“SYR – ALAShTYŃ ANASY”

Parlament depýtattary toqsan saıyn zań shyǵarýshylyq jumystan bir sátke qol úzip, aımaqtarǵa shyǵyp turady. Bul joly bizdiń jolymyz Syrdyń eli, jyrdyń eli – Qyzylorda oblysyna tústi. Maqsatymyz – Elbasymyz N.Á.Nazarbaevtyń “Jańa onjyldyq – jańa ekonomıkalyq órleý – Qazaqstannyń jańa múmkindikteri” dep atalatyn Joldaýyn halyqqa jetkizý. Jańa Joldaýmen tanysqan ár adam onda kóterilip otyrǵan máse­lelerdiń tereńdigine, kúrdeliligine, taıaýdaǵy on jylda sheshimin taba­tyn isterdiń aýqymdylyǵyna kóz jetkizedi. Bul – shyn máninde teń­desi joq tarıhı qujat. О́ıtkeni, Prezıdentimiz usynǵan “Qazaqstan – 2030” baǵdarlamasyna biz belimiz bekip, buǵanamyz qatpaǵan shaǵy­myz­da, qıyndyqtar aıaqtan shalyp, etekten tartyp jatqan kezde ki­ris­sek, qazir Qazaqstan – búkil álemge tanylǵan, ekonomıkasy serpindi damyp kele jatqan irgeli memleket. Osylaı táýelsizdik jyldary biz ǵa­syrǵa para-par joldan ótip, bas­qa­lar qyzyǵa qaraıtyn bıikke kóte­ril­dik. Sonyń bir jarqyn kórinisi – Qazaq eli ústimizdegi jyldyń bi­rinshi qańtarynan bastap Kári qur­lyqtyń tórine týyn tigip, Eýropa­daǵy qaýipsizdik jáne yntymaq­tas­tyqtyń uıymyna tóraǵalyq etýde. Bul – bizdiń elimizge, halqymyzǵa kórse­til­gen zor senim, keremet qurmet, elin, halqyn qıyndyqtarǵa uryn­dyrmaı, búgingi tabystarǵa alyp kelgen Prezıdent N.Á.Nazar­baev­tyń eńbegi men erligine halyq­ara­lyq qaýymdastyqtyń bergen joǵary baǵasy. Prezıdent óziniń Joldaýynda halyqty qol jetken tabystardy baıandy etýge, jańa bıikterden kóri­ný jolynda bilek biriktirýge sha­qyryp otyr. Ol úshin árqaısymyz Joldaýmen yqylas qoıa tanysýy­myz, qolǵa qalam alyp, ár sózdiń astyn syzyp otyryp oqýymyz, sol sózdiń astarynda qandaı oı, qandaı is-jospar jatqanyna kóz jetkizýi­miz, bir sózben aıtqanda, Joldaýdy júregimizden ótkizýimiz, ony júzege asyrý qoǵamnyń ár múshesiniń qa­sıetti boryshy ekenin kóńilge túıýi­miz kerek. О́ıtkeni, bul Joldaýda besiktegi baladan eńkeıgen kárige deıingi qoǵamnyń barlyq múshe­leri­niń múddeleri qarastyrylǵan. Qýanyshtysy sol, qyzylor­da­lyq­tar Joldaýdan týyndaıtyn min­detterdi talqylaýǵa qyzý kirisip ketipti. Bul oraıda, ásirese, “Nur Otan” halyqtyq-demokratııalyq par­tııasy músheleriniń, ár deńgeı­degi máslıhattar depýtattarynyń belsendilik tanytyp otyrǵany aı­qyn ańǵarylady. Biz, Májilis de­pýtattary – S.Áıimbetov, J.Asa­nov jáne osy joldardyń avto­ry, darııany boılaı qonystanǵan qalyń eldi aralaı júrip, osyǵan kóz jetkizdik. Aq marjannyń otany – Syr eline tuńǵysh ret taban tiregen men úshin bári tańsyq, bári qyzyq. Eń bastysy – halyqtyń depýtattar­men kezdesýge kóp jınalatyny, jas­tardyń da, aqsaqaldy qarııa­lar­dyń da qatarlarynyń qalyńdyǵy tańqaldyrdy. Halyqtyń qabaǵy ashyq, júzi jyly, janary otty. Onyń da ózindik sebebi bar eken, bú­kil elimiz sııaqty, Qyzylorda ob­lysy da sońǵy jyldary serpindi damyp, tabys arnasyn keńeıte