QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń uıymdastyrýymen «Qazaqstan búgin jáne bolashaqta» taqyrybynda pikir-saıys ótkizildi. Aımaqtyq deńgeıde ótken saıys memlekettik qyzmetshiler jáne stýdentterdiń basyn qosty.
Debatqa barlyǵy 24 memlekettik qyzmetshi qatysyp, 12 komandaǵa bólindi. Debat brıtandyq formatta ótkizildi. Onyń erejesine sáıkes 2 jaqtaýshy jáne 2 dattaýshy komanda qatysady. Ár komandada 2 spıker oınaıdy, olardyń árqaısysynyń mindeti ádilqazyny óz sózderine sendirý bolyp tabylady. Komandalar raýndtar kezinde sóz sóıleýlerine qaraı 1-den 4-ke deıin reıtıngter alady (1 – eń joǵary, 4 – eń tómen).
Debat sybaılas jemqorlyqtyń aldyn-alý, memlekettik qyzmettiń tıimdiligin arttyrý, atap kórsetkende faktorly-baldyq shkala boıynsha ákimshilik memlekettik qyzmetshilerge eńbekaqy tóleý jańa júıesi boıynsha pılottyq jobany engizý jónindegi taqyryptarda órbidi. Komandalar kelesi krıterııler boıynsha baǵalandy: pikir bildirýdiń debat taqyrybyna sáıkes kelýi, qısyndylyq (mazmuny, sóıleý qurylymy), sóıleý saýattylyǵy men mádenıeti, aqparattyń shynaıylyǵy, sóıleý tehnıkasy, emosııalyq áreket deńgeıi, sóıleý ádebi jáne durystyǵy, debat tártibin saqtaýy.
О́tkizilgen 4 raýndtyń qorytyndysy boıynsha oblys ákimdiginiń namysyn qorǵaǵan Talǵat Saqtaǵanov jáne Erkebulan Qaırolın jeńimpaz dep tanyldy. Al Erkebulan Jánibek jáne Erǵalı Ánesov bastaǵan komanda ekinshi orynǵa shyqty. Al Aıdynǵalı Dúısenbaev jáne Aıgúl Júsiptiń komandasy júldeli úshinshi oryndy ıelendi.
Sonymen qatar, Beıneý aýdany ákimi apparatynyń atynan qatysqan Eljas Shuńǵalov jáne Rahymjan Jumaǵazıev debattyń eń belsendi qatysýshylary dep tanyldy.
Barlyq jeńimpaz jáne júldeger komandalar alǵys hatpen marapattaldy. Al namysty qoldan bermeı, jeńimpaz atanǵan memlekettik qyzmetshiler Talǵat Saqtaǵanov jáne Erkebulan Qaırolın Astanada ótetin respýblıkalyq debatta Mańǵystaýdyń namysyn qorǵaıtyn bolady.
«Memlekettik qyzmetshilerdiń bul debatqa qatysýy olardyń tıimdi qyzmet etýine, óz ustanymdaryn dáleldeı bilýine, kreatıvtilikke, sondaı-aq, kez-kelgen jaǵdaıda mańyzdy aqparattardy erkin jetkize alýyna septigin tıgizedi. Sonymen qatar, ulttyq deńgeıdegi pikir-saıys memlekettik qyzmetshilerge el aldynda qoıylǵan maqsattarǵa jetý jolynda da úlken múmkindik beredi», - deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysynyń orynbasary Qaırat Baıgebaev.