Almatydaǵy Qabyldaý úıinde qazaqstandyq sáýletshiler, músinshiler jáne sýretshiler arasyndaǵy «Ǵylym jáne óner kody» respýblıkalyq baıqaýynyń jeńimpazdaryn marapattaý saltanaty ótti.
Densaýlyq saqtaý salasyndaǵy ınnovasııalyq tehnologııalardy beıneleıtin eń úzdik qolóner týyndylaryn tańdaýdy maqsat etken baıqaýǵa barlyǵy 60 ótinim kelip túsken. 40 joba jartylaı fınalǵa ótti. Baıqaýdyń uıymdastyrýshysy – «Cultural Dialogue» QQ, al qazaqstandyq farmasevtıka óndirisiniń kóshbasshysy SANTO kompanııasy Á.Qasteev atyndaǵy QR Memlekettik óner murajaıymen seriktestikte baıqaýdyń bastamashysy ári bas demeýshisi retinde qoldaý kórsetti.
Baıqaý uıymdastyrýshylarynyń málimeti boıynsha, músin ótken jyly 135 jyldyq mereıtoıyn atap ótken SANTO («Hımfarm» AQ) zaýytynyń jańa nyshanyna aınalmaq. Baıqaý qatysýshylary aldynda sóılegen sózinde QR Mádenıet jáne sport mınıstri Arystanbek Muhamedıuly atalmysh baıqaý bıznes pen óner arasyndaǵy áleýmettik seriktestiktiń jarqyn úlgisin kórsetti dep atap ótti.
24 tamyzda Qasteev atyndaǵy QR Memlekettik óner murajaıynyń fılıaly – Ortalyq kórme zalynda eskızder men maketterdiń kórmesi uıymdastyrylǵan bolatyn. Kórmege qoıylǵan 50-den asa eksponattardyń basym kópshiligi Almaty, Astana jáne О́skemennen qatysqan músinshilerdiń jumystary. Baıqaý uıymdastyrýshysy Janna Mámbetovanyń aıtýynsha, ǵylym jáne óner taqyrybyna arnalǵan respýblıkalyq baıqaýǵa qatysý sýretshilerdi shyǵarmashylyq turǵydan ózin damytyp, qazirgi zamanda ózekti taqyryptar arqyly ishki dúnıetanymyn kórsetedi. Baıqaýǵa óner týyndylaryn, músinder men art-obektilerdi jasaý jaǵynan tájirıbesi mol jetekshi óner qaıratkerlerimen qatar, bastaýshy músinshiler, shyǵarmashylyq joǵarǵy oqý oryndary men kolledj stýdentteri qatysty.
Baıqaýǵa qatysqan jumystardy Qasteev atyndaǵy Memlekettik óner murajaıynyń ónertanýshylarynan jáne bıznes ókilderinen quralǵan sarapshylar komıssııasy baǵalady. Sondaı-aq, qazylar alqasynyń quramynda halyqaralyq sarapshy - «Starak Foundation» Qorynyń ókili Aneta Marcinkowska-Muszynska (Polsha) jumys jasady.
Marapattaý saltanatynda úsh júldeli oryndy ıelengen jeńimpazdardyń esimderi tómende atalady: 1-oryn – Shoqan Tólesh, «Adam jáne tabıǵat» jobasy úshin; 2-oryn – Astanadan qatysqan «Qaz Art» shyǵarmashylyq kombınaty (Baımuhanov Meıram, Zatınova Ulmeken, Lıýbarskıı Dmıtrıı), «Vıtrývıandyq adam» jobasy úshin; 3-oryn – sáýletshi Sáken Narynov, «Dalanyń týmasy» jobasy úshin. Baıqaýdyń bas júldesine Almatydan qatysqan Dýlat Úsenbaev, Aıdos Búrkitbaev, Qanat Begýlıev, Álimjan Toqbaev syndy músinshilerden quralǵan jas shyǵarmashylyq komanda «Bolashaqqa kózqaras» jobasy úshin ıe boldy. Bas júlde ıegerleri óz músinin jasap shyǵarý múmkindigine qol jetkizedi. Aqtyq synnan súrinbeı ótken qatysýshylardyń jobalary baıqaý ólshemderi men taqyrybyna sáıkes keledi, óziniń biregeı ıdeıasymen, kompozısııasynyń tutastylyǵymen ári beıneliligimen erekshelenedi, sondaı-aq, jobalar taǵaıyndalǵan sáýlettik jáne saıabaqtyq landshaftqa sáıkes usynylǵan. Júldeli oryndardyń jeńimpazdary aqshalaı syılyqqa ıe boldy. Baıqaýdyń barlyq qatysýshylary biregeı dızaında bezendendirilgen katalogpen jáne sertıfıkatpen marapattaldy.
Osyǵan oraı Polpharma toby Baqylaý keńesiniń hatshysy, «Starak Family Foundation» Qorynyń prezıdenti Eljbeta Djıkovskanyń aıtýynsha, baıqaý Qazaqstannyń kórkemónershiler qyzyǵýshylyq tanytyp, kóptegen músinshilerge óz jumystaryn usyný úshin shabyt berdi. Baıqaý úzdik jobasy - «Bolashaqqa kózqaras» tamasha músini Qazaqstan Prezıdenti janyndaǵy Sheteldik ınvestorlar keńesiniń otyrysy kezinde 2019 jyldyń maýsymynda Shymkenttegi zaýytta saltanatty jaǵdaıda ashylatyn bolady.
Elvıra SERIKQYZY,
«Egemen Qazaqstan»
ALMATY