Memleket basshysy Nursultan Nazarbaevtyń halyqqa arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıqyndalǵan maqsattardyń júzege asyrylýyna qatysty jumystarmen tanysý úshin Premer-Mınıstr Baqytjan Saǵyntaev Almaty oblysyna jumys saparymen keldi.
Úkimet basshysy aldymen Taldyqorǵan áýejaıynyń jańadan paıdalanýǵa berilgen termınalynyń jumysymen tanysty. Tolyq jańǵyrtýdan ótken áýejaı termınaly el ishi men halyqaralyq áýe qatynasyna qyzmet kórsetýge laıyqtalyp jabdyqtalǵan. Turǵyndar sany 2 mln adamnan asqan Jetisý óńirinde áýe jolyn tutynýshylar qatary jyl saıyn artyp keledi. О́ńirdegi týrızmniń damýy halyqaralyq áýe baǵyty boıynsha qyzmet kórsetýge de suranys týdyryp otyr. Osy jerde B.Saǵyntaevqa Úsharal qalasyndaǵy kúrdeli jóndeýden ótken áýejaıdyń qyzmeti tanystyryldy. Bıylǵy kóktemde Alakól aýdanynda otandyq týrızmdi damytýǵa arnalǵan jıyn barysynda Memleket basshysy Nursultan Nazarbaev týrısterdiń áýe qatynasyna degen suranysyn eskerýdi, sondyqtan Úsharal áýejaıyn talapqa saı jóndeýdi tapsyrǵan bolatyn. Qysqa merzimde tolyqtaı jóndelgen áýejaı maýsym kezinde el aýmaǵynan bólek Reseıdiń birneshe qalasynan tikeleı áýe reısterin qabyldady.
Úkimet basshysy munan keıin Panfılov aýdanyndaǵy «Nur joly» avtokólik ótkizý beketine bardy. Táýligine 2200 júk kóligi men 300-den astam jolaýshylar kóligine qyzmet kórsetetin keden ótkeli jaqynda paıdalanýǵa berilgen bolatyn. Sapar «Qorǵas» shekara mańy halyqaralyq yntymaqtastyq ortalyǵynda jalǵasyp, shekaranyń qazaqstandyq bóliginde oryn tepken «Samuryq» alańyn aralaýǵa ulasty. Jalpy bul ortalyq kúnine 5 myń adamǵa qyzmet kórsetedi. Sondaı-aq B.Saǵyntaev osy aýdanda jańadan boı kótergen «Nurkent» qalashyǵynyń tynys-tirshiligimen de tanysty. Qurylysy 2013 jyly bastalǵan Nurkent qalasynyń jalpy aýmaǵy 1460 ga. Bolashaqta qala halqynyń sany 100 myń adamǵa jetedi dep kútilýde. 2022 jylǵa deıin Nurkentte aýmaǵy 1 mln sharshy metrdi quraıtyn turǵyn úı paıdalýǵa berilmekshi. Qazir qurylys qyzý júrip jatyr. Bul 50 myń adamnyń baspanaly bolýyna jol ashpaq.
Taldyqorǵan qalasynda qaıta jalǵasqan jumys sapary «Saltanat saraıymen» tanystyqtan keıin oblystyń densaýlyq saqtaý salasy qyzmetkerlerimen kezdesýge ulasty. Jıynda Úkimet basshysy Memleket basshysy Nursultan Nazarbaevtyń jýyrdaǵy Joldaýynda aıtylǵan áleýmettik baǵyttardyń basymdyǵyna mán berip, medısına qyzmetkerleriniń aldynda turǵan jaýapty mindetter jaıyna toqtaldy. Úkimet basshysy Joldaý júktegen mindet boıynsha 2019-2020 jyldar aralyǵynda densaýlyq saqtaý qyzmetkerleri, onyń ishinde ýchaskelik dárigerler men medbıkelerdiń eńbekaqysy 20 paıyzǵa ósetinin aıtty. Bul elimiz boıynsha 10 myń ýchaskelik dáriger men 30 myń medbıkeniń aılyq tabysyn eselep arttyrýǵa múmkindik bermek. Kezdesýde oblystaǵy medısınalyq uıymdardyń ókilderi densaýlyq saqtaý júıesin damytýǵa qatysty óz kózqarastaryn bildirdi, sonyń ishinde Memleket basshysynyń Joldaýyn iske asyrý aıasyndaǵy pikirlerin ortaǵa saldy. Mysaly, Taldyqorǵan qalalyq kópsalaly aýrýhanasynyń dırektory Sáýle Qusmoldanova jalaqynyń 20 paıyzǵa kóterilýi qyzmetkerlerdiń jumysqa yntasyn arttyryp, oblystaǵy densaýlyq saqtaý mekemelerine bilikti kadrlardyń kelýine jol ashatynyn aıtty. Jalpy, memleket qoldaýynyń arqasynda óńirdegi emhanalardyń tehnıkamen jabdyqtalýy 94 paıyzǵa jetken. Bul úrdis negizinen aýyldyq aımaqtarda júzege asyrylýda.