túsipti. Oblys ákimi aqpannyń 10-y kúni ótken óziniń turǵyndar al­dyn­daǵy esepti kezdesýinde atap kór­setkenindeı, 2009 jyldyń ózinde ulan-ǵaıyr ister tyndyryl­ǵan. Onyń ishinde “Jol kartasy” baǵdarlamasynyń bul óńirge ákel­gen ıgiligi mol eken. Keı sátterge toqtala ketsek, respýblıkalyq jáne jergilikti bıýdjetterden osy maqsatqa 8,4 mıllıard teńge qarjy bólinip, 231 ınvestısııalyq joba júzege asyrylypty, 11 myńǵa jý­yq jańa jumys oryndary ashy­lyp­ty, 3 myńnan astam turǵyn áleýmettik ju­mystarǵa tartylyp, 4 myńnan astam adam qaı­ta daıarlyqtan ótipti. О́nerkásip – Qyzylorda oblysynda negizgi sala bolyp sa­na­lady eken, óndiris kó­le­mi aıtarlyqtaı ul­ǵaıyp, bir myńǵa jýyq adam jumys isteıtin 9 kásip­oryn iske qosy­lyp­ty, 587 mıllıard teńgeniń ónimi óndiri­lip­ti. Elba­synyń qol­daýymen qolǵa alynǵan oblys ortalyǵynyń jylý qýaty kózderin jáne turǵyn úı sektoryn ilespe gazǵa kóshirý jo­basyn júzege asyrý ba­rysynda jeke turǵyn­dar úshin kógildir otyn­dy qosý baǵasy buryn­ǵydan 2,5-3 ese arzan­daǵan. Aýyl sharýashylyǵy eńbekker­leri­niń tabysy da tolymdy: bar­lyǵy 33 mıllıard teńgeniń ónimi óndirilgen, kúrishtiń ár gektarynan 42,9 sentnerden ónim alynǵan, 2008 jylmen salystyrǵanda asyl tuqymdy iri qara 39 paıyzǵa, qoı – 12,7, jylqy – 45,9, túıe 3,8 paıyzǵa kóbeıipti. Oblysta qurylystyń keń qanat jaıýy qýanarlyq qubylys eken, aýylda da, qalada da áleýmettik ny­san­dar, turǵyn úıler kóptep sa­ly­nýda. Syrdarııa aýdanyna qarasty Amangeldi, Jetikól, Aıdarly aýyl­darynda bolǵanymyzda kezdesýge qatysýshylar osy jaılardy maq­ta­nysh­pen aıtty. Mundaı jetis­tik­terge biz de shyn kóńilden qýandyq. О́ıtkeni, aýylda turǵyn úı, mektep, balabaqsha, basqa da áleýmettik nysandar salý halyqtyń bolashaqqa degen seniminiń, óńirdiń áleýmettik-ekonomıkalyq áleýetiniń zor eke­nin ańǵartady. Halyqpen kezdesý úshin osyndaı bir nysannyń – Jalaǵash kentindegi orta mekteptiń tabaldyryǵynan attadyq. О́tken jyly iske qosylǵan, 1200 oqýshyǵa arnalǵan bul mektep joǵary oqý ornyna bergisiz: neshe túrli kompıýterlik synyptar, úsh sport zaly, kitaphanasy, ashanasy – oqýshylar úshin de, ustazdar úshin de ne qajettiń bári bar. Shyntýaıtyna kelsek, bul mektepte oqyǵan da armanda, oqymaǵan da armanda. Jekeshelendirýden keıin ju­mys­syz qalǵan aýyldardaǵy qıyn jaǵdaı týraly az aıtylyp júrgen joq. Kóp óńirler tyǵyryqqa tire­lip, amaly taýsylǵandar aýdan orta­lyqtaryna, qalalarǵa kóship ketti. Onda da shekeleriniń shylqyp jatqandary shamaly. Tur­ǵyn­dar­dyń ózderiniń aıtýlaryna qara­ǵan­da, munda da ondaı kórinis baı­qal­ǵan. Biraq, údere kóship, jurtyn tas­tap ketken aýyl joq. Aýyldyq­tar­dyń kópshiligi malmen kún kórip otyrǵan kórinedi. Basy artyq ónim­derin satyp, edáýir aýqattanyp al­ǵan­dar da bar. “Qoly qımyldaǵan­nyń aýyzy qımyldaıdy”, olardyń jaǵdaıy jaman emes. О́kinishke qaraı, osyndaı umtylysty, ıgilikti kózine ilgisi