Mektep ashanalaryn jańǵyrtyp, balalardyń durys tamaqtanýyn qamtamasyz etý «Nur Otan» partııasynyń jańǵyrý aıasyndaǵy jańa jobalarynyń biri ekeni belgili. Osyǵan oraı elimiz boıynsha aýqymdy jumystar qolǵa alyndy.
«Nur Otan» partııasynyń Ortalyq apparatynda partııa Tóraǵasynyń birinshi orynbasary Máýlen Áshimbaevtyń tóraǵalyǵymen ótken jıynda osy bastamanyń júzege asyrylý barysy keńinen talqylandy. Basqosýǵa Densaýlyq saqtaý mınıstrligi, Bilim jáne ǵylym mınıstrligi, «Atameken» UKP jáne bıznes-qaýymdastyq ókilderi men Astana qalasy ata-analar qoǵamdyq keńesiniń músheleri qatysty.
«Nur Otan» partııasy otandyq mektepterde balalardy durys tamaqtandyrý máselesin burynnan kóterip keledi. Sebebi ókinishke qaraı, keıbir bilim oshaqtarynda as máziri kóńil qýantarlyqtaı deńgeıde emes. О́ıtkeni atalǵan oryndarda kóbine un ónimderi men quramynda qanty kóp túrli táttiler usynylyp, jemis-jıdek pen kókónisterge tıisti deńgeıde mán berilmeı keledi. Bul jaıttyń ata-analar, úkimettik emes uıymdar jáne qoǵam belsendileri tarapynan, sondaı-aq aqparat quraldary men áleýmettik jelilerde jıi kóterilip júrgeni de belgili.
Otyrysty ashqan Máýlen Áshimbaev atalǵan máselelerge nazar aýdaryp, onyń salamatty ult bolyp qalyptasýǵa tikeleı áser etetinin aıtty. – Partııa osy saladaǵy birqatar ózekti máselelerdi anyqtady. Aldymen bir tıpti ónimderden bas tartyp, mektep ashanasynyń rasıonyn túrlendirýge mán bergenimiz abzal. Bul rette Densaýlyq saqtaý mınıstrliginiń Qazaq taǵamtaný akademııasymen birlesip daıyndaǵan standartyna beıjaı qaramaı, onyń oryndalýyn qadaǵalaýdyń mańyzy zor. Sondaı-aq sanıtarlyq normalar men bilim berý mekemelerindegi erejelerdiń saqtalýynyń júıeli baqylanbaýy da bul salaǵa keri áserin tıgizip otyr. Sondyqtan tıisti memlekettik organnyń jylyna birneshe tekserý júrgizýin, sol arqyly ashanalardyń barlyq kezde joǵary deńgeıde jumys isteýin qamtamasyz etýdiń bereri mol, – dedi Máýlen Áshimbaev.
Sonymen qatar partııa Tóraǵasynyń birinshi orynbasary brakerajdy komıssııanyń jumysyna da eshkim kedergi keltirmeýi kerektigin aıtyp, qazirgi tańda munyń ózekti máselelerdiń biri bolyp otyrǵanyn tilge tıek etti. Atalǵan komıssııa, memlekettik organdar, saıası partııalar jáne qoǵamdyq uıymdar arasynda úılesimdi jumystyń bolmaýy da atalǵan máselege óz zardabyn tıgizýde. Odan bólek, jıynda taýardy jetkizýshiler tarapynan da kemshilikterdiń bar ekeni aıtyldy.
Sondaı-aq M.Áshimbaev elimizdiń bes birdeı, ıaǵnı Túrkistan, Almaty, Jambyl, Qostanaı jáne Qaraǵandy oblystarynda ashanasy nemese býfeti joq mektepterdiń bar ekenin, sonyń saldarynan balalardyń durys tamaqtanýyna jaǵdaı jasalmaı otyrǵanyn aıtty. Búginde elimizde osyndaı 538 mekteptiń bar ekeni belgili bolyp otyr.
Atalǵan olqylyqtardyń saldarynan elimizde mektep jasyndaǵy balalarda as qorytý júıesine qatysty aýrýlar kóbeıgen. Odan bólek, 14 jasqa deıingi jasóspirimderdiń 21,5 prosenti, ıaǵnı árbir besinshi jetkinshek artyq salmaqtyń zardabyn tartyp otyr. Al artyq salmaqtyń túrli aýrýlarǵa ákelip soqtyratyny belgili. Osy máselelerdiń aldyn alyp, olardy utymdy sheshý úshin «Nur Otan» partııasy mektep ashanalaryn jańǵyrtý jóninde jańa jobany qolǵa alǵany belgili. Partııa Tóraǵasy birinshi orynbasarynyń aıtýynsha, nurotandyqtar atalǵan jobany tıimdi júzege asyrý úshin naqty tórt baǵytty aıqyndap alǵan.
– Birinshiden, mektep ashanalarynda ǵylymı negizge súıengen jáne paıdaly ári dámdi taǵam túrleri usynylǵan tamaqtanýdyń biryńǵaı standartyn engizý qajet. Ekinshiden, tamaqtaný úderisin uıymdastyrýda memleket-jekemenshik áriptestiginiń, tamaqtaný kombınattarynyń jáne jeke kásipkerlerdiń bastamalaryn eskerip, eń tıimdisin respýblıkalyq deńgeıde júzege asyrǵanymyz jón. Úshinshiden, tamaqtaný standartynyń júzege asyrylýyna qoǵamdyq baqylaý júrgizý máselesi. Bul jumysqa ata-analar, úkimettik emes uıymdar, saıası partııalar belsendi qatyssa, naqty júıe qalyptasar edi. Sol arqyly brakerajdy komıssııalar jumysynyń jandanýyn da qamtamasyz etýge bolady. Taǵy bir másele – buqaralyq aqparat quraldarymen, sarapshylarmen, qoǵam belsendilerimen birlesip, oqýshylar men ata-analar arasynda, jalpy qoǵamda durys tamaqtaný mádenıetin qalyptastyrý. Osy baǵyttar boıynsha birlesip jumys istesek, kózdegen nátıjege qol jetkizip, balalarymyzdyń deni saý urpaq bolyp qalyptasýyn qamtamasyz etemiz dep senemin. Bul iste partııa úılestirýshi mindetin atqarýǵa daıyn, – dedi M.Áshimbaev.
Osy rette qazirdiń ózinde partııalyq joba aıasynda kóptegen mektepterdiń ashanasy jańa qarqynmen iske kirisip, álemdik talaptarǵa saı qyzmet kórsetýdi qolǵa alǵanyn atap ótken jón. Sonyń ishinde Astana qalasyndaǵy №85 mektep-lıseıdi erekshe aıtýǵa bolady. Bul bilim uıasynyń ashanasy oqýshylarǵa sapaly ári densaýlyqqa paıdaly as mázirin usyný úshin tamaqty býmen daıyndaıtyn arnaıy qurylǵy (parokonvektomat) arqyly pisiredi.
Aıta keteıik, jıyn barysynda Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın, Bilim jáne ǵylym mınıstrligi Balalar quqyǵyn qorǵaý jónindegi komıtet tóraǵasynyń orynbasary Erjan Ersaıynov jáne taǵy basqa qatysýshylar pikir bildirip, máseleni tıimdi sheshýge baǵyttalǵan usynystarymen bólisti.
Venera TÚGELBAI,
«Egemen Qazaqstan»