Astanada dıplomatııalyq korpýs pen halyqaralyq bıznes-qaýymdastyqtar ókilderiniń qatysýymen «Qazaqstan Respýblıkasynyń eksporttyq áleýeti» taqyrybynda brıfıng ótti. Shara barysynda Syrtqy ister mınıstrligi, «Atameken» ulttyq kásipkerler palatasy men «KazakhExport» ulttyq kompanııasy arasynda ózara túsinistik pen yntymaqtastyq týraly memorandýmǵa qol qoıyldy.
Jıynǵa Syrtqy ister mınıstri Q.Ábdirahmanov, Investısııalar jáne damý vıse-mınıstri Q.О́skenbaev, «KazakhExport» eksporttyq saqtandyrý kompanııasy» AQ, «Atameken» ulttyq kásipkerler palatasy jáne «Báıterek» UBH» AQ basshylary men halyqaralyq bıznes-qaýymdastyqtar ókilderi qatysty. Sharany Syrtqy ister mınıstri Q.Ábdirahmanov ashty.
«Bul jıyn saýda men ınvestısııalardy ilgeriletý turǵysynan óte mańyzdy shara bolyp otyr. «Atameken» ulttyq kásipkerler palatasy jáne «KazakhExport» kompanııasymen eksportty ilgeriletýdegi kúsh-jigerimizdi biriktirý úshin kelisimge qol qoıamyz. Memorandým birge jumys isteýdegi keń aýqymdy máselelerdi qamtıdy», dedi mınıstr.
Sondaı-aq syrtqy ister vedomstvosynyń basshysy jahandyq tájirıbege sáıkes, ınvestısııalar men eksportty ilgeriletý jónindegi maqsattar ózara baılanysty ekenin atap ótti. 2022 jylǵa deıin Qazaqstan ekonomıka sektorynyń eksporttyq áleýetin bir jarym esege ósirý josparlanyp otyr. 2016 jylmen salystyrǵanda eldiń eksporttyq áleýeti 31%-ǵa artyp, 48,3 mlrd AQSh dollaryn qurady. Bıylǵy derekter boıynsha, bul oń úrdis 28% ósimmen saqtalyp otyr. Aldaǵy
3 jyl ishinde Qazaqstannyń eksporttyq áleýetin arttyrý maqsatynda Syrtqy ister mınıstrligi men «Atameken» UKP jáne «KazakhExport» UK birige jumys isteıtin boldy.
«Atameken» ulttyq kásipkerler palatasy men «KazakhExport» kompanııasy elimizdiń eksportyn ilgeriletýdegi negizgi quraldar bolyp otyr. Qazaqstan ınvestısııany qabyldaýǵa qashanda daıyn. Jańa óndiristerdi ashý úshin bizde eksportty qoldaý jónindegi ulttyq strategııalar ázirlendi. Biz ınvestısııa almasýǵa, sondaı-aq taýarlardyń syrtqy naryqta ilgerileýine úlken kómek kórsetýge daıynbyz», dedi Investısııalar jáne damý vıse-mınıstri Q.О́skenbaev.
Jıyn sońynda Syrtqy ister mınıstrligi, «Atameken» ulttyq kásipkerler palatasy men «KazakhExport» ulttyq kompanııasy arasynda ózara túsinistik pen yntymaqtastyq týraly memorandýmǵa qol qoıyldy.
Marjan TILEÝBEK,
«Egemen Qazaqstan»