kelmeıtinder de kez­desti. Baıqońyrdyń dál irgesindegi bir aýylda bolǵanymyzda jergilikti turǵynnan “Mal us­taısyz ba?” dep sura­ǵan edik. “Qotyr la­ǵym da joq”, degen orta jastaǵy jigit aǵa­sy neshe túrli syl­taý­lardy jaýdyra jónel­di. Aýylda turyp mal us­tamaý meniń aqy­ly­ma qona qoımady. “Qa­ladaǵy sııaqty, bárin satyp ala­myz”, deıdi. Oǵan aqsha shaq kele me?! Osy turǵydan alǵanda Qar­maq­shy aýdanynyń Aqaı aýylyndaǵy jaǵdaı birshama jaqsy eken. Keshegi keńes zamanynda júz shaqty úıi, myńnan sál asatyn halqy bolǵan aýylda qazir 4 myńnan astam jan turyp jatyr. – Bizdiń aýylǵa halyq basqa aı­maqtardan da kóship kelýde. О́ıt­ke­ni, olarǵa qolymyzdan kelgenshe jaǵ­daı jasap jatyr­myz, – dedi aýyl­dyq okrýgtiń ákimi Raıhan Baı­shoraeva. – Aqaıda 2 balabaqsha, orta mektep, feldsherlik-akýsher­lik pýnkt, klýb, kitaphana, poshta, baılanys pýnkti, notarıaldyq keńse, 3 naýbaıhana, kondıter, ti­gin, aǵash óńdeý sehtary, shashtaraz, tis emdeý kabıneti, 2 dámhana, birneshe dúken bar. Árıne, mundaı qalypty tirshi­ligi bar aýyldardan eshkim eshqaıda kóshpeıdi. Qynjylarlyǵy, osyn­daı oń ózgerister oblystyń barlyq aýyldaryna tán deı almaımyz. Keı aýyldarda osydan on-on bes jyl buryn jekeshelendirilgen nysandar áli kúnge iske qosylmaǵan. Isker adam­dar tabylyp jatsa, sol esik-te­rezeleri ańǵal-sańǵal, qańyrap bos turǵan úılerdi dúkenge nemese shıkizat óńdeıtin sehtarǵa aınal­dyrýǵa bolatyny kózge uryp tur. “Buǵan endi qansha ýaqyt kerek?” – degen saýalyma eshkim tushymdy jaýap bere almady. Bul óńirdegi burynǵy keńshar, qazirgi aýyldardyń deni kúrish ósirýmen aınalysady eken. Kúrish ósirý ońaı sharýa emes. Al jeke adamdardyń onymen aınalysýy tipti qıyn. Osyny túsingen usaq sharýa qojalyqtarynyń aldy birige bastapty. – Onyń nátıjesi de jaman bolyp otyrǵan joq, bizdiń aýdanda kúrishtik alqaptyń kólemi on myń gektardan asty, ótken jyly oblys boıynsha birinshi oryn aldyq, – dedi Qarmaqshy aýdanynyń ákimi Bıǵalı Qaıýpov. Qarmaqshy aýdanynda budan da basqa tilge tıek bolarlyq jaqsy ister az emes eken. Máselen, aýdan­daǵy barlyq eldi mekenderde mek­tep, balabaqsha, mádenıet mekeme­le­ri, kitaphana bar, aýyz sý máselesi tolyq sheshilgen. Shaǵyn kásipker­lik te jaqsy damyp keledi. Osydan bes jyl buryn olardyń sany 1114 bolsa, qazir 1891-ge jetipti. – Elbasy óziniń Joldaýynda shaǵyn jáne orta bıznestiń jańa to­byn damytý esebinen turaqty ju­mys oryndaryn ashý mindetin qoı­yp otyr. Osyǵan oraı biz turǵyn­dar arasynda túsinik jumystaryn júrgizip, “Bıznestiń jol kartasy – 2020” baǵdarlamasynyń múmkindik­terin tolyq paıdalanýymyz kerek, – deıdi aýdan basshysy. Joldaýda elimizdiń quqyq qor­ǵaý júıesin reformalaý boıynsha baıypty jumys júrgizý mindeti qoıylǵany belgili. Prezıdent atap kórsetkenindeı, el halqy tıimsiz basqarýdan, quqyq qorǵaý organ­da­ry fýnksııalaryndaǵy janjaldan, tıisti kadrlyq jumystyń bolmaýy­nan, sondaı-aq