólikke alqalap mingizgende, qýanbaǵan jan qalmady deýge bolady.
«Batamenen el kógeger» deıdi halqymyz. Júregi týǵan el dep soqqan Fırýza Sharıpovany bul rette «Týǵan jerge týyń tik!» aksııasyn jalǵaǵan azamattar qatarynan kórdik. Kórdik te súısindik. Onyń qazaqtyń týyn álem aldynda asqaqtatar kúni laıym kóp bolsyn dep tiledik!
Hamıt ESAMAN,
«Egemen Qazaqstan»
Jambyl oblysy