Jańaózen: Ahýal da, jumys yrǵaǵy da qalypqa kele bastady

Eldi eleńdetip otyrǵan Jańaózen qalasy turǵyn­dary­nyń jaǵdaıy bir qalypqa túsip keledi. Oǵan Mańǵystaýǵa jumys saparymen arnaıy kelip oryn alǵan keleńsizdikterdi óz kózimen kórip, halyqpen áńgimelesip eldi sabyrǵa, birlikke shaqyrǵan El­basynyń naqty tapsyrmalary óz jemisin bere bastady deýge bola­dy. Bul rette О́.Shókeev basqar­ǵan Úkimettik komıssııanyń Ja­ńa­ózenniń ǵana emes, aımaq adam­darynyń kóńil-kúılerin bilýi, ótinish-talaptaryna oraı «Qara­jan­bas» ken ornyna baryp ju­mys­shylarymen kezdesýi, Aqtaýǵa kelip jumystan bosap qalǵan munaıshylarmen ashyq áńgime­le­sý­leri barysynda árbir adamnyń aryzy muqııat tekserilip, ádiletti sheshim alatyndyǵy aıtyldy. Ja­ńaózendegi jurtshylyqpen júz­desýdegi ob­lys basshysy B.Muha­met­ja­nov­tyń janashyrlyqpen jetkizgen azamattyq sózderi ha­lyqty  birlikke, túsinistikke, sa­byr­ǵa sha­qyra tústi. Sondaı-aq, Elba­sy­nyń tapsyrmasymen 22 jeltoq­san kúni Jańaózen qa­lasyndaǵy oqıǵalarǵa baılanys­ty azamat­tar­dyń talap-tilekterin qabyl­dap, saraptaıtyn táýelsiz qo­ǵamdyq komıssııa quryldy. Onyń tóraǵalyǵyna belgili qoǵam qaı­ratkeri, oblys ákimi janyndaǵy ardagerler keńesiniń tóraǵasy О́.Ozǵanbaev bekitildi. Bul komıssııa bir apta ishinde túıtkildi degen biraz máseleniń anyq-qanyǵyna úńildi. Atap aıtsaq, tártipsizdikke oraı ustalǵandar jábir kóredi nemese jaısyz oryndarǵa ornalasty, as-sý tapshy eken degen sııaqty alyp-qashpa sózderge oraı komıssııa músheleri ýaqytsha ustaý oryn­darynda boldy. Qamaýda otyr­ǵandarmen kezdesti. Onyń bári de arandatýshy sózder ekendigine kóz jetkizdi. Balalary, aǵaı­yn-tý­ma­lary iz-tússiz ketti,  degen  áńgi­meler de bos sóz bol­dy. Onyń bári halyqqa teledıdar ar­qy­ly kór­setildi, aıtyldy. Atal­mysh komıssııa bul kúnderi ob­lys­ta jumys jasaýdaǵy bas proký­ra­týra­nyń ter­geý tobynyń bas­shy­sy­men Ja­ńa­ózen qalasy­nyń komenda­ty­men jıi kezdesip, birlese jumys isteýde,  deıdi О́mirzaq О́zǵanbaev. Úkimettik komıssııa múshe­lerine túsken mańyzdy saýal qaıǵyly oqıǵa kezinde qyrýar shyǵynǵa ushyraǵandarǵa qandaı kómek bolady degen másele edi. Komıssııa tóraǵasy О́.Shókeev árbir jeke tulǵa, kásipkerdiń shek­ken zııany anyq eseptelip, anyqtalsa bankter jeńildetilgen nesıeler berýdi qolǵa alatyn­dyǵyn aıtqan. Osy aptada Halyq bankiniń sol ýájge baılanysty jeke tulǵalarmen jumysty bas­taýǵa ázir ekendikteri belgili boldy. Sondaı-aq, ótken maqa­lamyzda qaza bolǵandardyń otba­syna 1 mıllıon, aýyr jaraqat alǵandarǵa 500 myń teńge kóleminde kómek beriletindigin aıtqanbyz. Ol kómek qoǵamdyq qor esebinen ekendigi aıtylǵan. Ol qorǵa iri kásiporyndarmen qatar jeke azamattar da qarjy aýdarýda ekendigin aıtqymyz keledi. Onyń rekvızıtteri: «Demeý» jeke qory, RNN 430100272091, AO «Narodnyı Bank Kazahstana» BIK HSBKKZKX, BIN 100340008680, Kbe 18 №KZ 11601023100052615 Úkimettik komıssııa jumystan shyǵarylǵan munaıshylarmen kezdesýler kezinde oblysta eki ká­siporyn 2012 jyldyń 15 qańta­ryna deıin qurylatyndyǵyn habarlap, aryzdardy qabyldaý qań­tardyń sońyna deıin ǵana júrgiziletindigin qaperge berdi. Soǵan oraı ol jerlerge aryz berýshiler sany óskeni baıqalady. Qazirgi ýaqytta «Qarajanbas­munaı» AQ-qa jáne «О́zenmunaı­gaz» óndiristik fılıalyna ju­mysqa ornalastyrý jóninde 400-den astam adam ótinish bildiripti. Bul aldyńǵy kúnderden úsh ese kóp. Sondaı-aq, qaladaǵy búlin­gen nysandardy qalpyna keltirýge jumys jasaýǵa tilek bildirýshiler qatary da aldyńǵy kún­derdegiden 1,5 ese kóbeıip otyr­ǵany belgili boldy. «О́zen­mu­naı­gaz» óndiristik fılıalynyń ujymy túgeldeı jumysqa shyqty. Munyń bári Jańaózen oń ózgeristerge bet aldy degen sóz. Qala komendanty shtabynyń málimeti boıynsha sońǵy táýlikte tótenshe jaǵdaı tártibin buzý, qylmys jasaý faktileri tirkelmepti. Qalada halyq tutynatyn taýarlar molaıa túsken. Azyq-túlik baǵasy da bir deńgeıde, qoǵamdyq kólik pen qalaaralyq baılanysta irkilis baıqalmaıdy.

Jolaman BOShALAQ.

Mańǵystaý oblysy.