el quqyq qorǵaý júıe­si qyzmetinde móldirlik pen baqylaýdyń joqtyǵynan týyndaǵan problemalardy anyq kórip otyr. “Biz Prezıdentimizdiń quqyq qorǵaý júıesin ońtaılandyryp, árbir memlekettik organnyń naqty quzy­retin túzý, zańdarymyzdy izgilen­di­rý, sapasyn arttyrý týraly aıtqan oı-pikirlerin qoldaımyz jáne ony júzege asyrýǵa ózimiz de belsene qatysatyn bolamyz”, – dedi oblys­tyq ishki ister departamentinde segiz júz qyzmetkerdiń qatysýymen ótken kezdesýge qatysýshylar. Osy kezdesýdi ótkizýge tikeleı uıytqy bolǵan, keıin birneshe aýdanǵa birge shyǵyp, Prezıdent Jol­daýyn tal­qylaýdy uıymdastyrǵan oblystyq ishki ister departamenti bastyǵynyń orynbasary Bekbaı Raıymbekov ózin, ásirese, qamaý oryndarynan bo­saǵandardy ońaltý, jumyspen qam­tamasyz etý, qatarǵa qosý máse­lesiniń qatty alańdatatynyn dát­te­gen. “Pre­zıdent halyqaralyq standarttarǵa sáıkes keletin jańa quqyq qorǵaý júıesin qurýdy talap etip otyr. О́te oryndy talap”, – deıdi Bekeń. Tereńózektegi kezdesýden keıin ile oblystyń shalǵaı túkpirindegi Aral aýdanyna attanyp ketken Bekbaı Tasbolatulymen arada bir kún ótkennen keıin Jalaǵashta qaıta kezdestik. Osylaı Elbasynyń Joldaýyn ár qyzmetkerge jetkiz­sem degen tilekpen jarǵaq qulaǵy jastyqqa tımeı júrgen polısııa polkovnıgi B.T.Raıymbekovke qatty rıza boldym. Basshylardyń bári osyndaı bolsa ǵoı degen oı da sol sátte qylań bergen edi. Osyndaı jaqsy lebizdi Qorqyt ata atyndaǵy Qyzylorda memleket­tik ýnıversıtetiniń basshylary men ustazdaryna da arnaǵym keledi. Munda biz ýnıversıtet oqytýshy­lary­men, stýdenttermen kezdestik. Jınalǵandar Elbasynyń taıaýdaǵy on jylda bilim salasyn damytýǵa qatysty aıtqan oı-tujyrymdaryn qyzý qoldaıtyndyqtaryn bildirdi. “Joǵary bilim sapasy eń joǵary halyqaralyq talaptarǵa jaýap berýi tıis”, degen Elbasynyń sózi bizge de, bilim qýǵan jastarǵa da kóp mindetter júkteıdi”, – dedi ustazdar. Aıtsa aıtqandaı, táýelsizdik jyl­dary elimizde bul oraıda qy­rýar jumystar atqaryldy. Joǵary oqý oryndarynyń materıaldyq-tehnıkalyq bazasy nyǵaıdy. Biraq, osyndaı oń múmkindikterdi jastar­dyń bári birdeı paıdalanyp otyr­ǵan joq. Stýdentterdiń arasynda “erinshek beker mal shashpaq” dep uly Abaı aıtqandaı, bilimge qush­tarlyq tanytpaıtyn, izdenbeıtin, oıyn-saýyq qýyp júrgen jastar da az emes. Joldaý osy máselelerdi de udaıy nazarda ustap el bolashaǵy – jastar tárbıesin barynsha jaq­sartýdy talap etedi. Elbasynyń Joldaýynda qoǵam músheleriniń jeke jaýapkershiligi týraly da jan-jaqty aıtyldy. “...ekonomıkalyq órleý – ár­qaı­symyzǵa qatysty búkilhalyqtyq is. Bul – qoǵamnyń áleýmettik máse­lelerin sheshýdiń jáne barshamyzdy tabysqa bastaýdyń kilti”. Osyny jurttyń bári kóńilge túıip, iske ju­mylsa, árıne, kóp másele ózi­nen-ózi sheshiler edi. Oblystyq me­dı­sına ortalyǵynan bir mysal kel­tire keteıin. Atalmysh aýrýhana – elimizdegi iri emdeý mekemeleriniń biri eken, maqtanarlyq