Búgin Katardyń bas shahary – Dohada búgin sporttyq gımnastıkadan álem chempıonatynyń shymyldyǵy túriledi. 3 qarashaǵa deıin sozylatyn bul jarysta 14 júlde jıyntyǵy sarapqa salynady.
Dúbirli dodada 80-nen asa memleketten kelgen 550 úmitker baq synaýǵa bel býyp otyr. Jarystyń alǵashqy tórt kúninde erler men áıelder arasyndaǵy irikteý syny ótedi. 29-30 qazan aralyǵynda komandalyq kópsaıysty tamashalaımyz. Odan keıin jekelegen jattyǵýlar boıynsha básekeler uıymdastyrylady. Sondaı-aq, Dohadaǵy jarystyń nátıjesi boıynsha 2020 jyly Tokıoda alaýy tutanatyn Olımpııa oıyndarynyń joldamasyna ıelik etken alǵashqy gımnasshylar anyqtalady. Ondaı qurmetke ıe bolý baq synaýǵa kelgen eldiń órenderi komandalyq saıysta úzdik úshtiktiń qatarynan kórinýge tıis.
Esterińizge sala keteıik, byltyr Kanadanyń Monreal qalasynda ótken álem chempıonatynyń jekelegen saıysynda Qytaı men Japonııa sportshylarynyń qarqyny óte kúshti boldy. Osy komanda músheleri úsh-úsh altynnan oljalady.
Ulybrıtanııa, Grekııa, Horvatııa, AQSh, Reseı jáne Germanııanyń ókilderi bir-bir retten jeńis tuǵyrynyń eń bıik satysyna kóterildi. Júlde alǵandar qatarynda Izraıl, Ýkraına, Gollandııa, Kanada, Ońtústik Koreıa, Shveısarııa jáne Belgııanyń órenderi bar. Qazaqstandyqtar arasynan eń úzdik kórsetkishke Mılad Karımı qol jetkizdi. Ol erkin jattyǵýdy 9 orynmen qorytyndylady.
Ǵalym SÚLEIMEN,
«Egemen Qazaqstan»