Aqtóbedegi О́ner ortalyǵynda «Anaǵa taǵzym» analar sleti ótti. Sharanyń ashylýynda oblys ákimi Berdibek Saparbaev qatysýshylarǵa aldymen Elbasy Nursultan Nazarbaevtyń joldaǵan quttyqtaý hatyn oqyp berdi.
«Barshańyzdy «Anaǵa taǵzym» sletiniń ashylýymen quttyqtaımyn!«Rýhanı jańǵyrý» baǵdarlamasynyń aıasynda alǵash ret ótkizilip jatqan Analar sleti – elimizdegi otbasylyq ahýaldy jaqsartýǵa baǵyttalǵan asa mańyzdy shara. Ana – árbir shańyraqtyń, sondaı-aq tutas Otanymyzdyń tiregi. Al qazaqstandyq analardyń áleýmettik jaǵdaıy jaqsy bolyp, urpaǵynyń bolashaǵyna alańdamaı, baqytty ǵumyr keshýi – men úshin eń basty maqsattardyń biri. Sol sebepti «Qazaqstan-2050» strategııasynda «Ana men balany qorǵaý – memlekettiń áleýmettik saıasatynyń asa mańyzdy bóligi» dep jarııaladym.
Táýelsizdiktiń alǵashqy jyldarynan bastap Qazaqstanda otbasyn nyǵaıtý isi dáıekti túrde júrgizilip keledi. Elimizdegi Áıelder isteri jáne otbasylyq-demografııalyq saıasat jónindegi ulttyq komıssııanyń jumysy árdaıym meniń jiti nazarymda», delingen Elbasy quttyqtaýynda. Sońynda Memleket basshysy árbir ana elimizdiń álemdik órkenıet kóshiniń basynda júrýine óz úlesin qosady dep senetinin jetkizip, ár shańyraqqa baqyt pen bereke tileıdi.
Qonaqtarǵa aldymen «Barlyǵy Analar úshin!» arnaıy kórmesi usynyldy. Kórmege elimizge belgili, óz salasynda úlken tabystarǵa jetken, ári bala ósirip, urpaq tárbıelegen analar portretteri; «Anaǵa marapat» atty balalar shyǵarmashylyǵy baıqaýy jeńimpazdarynyń týyndylary qoıyldy. Sondaı-aq qaz-qatar tizilgen qyzdar qazaq qyz-kelinshekteriniń ár jasqa tán ulttyq kıimderin kórsetti.
Atalǵan sletke KSRO halyq ártisi Bıbigúl Tólegenova, memleket jáne qoǵam qaıratkeri, Qazaq KSR Joǵarǵy Keńesi Tóralqa Tóraǵasynyń mindetin atqarǵan (1988-1989 jj.) Vera Sıdorova, etnograf, jazýshy Baýyrjan Momyshuly áýletiniń kelini Zeınep Ahmetova bastaǵan, ár salada úlken tabystarǵa jetken belgili áıelder, eńbek ardagerleri, ár óńirden, oblystyń barlyq aýdandarynan kelgen delegasııalar, kóp balaly analar men Aqtóbedegi kásiporyndar men mekemelerde jumys istep júrgen úzdik eńbekker qyz-kelinshekter qatysty.
Oblys ákimi óz sózinde «Rýhanı jańǵyrý» baǵdarlamasyn júzege asyrýda otbasy tárbıesiniń, analardyń róli zor ekenin atap ótti.
– Barshańyzǵa belgili, «Bolashaqqa baǵdar: rýhanı jańǵyrý» atty maqalasynda Elbasy ulttyq biregeılikti, ulttyq rýhymyzdy máńgi saqtaý jáne ulttyq sana-sezimniń kókjıegin keńeıtý máselelerine basa nazar aýdardy. Bizdiń ata-babalarymyz otbasy qundylyqtaryna, ata-anaǵa degen qurmetke, bala tárbıesine zor mán bergen. «Mekkege úsh ret arqalap aparsań da, ananyń aldyndaǵy paryzyńdy óteı almaısyń», degen sózde úlken maǵyna jatyr. Ana aldymen óz balasyn, sol arqyly búkil qoǵamdy izgilikke, adamgershilikke jeteleıdi. Qoǵamdaǵy barsha jaqsylyqtyń bastaýynda ananyń meıirimi turady. Sondyqtan da búgin Aqqaǵaz, Álııa týǵan qasıetti Aqtóbe topyraǵynda, ananyń qoǵamdaǵy mártebesi men rólin arttyrý, otbasyndaǵy tárbıe máseleleri tóńireginde aqyldasý maqsatynda ózderińizben bas qostyq, – dedi Berdibek Saparbaev.