ister de bar kórinedi: kóptegen osy zamanǵy jabdyqtar satyp alynǵan, júrekke ota osy jerdiń ózinde jasalady. Munyń bári, árıne, jaqsy. Alaıda, kóńilimizge kirbiń túsirgen jaılar da kezdesti. Aýrýhananyń ota jasaý bóliminde bolǵanymda, jalǵyz ózi bólmede qalyń kórpege oranyp alsa da, tisi-tisine tımeı qaltyrap otyr­ǵan keıýanany kórdim. Bólme­niń ishi sýyq, syrttan soqqan jel­den terezeniń perdesi qozǵalady. Eger, sol ýchaskege jaýapty adamdar qoıdyń jasyndaı ǵana ǵumyry qalǵan sol qarııaǵa sergek qarap, terezeni qymtasa, bolmasa qosymsha jylytqysh qoısa, árıne, syrqat jan sonshalyqty kúızelmes edi. A. Makarenko atyndaǵy mektep-ın­ter­natta da yzyp turǵan bólme­ler­di, kıimderi jupyny, júzderi sol­ǵyn balalardy kórgende kóńilim pás tartyp qaldy. Qazaq kónbis ha­lyq qoı, jaǵdaı suraı qalsaq, úlkeni bolsyn, kishisi bolsyn, “bári jaqsy”, deıdi. Sirá, bizge óz kem­shi­ligimizdi ózimiz kórý, túzeý jaǵy jet­peı jatyr ma, qalaı? Osy oıym­dy ashyq aıtqanymda keıbi­reý­ler renjip qalǵan syńaı tanyt­ty. Men olarǵa tabysqa toqmeıil­si­meý qajettigin, qol jetkendi baıan­dy ete otyryp, jańa bıikterge um­tylǵandardyń ozatynyn, Elbasy da óziniń jańa Joldaýynda barsha­myz­dy osyǵan shaqyryp otyrǵanyn aıttym. Osy saparymyzda ataǵy búkil álemge jaıylǵan jer kindigi – Baıqońyrǵa da soqtyq, qazir qala halqynyń sany 60 myńnan asypty, olardyń 37 myńy ózimizdiń qandas­ta­rymyz. Qalada 4 orta, 2 bas­taý­ysh qazaq mektebi bar eken. Olarda alty myńnan astam bala bilim alý­da. Áttegen-aı, degizerlik bir jaı, osy balalar áli kúnge deıin Reseı baǵ­darlamasy boıynsha oqytylýda. Nege ekenin kim bilsin, Reseı Fede­rasııasynyń Bilim jáne ǵy­lym mınıstrligi usynǵan orys tilindegi túpnusqany Qazaqstan Respýblıka­synyń Bilim jáne ǵylym mı­nıstrligi qazaq tiline aýdara salǵan. Qolyma túsken bastaýysh mekteptiń 2-synybyna arnalǵan “Bizdi qorshaǵan álem” dep atalatyn oqý­lyqty ári aqtaryp, beri aqtaryp qazaqqa, Qazaq eline qatysty bir aýyz sóz taba almadym. Almatydaǵy “Pro­sveshenıe – Qazaqstan” baspa­synan shyqqan kitap “Biz qaıda turamyz?”, “Tabıǵat”, “Qala jáne aýyl ómiri” degen úsh bólimnen turady. Iá, biz qaıda turamyz? Onyń jaýaby 6-bette berilipti. Bizdiń qa­sıetti mekenimiz – Reseı, asta­na­myz – Astana emes, Máskeý. Oqý­shy osy betten Reseı Federasııa­synyń eltańbasymen, jalaýymen, ánuranymen tanysady. Ári qaraı paraqtasańyz, Sereja men Nadıaǵa ilesip, Reseıdiń taý-tasyn aralap kete beresiz. Sonda qalaı, biz Baıqońyrmen birge Reseıge Ata Zańymyzben qorǵalatyn qazaqtyń ana tilinde bilim alý quqyǵyn da ustata salǵanymyz ba?!. Baıqońyrdan Qyzylordaǵa qaı­typ kele jatqanda biz úlken jol­dyń boıyndaǵy Qorqyt ata keshe­nine soqtyq. Jergilikti azamattar “tilek tileýińizge bolady”, dedi. Men qasıetti babamyzdan el-jurt­tyń, aǵaıyn-týǵannyń, bala-sha­ǵam­nyń amandyǵymen birge, Baıqo­ńyr­da turyp jatqan aǵaıyndardy úıirinen