Túrkistan oblysynda jaǵajaı týrızmin damytý maqsatynda aýqymdy jobalar qolǵa alynyp otyr. Shardara aýdanynda 255 gektar aýmaqqa ınfraqurylym tartylyp, sý qoımasynyń jaǵalaýynda 60 nysan salý josparlanǵan bolatyn. Kúni keshe Shardara aýdany «Aqqala» demalys aımaǵynyń jaǵalaýynda alǵash ret ótken «SAFARI SHARDARA» festıvaliniń de basty maqsaty – óńirdegi týrızmdi damytyp, bıznes-axýaldy jaqsartý.
Balyq aýlaýshylar jarysymen bastalǵan festıval halyqaralyq deńgeıdegi saıystarǵa ulasyp, birneshe sport túrinen jarys ótti. Atap aıtqanda, qazaqsha kúres, jelkendi qaıyq, akademııalyq esý, jaǵajaı voleıboly men fýtboly, qol kúresi, gir kóterý, arqan tartý, bórenege órmeleý, qoshqar kóterý syndy jarystardan qatysýshylar baq synady. Sondaı-aq qonaqtar Shardara aýdanynyń tarıhymen, aýyl sharýashylyǵy ónimderi jáne ulttyq qolóner kórmesimen tanysty. Sporttyq saıystar men konserttik baǵdarlamalar qatar uıymdastyryldy. Shardara aýdanynyń ónerpazdary arnaıy merekelik «Safari Shardara» ánin, «Qazyna», «Shamsınýr» bı toptary jáne sırk ónerpazdary horeografııalyq kompozısııa oryndady. Al Túrkistan – Otyrar – Shardara baǵytynda júrip ótken motobaıkerler «motokross» ónerimen kópshilikti tánti etti.
Festıvalda sóz alǵan oblys ákimi Janseıit Túımebaev sporttyq jarystarǵa qatysýshylar men qonaqtardy quttyqtap, jeńimpaz atanǵan birqatar sportshyny marapattady. Is-shara «Djıp» kólikteriniń jarysymen jalǵasyp, qumda kompozısııalyq «Rock racing» shoýy kórsetildi. Al túıeler jarysynda 15 qatysýshy baq synap, ózara myqtyny anyqtady. Sondaı-aq kópshilik saıatshylardyń halyqaralyq jarysyn tamashalady.
Aıta ketelik, óńirde buǵan deıin Túlkibas aýdanynda «Qyzǵaldaq», Báıdibek aýdanynda «Qymyzmuryndyq», Jetisaıda «Qaýynfest» festıvali ótken bolatyn.
Ǵalymjan ELShIBAI,
«Egemen Qazaqstan»
Túrkistan oblysy