B.Saǵyntaev kelesi kezekte Kórme ortalyǵynda Almaty oblysynyń áleýmettik-ekonomıkalyq damý barysymen tanysty. Oblystyń ekonomıkalyq áleýeti jaıly áńgimelegen aımaq basshysy Amandyq Batalov Premer-Mınıstrge sońǵy tórt jylda óńir ekonomıkasynyń ósimi 4,2 paıyzǵa jetkenin aıtty. Al bıylǵy jartyjyldyń qorytyndysy boıynsha Almaty oblysynyń jalpy óńirlik ónimi birinshi jartyjyldyqta 1,09 trln teńgeni qurady. Jalpy respýblıkaǵa shaqqandaǵy sharýashylyq óniminiń 17 paıyzyn Jetisý óńiri berip otyr. Memleket basshysy bıylǵy Joldaýyn jarııa etken jıynda Almaty oblysyndaǵy serpindi jumysty atap aıtyp, laıyqty baǵa bergen bolatyn. Osy jerde Premer-Mınıstr óńirdegi kásipkerlermen kezdesý ótkizdi. Kezdesýde el ekonomıkasyn damytýdaǵy kásipkerlerdiń úlesi men jaýapkershiligine mańyz bergen Úkimet basshysy memleket-jekemenshik áriptestigi aıasynda jasalyp jatqan jumystarǵa oraı kásipkerlerdiń pikirine qulaq asty. О́z kezeginde sóz alǵan óńirdegi qýatty kásiporyndar men bıznes-qaýymdastyq basshylary Elbasy Joldaýynda aıtylǵan jalaqynyń eń tómengi mólsherin kóterý týraly sheshimdi qýattaıtynyn jetkizdi.
– Qazir bizde 160 adam jumys isteıdi. Biz óz jumyskerlerimizdiń jalaqysyn únemi kóterip otyrýǵa tyrysamyz. Buǵan deıin barlyq jumyskerdiń jalaqysyn 50 paıyzǵa kóterdik. Elbasy Joldaýynan keıin eńbekaqyny taǵy kóterý kerek degen sheshimge keldik. О́ıtkeni halyqtyń ál-aýqatyn shynymen de arttyrý kerek. Osy joly biz jalaqyny taǵy da 15 paıyzǵa ósiremiz, – deıdi «Almaty boıaýlary» JShS dırektorlar keńesiniń tóraıymy Rımma Salyqova.
Sondaı-aq Premer-Mınıstr Taldyqorǵanda bıyl iske qosylǵan №28 mektep-lıseıdegi zamanaýı aqparattyq tehnologııalardyń oqytylý barysymen tanysyp, óńir ustazdary men ata-analar qaýymdastyǵy ókilderimen júzdesti. Kezdesýde aldaǵy úsh jylda Joldaýdy iske asyrýǵa 1,75 trln teńge jumsalatynyn aıtqan Premer-Mınıstr Úkimet eń tómengi jalaqyny 1,5 esege, ıaǵnı 28 myńnan 42 myń teńgege deıin arttyrýǵa daıyn ekenin jetkizdi. Onyń ishinde pedagogıkalyq qyzmetkerlerdiń eńbekaqysy 35 paıyzǵa kóbeımek. Al bilim salasyn qarjylandyrý 2,4 trln teńgege deıin artady.
Kún tártibindegi mindetterge oraı oblysta sıfrlandyrý baǵdarlamasyn júzege asyrý maqsatynda 21 robotty tehnıka kabıneti, 11 IT-synyby jáne 2 IT-ortalyq ashylǵan. Al Elbasy Joldaýynda naqtylanǵan 3 aýysymdy mektepterdiń sanyn azaıtý jónindegi jumystar boıynsha aımaqta 22 bilim berý nysany salynyp jatyr. Jyl sońyna deıin 2 mekteptiń, 1 balabaqsha men 1 mýzyka mektebiniń qurylysy aıaqtalady.
Qalmahanbet MUQAMETQALI,
«Egemen Qazaqstan»
Almaty oblysy