adastyrmaýyn, osyǵan jaýapty adamdardy aqylǵa shaqy­rý­yn suradym. Parlament depýtattary Qyzyl­orda oblysynda bolǵan kúnderi ha­lyqtyń barlyq toptaryn qamtydy desem, artyq aıtqandyq emes. Tas­bó­get kentinde ardagerlermen kez­destim. Kezinde sharýashylyqtyń ár salasynda qyzmet istegen asyl jan­dar Elbasynyń atyna nebir jyly-jyly lebizder arnady, jańa Joldaýdan týyndaıtyn mindetterge tereń boılap, oı tolǵady, álemde tarıhı qysqa merzimde osyndaı bıikterdi baǵyndyrǵan basqa el joq ekenin maqtanyshpen aıtty. “Bú­gin­gideı ǵajaıyp ómirdi qazaq halqy buryn-sońdy basynan keshken emes. Prezıdent N.Á.Nazarbaev kóre­gendikpen, kósemdikpen uly dalada óte qysqa merzimde buryn-sońdy bolmaǵan jańa memleket ornatty, memlekettiliktiń, el bas­qarýdyń ózindik jańa qazaqstandyq mektebin qalyp­tas­tyrdy, halqyn san ǵasyrlar armandaǵan muratyna jetkizdi, ózi de álem qaýymdastyǵy moı­yn­daǵan kemeńgerge aınaldy. Tarıhtyń da, taǵdyrdyń da sy­ny­­nan abyroımen ótip, osyn­shama ıgilikti jasap berip otyrǵan, ǵa­lamdyq quby­lysty, kezeńdik sil­kinisti elden buryn, alystan sezetin Qazaqstan basshysynyń daǵdarys­tan shyǵarý ádisterine, memleket qurýdaǵy tájirıbesine búginderi kóptegen irgeli elderdiń erekshe den qoıǵanyn biz maqtanysh etemiz. Bizdiń elimizde ardagerler qam­qorlyqtan tys qalyp jatqan joq. Uly Otan soǵysyndaǵy Jeńistiń 65 jyldyǵy qarsańynda árbir soǵysqa qatysýshy men soǵys múgedegine bıýd­jetten 65 myń teńge mólsherin­de bir jolǵy járdemaqy tólenýi, basqa da soǵysqa qatysýshylar men soǵys múgedekterine teńestirilgen adamdardyń materıaldyq qoldaýsyz qalmaýy – úlken qýanysh”. Arda­gerler sóziniń túıini osyndaı. Joldaýda Jeńistiń 65 jyldy­ǵyn keńinen meıramdaýǵa baı­la­nys­ty soǵysqa qatysýshylar men múgedekteriniń jeńildikpen jol júrýleri úshin 383 mıllıon teńge qarastyrylatyny aıtyldy. Osyn­daı ıgi bastamany jergilikti jer­degi basshylar ilip áketse nur ústine nur emes pe. Qyzylorda oblysy­nyń ákimi B.Qýandyqov turǵyn­dar aldyndaǵy esebinde osyndaı bir jaqsylyqty jaıyp saldy. “Jeńis­tiń 65 jyldyǵyna oraı soǵysqa qatysýshylar men múgedekterge áleýmettik qoldaý kórsetiledi. Bul baǵytta biz de óz tarapymyzdan ob­ly­symyzdaǵy soǵys ardagerlerine birjolǵy qarjylaı áleýmettik kómek kórsetýdi, ardagerlerimizdiń turyp jatqan úılerin jóndep be­rýdi qolǵa alamyz”, – dedi oblys basshysy. Jón-aq, dedi zalda otyrǵandar rıza kóńilmen. Elbasymyz Qyzylorda oblysy­na atbasyn tiregen bir saparynda: “Búgingi Syr boıynda serpindi serpilis bar”, – degen eken. Biz de oblysta bolǵan on kúnde tirlik pen birliktiń, qut pen berekeniń, yntymaq pen yrystyń qasıetti mekenine aınalǵan óńirdegi órkendi ózgeristerge qanyqtyq. “Keńesti el azbaıdy” degen ulaǵatty sózderdi basshylyqqa alyp, Qazaqstan Res­pýblıkasynyń Prezıdenti N.Á.Na­zar­baevtyń jańa Joldaýynan týyndaıtyn mindetterdi júzege asyrýǵa bir kisideı jumylǵan qalyń elmen qımaı qoshtastyq.