Uzaq jyldar boıyna óndirisi toqtap, talan-tarajǵa túsip ketýge shaq qalǵan Aqsý qant zaýytyna osydan 2 jyl buryn qaıta kóńil bólinip, jańǵyrtý jumystary bastalǵan bolatyn. Bıyl jóndeý jumystary aıaqtalyp, zaýyt tolyq qýatynda jumys isteýge kóshti.
Jıyn-terin maýsymy bastalǵaly beri Jansúgirov kentinde ornalasqan qant zaýyty 80 000 tonna qyzylsha qabyldap úlgergen eken. Zaýytqa negizinen Aqsý aýdanynyń sharýalary ónimderin ótkizýde, olardan qazirge deıin qabyldanǵan tátti túbir mólsheri 45 000 tonnaǵa jetken. Munan bólek kórshiles Sarqan, Alakól aýdandarynyń alqabynda ósken qant qyzylshasy da osynda tasymaldanyp jatyr.
Negizi Aqsý qant zaýyty byltyrdan bastap ónim shyǵara bastady. Quryltaıshylar oblys ákimdiginiń kómegimen qaıta jańǵyrtýdyń alǵashqy kezeńi aıaqtala bere, jergilikti sharýalar ósirgen qyzylshany satyp alyp, uzaq jyl boıyna jumysy istemeı turǵan óndiristi iske qosqan. О́ndiris barysyndaǵy kemshilikter anyqtalyp, jóndeý jumystary qaıta jalǵasqan. Bıyl jańǵyrtýdyń ekinshi kezeńi tolyqtaı aıaqtalyp, zaýyt óz qýatynda shıkizat qabyldap qana qoımaı, taza ónim shyǵarýǵa kiristi. О́nimdilik 30 prosentke artady degen boljam bar.
- Aqsý qant zaýytynyń iske qosylýy biz úshin úlken qýanysh bolyp otyr. Qant qyzylshasy óńirimizdiń negizgi daqyly. Buǵan deıin jınalǵan ónimdi Kóksýǵa tasıtynbyz. Bul qosymsha shyǵyn edi. Endi óz aýdanymyzdaǵy óndiriske tasymaldaımyz, - deıdi «Kvıtko» sharýa qojalyǵynyń basshysy Aleksandr Kvıtko.
Qalmahanbet MUQAMETQALI,
«Egemen Qazaqstan»
Almaty oblysy