Aqmola oblysynda Ortalyq Azııada teńdesi joq Makınsk qus fabrıkasynyń saltanatty ashylýy bolyp ótti.
Bulandy aýdanynda jylyna 25 000 tonna qus etin óndiretin fabrıkanyń birinshi kezeńi iske qosyldy. Quny 45,6 mıllıard teńgeni quraıtyn jobanyń qatysýshylary qazaqstandyq jáne sheteldik ınvestorlar, atap aıtqanda Aitas KZ holdıngi, Eýropa Qaıta qurý jáne damý banki, «Vaiterek Venture Fund» AQ jáne «Qazaqstan damý banki» AQ-tyń kredıttik jelisi.
Fabrıkanyń birinshi kezeńi toǵyz óndiristik alańdy qamtıdy. Olar árqaısysynda on eki qus qorasy bar tórt broılerlik ınkýbator, qus etin óńdeý zaýyty, qaldyqtardy qordalandyrý jelisi, qosalqy alań, jemshóp óńdeý sehy. Búgin fabrıka ashylyp, ınkýbatordyń qaqpaǵy jabyldy. Alǵashqy 300 000 jumyrtqa salyndy. Fabrıkanyń birinshi kezegindegi qalǵan alańdar bıylǵy jyldyń sońyna deıin iske qosylatyn bolady. Ekinshi kezeńin iske qosý 2020 jyldyń ekinshi jartysyna mejelenip otyr.
– Makınsk qus fabrıkasy taýyq etin óndirý kólemi boıynsha Ortalyq Azııa óńirinde eń iri kásiporyndardyń biri bolmaq, – dedi oblys ákimi Málik Myrzalın. Bul shara eń aldymen Astana qalasynyń saýda sórelerin sapaly qus etimen jáne jumyrtqamen qamtýǵa múmkindik beredi. Ári Makınsk qalasyndaǵy jumyssyzdyqty joıýǵa da áseri bolmaq. Biz óz tarapymyzdan barlyq qoldaýdy kórsetip jatyrmyz.
Oblys ákimi ımporttyq azyq-túlik taýarlaryn yǵystyryp, otandyq ónim mólsherin kóbeıtýge fabrıka tıgizer septigin naqty taldap, qolmen qoıǵandaı etip aıtyp berdi. Fabrıka shyǵaratyn negizgi ónim – tońazytylǵan broıler eti. Ekinshi kezekti iske qosqannan keıin kásiporynnyń qýaty qus etine degen ishki naryqtyń qajettiligin 15 prosentke deıin qanaǵattandyrýǵa múmkindik beredi. Sóz arasynda 2017 jyly eldegi qus etin tutyný 341 000 tonnany quraǵandyǵyn aıta ketken lázim. Jańa fabrıka óz kezeginde ımport úlesin qazirgi 50,4 prosentten 32,6 prosentke deıin azaıtýǵa múmkindik beredi.
– Makınsk qus fabrıkasy – álemdik qus sharýashylyǵynyń ozat úlgisi. Eń úzdik jabdyq, eń úzdik tájirıbe osynda, – dedi Aitas KZ kompanııasynyń bas dırektory jáne quryltaıshysy Serik Tolyqpaev.
Sonymen qatar ol strategııalyq josparda 2023 jyly qýat jylyna 100 000
tonna qus etin óndiretin Makınsk qus fabrıkasynyń III kezeńin iske qosý kózdelgenin atap ótti. Bul maqsatta qosymsha 100 mıllıon dollar ınvestısııa salynady. Orta merzimdi perspektıvada kompanııa IPO-ǵa shyǵý múmkindigin qarastyryp otyr. Makınsk qus fabrıkasy Aqmola, Soltústik Qazaqstan, Qostanaı jáne Qaraǵandy oblystarynyń naryqtaryna baǵdarlanǵan. Eń aldymen, Astana jáne Qaraǵandy qalalaryna munda óndiriletin taýyq etin 60%-ke deıin ótkizý josparlanǵan.
Qus fabrıkasynyń aýmaǵynda ornalasatyn barlyq ǵımarattardyń jalpy aýdany 227 366,88 sharshy metrdi quraıtyn bolady. Kásiporynda bıoqaýipsizdik pen óndiristiń ekologııa talaptaryn saqtaý maqsatynda ınkýbasııalyq óndiris, qus soıý jáne et-súıek unyn óndirý kezeńderinde joǵary tehnologııalyq energııa únemdeıtin jabdyqtar paıdalanylady. «Aitas KZ» AQ – vertıkaldy-ıntegrasııalanǵan holdıng, óz quramynda ósimdik sharýashylyǵy, qus sharýashylyǵy jáne et óńdeý salasyndaǵy kásiporyndardy biriktiredi. Holdıng quramyna 11 kompanııa kiredi, onyń ishinde jylyna 25 000 myń tonna broıler etin óndiretin jáne qaıta óńdeıtin zamanaýı kásiporyn – О́skemen qus fabrıkasy men Makınsk qus fabrıkasy bar. Sońǵysynyń qýaty 2020 jyly jylyna 50 myń tonna et óndirýge deıin artýǵa tıis.
Baıqal BAIÁDIL,
«Egemen Qazaqstan»
Aqmola oblysy,
Bulandy aýdany