Oblys basshysy bıyl Aqtóbe óńirinde balalar jyly jarııalanǵanyn jáne «Baqytty bala» jobasynyń maqsaty jóninde de baıandady.
– Túrli teris aǵymdar jastarymyzdy biz oılaǵannan múlde basqa baǵytqa áketkileri keledi. Bul qaýipten shyǵar jol bireý – ulttyq tárbıeni barynsha jandandyrý. Búgingi jas analar, qyzdarymyz ulttyq qundylyqtarǵa bas ıip ótken burynǵy analardyń jolyn jalǵaýlary kerek. Barshańyzdy osy maqsatta olarǵa úlgi kórsetýge shaqyramyn, – dedi B.Saparbaev.
Al KSRO halyq ártisi, qazaqtyń álemge áıgili ánshisi Bıbigúl Tólegenova bul bastamany qyzý qoldaıtynyn jetkizdi.
– Bul bastama basqa óńirlerde de jalǵasyn tapsa deımin, – dedi Bıbigúl Tólegenova.
Al Keńes zamanynda Qostanaı oblysynda eki aýdandy basqaryp, keıin Qazaq KSR Joǵarǵy Keńesi Tóralqasy Tóraǵasynyń mindetin atqarǵan, sonymen qatar jar, ana atanyp, ul-qyz ósirgen Vera Sıdorova óz sózinde Marııa Hakimjanova, Kámshat Dónentaeva syndy qazaqtyń aıaýly qyzdarymen dostyǵyn, birge ótkizgen sátterin saǵynyshpen eske alyp, árdaıym jastarǵa solardyń úlgi-ónegesin jetkizýge tyrysatynyn aıtty.
«Jyr aqqýy» atanǵan qazaqtyń kórnekti aqyn qyzdarynyń biri, búginde 82 jastaǵy Marfýǵa Aıtqojına da óziniń «Ana bolsań, ana janyn uǵarsyń», «Álııa» óleńderin oqyp, kópshilik qoshemetine bólendi.
Baýyrjan Momyshulynyń kelini, jazýshy Zeınep Ahmetova:
– Ár áıeldiń úsh baqyty bar: birinshisi – ata-ana baýyryndaǵy qyz kezi, qyzǵaldaq dáýreni. Ekinshisi – jar súıý, úshinshisi – dúnıege perzent ákelip, ana ataný. Osy úsh baqyt áıeldiń ómirin mándi etedi. Ár áıelge osy úsh baqytty tileımin, – dedi.
Elimizdiń Bala quqyqtary jónindegi ýákili Sáýle Aıtpaeva ana men bala baqytynyń ajyramas uǵym ekenin aıtyp, Aqtóbe óńirinde bıylǵy jyldyń balalar jyly bolyp jarııalanýyna jáne «Baqytty bala» jobasy aıasynda atqarylyp jatqan ister úshin oblys basshylyǵyna alǵysyn jetkizdi.
Jıynda analar sletine qatysýshylar atynan barlyq qazaqstandyqtarǵa úndeý qabyldandy. Úndeý mátinin Qazaqstannyń eńbek sińirgen qaıratkeri, qazaqtyń atyn álemge tanytyp júrgen ánshi Dımash Qudaıbergen syndy ul tárbıelegen ana Svetlana Aıtbaeva oqydy. Úndeýde otbasy ınstıtýtyn nyǵaıtý, ana men balany qoldaý, salamatty ómir saltyn nasıhattaý baǵytynda birqatar usynys aıtylǵan.
Sondaı-aq jıynda analarǵa qolaıly jaǵdaı jasap júrgen ujymdar, balalar arasynda ótken «Anaǵa marapat» shyǵarmashylyq baıqaýynyń jeńimpazdary marapattaldy. Ujymdaǵy analarǵa erekshe qamqorlyq jasaǵan kásiporyndar men mekemeler qatarynda «Qazaqoıl Aqtóbe» JShS, Aqtóbe ferroqorytpa zaýyty, Aqtóbe hrom qosyndylary zaýyty, «Stroıdetal» JShS, «Global-Arnaıy kıim» JShS bar.
«Anaǵa marapat» shyǵarmashylyq baıqaýy jeńimpazdary arasynan Aqtóbe qalalyq kórkemsýret lıseıiniń oqýshysy Serik Salamat sóz alyp, barlyq anaǵa balalar atynan aq tilekterin jetkizdi.
Jıyn sońy merekelik konsertke ulasty.
Indıra JAIMAǴAMBETOVA,
«Egemen Qazaqstan»
AQTО́BE