Qoınaýy kenge toly, ákimshilik-aýmaqtyq ıeliginde Jáırem kenti bar, 18 358 adamdy quraıtyn Qarajal qalasy Qaraǵandy qalasynan ońtústik-batysqa qaraı 370 shaqyrym jerde ornalasqan.
Bul óńirdiń ekonomıkalyq múmkindikteri jáne bolashaǵy óte zor. Tek sońǵy 2 jylda ǵana qalaǵa 42 mlrd teńge ınvestısııa tartylǵan. Alaıda Qarajal qalasy men Jáırem kentinde 70-shi jyldary shoıynnan jasalǵan káriz jelileri búgingi tańda korrozııaǵa ushyrap, isten shyǵýda. О́z kezeginde bul jaǵdaı sý tartý jelilerinde asa apatty jaǵdaılar týdyrýda.
Qazirgi tańda osy aımaqtarda halyqtyń ortalyqtandyrylǵan káriz sý tartý júıesine qoljetimdilik kórsetkishi 28 prosentti ǵana qurap otyr. Atalǵan máseleni sheshý maqsatynda 2016 jyly káriz jelilerin rekonstrýksııalaýdyń 2-kezektegi jobalary ázirlenip, memlekettik saraptamadan ótkizilgen.
Jáırem kentiniń káriz júıelerin rekonstrýksııalaý jobasyn iske asyrý úshin qajetti qarjylandyrý 888 mln teńgeni qurasa, Qarajal qalasy káriz sý júıeleri qurylysynyń smetalyq quny 618 mln teńgeni quraıdy.
Bul jobalardy iske asyrý káriz sý tartý jelilerindegi apattardy tolyq joıýǵa, 80 prosentke deıin ortalyqtandyrylǵan káriz sý tartý jelilerine qol jetkizýge, sondaı-aq úzdiksiz ári sapaly káriz sý tartý júıesimen qamtamasyz etýge múmkindik beredi.
Osy aıtylǵan máseleniń erekshe mańyzdylyǵyn eskere otyryp, Qarajal qalasy men Jáırem kentiniń káriz jelilerin qaıta qurý 2-kezektegi jobalaryn júzege asyrý úshin qajetti qarjy bóldirýge yqpal etýińizdi suraımyz, dep biz Premer-Mınıstr Baqytjan Saǵyntaevtyń atyna depýtattyq saýal joldadyq. Respýblıkalyq bıýdjetke qomaqty qarjy quıyp jatqan kendi qalalardyń máselesi eskeriler degen úmittemiz.
Rysqalı ÁBDIKEROV,
Senat depýtaty