Áýlıekól aýdanynyń ortalyǵynda qyzmet ústinde erlikpen qaza tapqan polıseı Medet Dosymhanov atyndaǵy balalar sport alańy saltanatty túrde ashyldy. Sonymen qatar selodaǵy kóshe men qaqpaǵa Medet Dosymhanovtyń aty berildi.
2009 jyly óziniń qyzmettik boryshyn atqarý ústinde Medet Baýyrjanuly erlikpen qaza tapqan edi. Ol Taran aýdandyq ishki ister bólimindegi qylmystyq polısııa bólimshesin basqarǵan bolatyn. Basqa aýdanda qyzmet etse de ony óziniń týǵan jeri Áýlıekól aýdanynyń turǵyndary umytpaı, rýhyn qasterledi. Saltanatty shara Qylmystyq izdestirý qyzmetiniń 100 jyldyǵy qarsańynda ótti. Oǵan oblystyń barlyq shalǵaıynan Medet Baýyrjanulynyń qyzmettesteri, áriptesteri, aýdan basshylary, týystary keldi.
Ofıserdiń esimin máńgi este qaldyrý isine onyń áriptesteri belsene kiristi. Medet Dosymhanov atyndaǵy balalar sport alańy polıseıler jınaǵan qarjyǵa salyndy.
«Medet Dosymhanov atyndaǵy balalar sport alańynyń, kósheniń, qaqpanyń ashylýy óziniń qyzmettik boryshyn adal atqarǵan, Otanyna adal qyzmet etken, oǵan bergen antyn saqtaǵan polısııa ofıserine, onyń rýhyna degen qurmet. Qostanaı oblysynda qyzmette naǵyz erliktiń úlgisin kórsetken polıseıler az emes. Medet Dosymhanov solardyń biri jáne biregeıi bolatyn. Ol qaza tapqannan keıin II dárejeli «Aıbyn» ordenimen marapattaldy» dedi oblystyq ishki ister departamenti bastyǵynyń orynbasary, polkovnık Mereke Alshaǵyrov.
Sondaı-aq jınalǵandar aldynda Áýlıekól aýdanynyń qurmetti azamaty Saqtaǵan Dosmaǵambetov, Medet Dosymhanovtyń týysy Ibragım Aǵytaı onyń erligi jáne búgingi sharanyń tárbıelik máni týraly aıtty, aqyn Abaı Qajıev Medettiń erligi týraly óleńin oqydy. Erlikpen qaza tapqan Medettiń ákesi Baýyrjan Dosmaǵambetov jáne atasy men ájeleri ulynyń rýhyna kórsetilgen qurmetke alǵys aıtty.
Názıra JÁRIMBET,
«Egemen Qazaqstan»
Qostanaı oblysy,
Áýlıekól aýdany