Alty jyldan beri Almatyda «Úzdik aýla tazalaýshy» baıqaýy jalǵasyp keledi. Megapolıs qalanyń tazalyǵyn nasıhattaýda bul jarystyń áleýmettik máni aıtarlyqtaı. Birinshiden, atalǵan joba Almatynyń kóptegen aýdandaryn aınadaı tazartyp otyrǵan adamdardyń eńbegin nasıhattasa, ekinshi jaǵynan jeńimpazdarǵa qarjylyq ıgilik ákeledi.
Baıqaý úzdikteri turatyn aýlalar árıne, qashan da taza. Aýla qorshaýlary ádemi boıalǵan, jol jıekteri syrlanǵan, jasyl jelekteri men gúlderi kútip-baptalynǵan.
Dástúrge aınalǵan baıqaýdy «Almatydaı taza» qoǵamdyq qory «Efes Kazaqstan» kompanııasynyń qarjylyq demeýshiligimen júrgizip otyr.
Sonymen bıylǵy aýla tazalaýshylardyń eńbegin qurmettep, óz isine jaýapkershiligi joǵary jandardy qoshemetteýge arnalǵan sharada «Efes Kazaqstan» AQ JK korporatıvtik qarym-qatynastar departamentiniń dırektory Shyńǵys Qaskeev birinshi kezekte dıplom men qarjylaı syılyqty Tohtıhan Rozakovaǵa usyndy. О́ıtkeni osynaý náp-názik áıel óziniń qajyrly eńbegimen
aýlasy eń taza ekendigin udaıy dáleldeýmen keledi.
– Meniń jumysymnyń óz jaýapkershiligi bar. Adamdardyń jaı mán bermeıtindigi bolmasa, aýla tazalaýshy da – jaqsy kásip. Aınadaı tazartyp shyqqannan keıin aınalańa qarap, qýanasyń. Keıde ótip bara jatqan adamdar toqtap, alǵysyn jaýdyryp jatady. Jumysym ózime unaıdy, – deıdi T.Rozakova.
Al ekinshi oryndy Andreı Govorov aldy. Bala kúninde múgedektikke shalynǵandyǵyna qaramastan, ol ózine berilgen aýmaqty aınadaı, tap-tuınaqtaı etip ustap otyrǵan jan. Úshinshi oryn men aqshalaı syılyq Shárıpa Ýshýrova, Amangeldi Ábımov pen Galına Lazarevaǵa buıyrdy.
– Áleýmettik máni úlken bastamanyń qala tazalyǵy úshin ǵana emes, turǵyndardyń sanasyna da áseri aıtarlyqtaı. Eń basty maqsatymyz – qalamyzdy tazalyqqa bólep otyrǵan jandarǵa saltanatty túrde qurmet kórsetý. Jeńimpazdar belgili mólsherde aqshalaı syılyqqa ǵana ıe bolyp qoımaıdy. Olardyń árqaısysyna birneshe jalaqy kóleminde taǵy da qosymsha qarjylyq kómek kórsetý saltymyz. Osy arqyly bizder qurmetimizdi taǵy da ústemelep otyramyz, – deıdi Shyńǵys Qaskeev.
Qysqasy, «Úzdik aýla tazalaýshy 2018» baıqaýyna bıyl 200-ge tarta aýla tazalaýshy qatysqan. Úsh kezeńnen turatyn baıqaýda 70 myńdaı turǵyn daýys bergen. Úshinshi kezeńde tazalyqshylary eń kóp daýys jınaǵan 30 aýlany uıymdastyrýshylar syrttaı tekserip ketedi.
Sol sııaqty «Aýdannyń úzdik aýla tazalaýshylary» da anyqtalyp, syı-qurmetke bólendi.
Aınash ESALI,
«Egemen Qazaqstan»
ALMATY