Palata Tóraǵasy Nurlan Nyǵmatýlın Armenııanyń Qazaqstandaǵy Tótenshe jáne О́kiletti elshisi Ara Saakıandy qabyldady, dep habarlaıdy Májilistiń baspasóz qyzmeti.
Taraptar eki el arasyndaǵy yntymaqtastyqty damytýdyń ózekti suraqtaryn talqylady.
Májilis Tóraǵasy yntymaqtastyq ornaǵan 26 jyl ishinde eki el qarym-qatynasy ózara tıimdi áriptestik deńgeıinde tabysty damyp kele jatqanyn atap ótti.
Palata Spıkeri bizdiń elimiz atalǵan memleketpen ekijaqty baılanysty keshendi túrde damytýǵa yntaly ekenin aıtty. Osy oraıda Nurlan Nyǵmatýlın az ýaqyt buryn Dýshanbede ótken Qazaqstan Prezıdenti Nursultan Nazarbaev pen Armenııa Premer – Mınıstri Nıkol Pashınıannyń kezdesýin alǵa tartyp, onda talqylanǵan máselelerdiń eki el úshin mańyzdylyǵyn atap ótti.
Kezdesý barysynda Májilis Tóraǵasy saýda-ekonomıkalyq is-qımyl áleýetine aıryqsha kóńil bóldi.
Osy jolda aýylsharýashylyǵy ónimderin qaıta óńdeý, aqparattyq tehnologııa, týrızm salalary bizdiń elderimizdiń iskerlik yqpaldastyǵyn damytýdyń basym baǵyttary bolmaq.
N. Nyǵmatýlın atap ótkendeı, táýelsizdik alǵan kúnnen bastap, Elbasynyń tapsyrmasy boıynsha Qazaqstanda ınvestısııa úshin qolaıly jaǵdaı jasalyp, ol jumystar búginge deıin tabysty jalǵasyp keledi.
Taraptar osy aıdyń sońynda Erevanda ótetin UQShU parlamenttik Assambleıasynyń kóshpeli otyrysyna daıyndyq barysyn sóz etti. Onda birqatar modeldik zańdar qabyldanady dep kútilýde.
О́z kezeginde A. Saakıan Qazaqstannyń qazirgi damý qarqynyn joǵary baǵalap, qysqa merzimde júzege asqan elordamyz Astananyń qurlysyn tarıhı ǵajaıypqa teńedi.
Júzdesýde mádenı-gýmanıtarlyq, halyqaralyq yntymaqtastyq jaıy da sóz boldy.
Al, parlamentaralyq baılanys jaıyna toqtalsaq, Májiliste Armenııa Respýblıkasymen Yntymaqtastyq jóninde top jumys isteıdi. Sonymen qatar, TMD Parlamentaralyq Assambleıasy jáne UQShU sheńberinde tyǵyz qarym-qatynas ornaǵan.
Aldaǵy ýaqytta beıindi komıtetter men parlamentaralyq toptar sheńberinde is-saparlar arqyly zańnamalyq tájirıbe almasýdy odan ári yntalandyrý josparlanǵan.