Saýd Arabııasy Er-Rııadta halyqaralyq ınvestforýmnyń ashylýyna qatysty kelisim jasady, dep habarlaıdy Euronews.
Forýmnyń negizgi maqsaty – batys saıasatkerleriniń, álemdik kompanııalardyń belgili jýrnalıst Djamal Hashshogıdiń ólimine baılanysty baıkot jarııalaýyna qaramastan, ınvestısııa tartý múmkindikterin kórsetý.
«Túrkııada oryn alǵan sońǵy oqıǵalarǵa baılanysty memleketimizge daǵdarys tónip tur. Biraq, memleketimizde tarıhı aýqymdy transformasııa ótip jatyr. Biz úlken ózgeristerge bet aldyq jáne bul qozǵalys toqtamaıdy», dedi energetıka mınıstri Haled al-Faleh alǵysózinde.
Saudi Aramco munaı kompanııasynyń ókilderiniń aıtýynsha, jalpy quny 34 mıllıard dollar bolatyn 15 memorandýmǵa qol qoıylǵan. Seriktester qatarynda AQSh, Fransııa, Qytaı, Japonııa, Birikken Arab Ámirlikteri men Úndistan memleketteriniń kompanııalary bar. Investısııa sarapshysynyń oıynsha, «Kóptegen kompanııalar Saýd Arabııasyndaǵy tutynýshylaryn joǵaltyp ala alady. Degenmen, munaı men energetıka salasynda Saýd Arabııasynan bas tartý múmkin emes. О́ıtkeni, álem boıynsha Saýd Arabııasy munaı óndirýshilerdiń alǵashqy úshtiginde».
Dúısenbi kúni memlekettiń energetıka mınıstri munaı saýdasy saıasattan bólek qarastyrylatyn másele ekenin, Saýd Arabııasynyń munaı óndirisinen bas tartpaıtynyn málimdedi.