Jańartylatyn energııa kózderin josparly damytý kezeńderiniń biri retinde aýksıondyq saýda-sattyq eń úzdik jobalardy iriktep, elektr energııasynyń naryqtyq básekege qabiletti baǵasyn qalyptastyrýǵa baǵyttalǵan. Bul týraly QR Úkimetiniń baspasóz ortalyǵynda ótken brıfıngte QR energetıka vıse-mınıstri Anatolıı Shkarýpa aıtty, dep habarlaıdy primeminister.kz
Energetıka mınıstrliginiń málimetine qaraǵanda, aýksıondyq saýda-sattyqtyń jańa tetigi JEK nysandary óndiretin elektr energııasynyń tıimdi naryqtyq baǵasyn aıqyndap, áleýetti ınvestorlardy irikteýdi ashyq ótkizip, elimizdegi jańartylatyn generasııa salasyn damytý úshin ınvestısııa tartýǵa septigin tıgizedi. Bıyl kóktem men kúzde qýattylyǵy 1000 MVt bolatyn JEK jobalarynyń: kún elektr stansııalary (KES), jel elektr stansııalary (JES), sý elektr stansııalary (SES) jáne BıoES tıpteri boıynsha halyqaralyq aýksıondyq saýda-sattyq ótkizildi.
«Salaǵa ınvestısııalar tartý arqyly tarıfter tómendedi. Orta eseppen alsaq, JES 12,2%-ǵa, shaǵyn SES 12,12%-ǵa, KES 35,71%-ǵa tómendegen. Jel generasııasynyń aýksıondyq baǵasy eń kóbi 23,3%-ǵa tústi, kún generasııasy boıynsha – 48%, shaǵyn SES jobalary – 23,4%, BıoES – 1%. Bul – jaqsy nátıje», — dedi A. Shkarýpa.
Bıyl aýksıondyq saýdaǵa 113 qazaqstandyq jáne sheteldik kompanııalar (Qytaı, Reseı, Túrkııa, Fransııa, Bolgarııa, Italııa, Birikken Arab Ámirligi, Nıderlandy) qatysty. Olardyń ishinde jalpy qýaty 857,93 MVt bolatyn 36 JEK jobasy jeńiske jetti.
«Jalpy, saýda aýksıonyna túsken ótinimder kólemi 3 422 MVt boldy, ıaǵnı suranys kólemi usynys kóleminen 3,4 ese artyq ekenin kóremiz. Saýda aýksıonynyń jeńimpazdary usynylǵan aýksıon qýattylyǵynyń 85%-yn ótep otyr», — dedi vıse-mınıstr.
Vıse-mınıstrdiń aıtýynsha, qabyldanyp jatqan sharalar halyqqa tarıfterdiń ósýin tejeýge múmkindik beredi.
«Biz aýksıondyq saýda-sattyq tetikterin engizgenge deıin belgilengen baǵamen salystyramyz. 2018 jyly bolǵan bekitilgen baǵamen salystyrǵanda, qazirgi baǵa tómendeýde, ıaǵnı biz áleýetti túrde halyqqa tarıfterdiń ósýine jol bermeýdiń amaldaryn jasap jatyrmyz», — dedi A. Shkarýpa.
Energetıka vıse-mınıstriniń aıtýynsha, aýksıondyq saýda-sattyq tetikterin engizý halyq arasynda tarıfterdiń kóterilmeýiniń mańyzdy qory bolýy múmkin.
«Máselen, kún energııasy boıynsha bizde 2018 jylǵa deıin belgilengen baǵa 34 teńgeden sál joǵary bolsa, endi aýksıondyq saýda-sattyq esebinen kún generasııasy boıynsha bul baǵa 48%-ǵa tómendedi. Baǵany barynsha tómendetý – iske asyra alatyn joba, sondyqtan biz ortasha mánderdi esepke alýdy usynamyz», — dedi ol.
Sonymen qatar, A. Shkarýpa Qazaqstannyń energııa júıesi negizgi qýattylyqtyń neǵurlym joǵary úlesimen jáne joǵary manevrlik qýattylyqtyń az úlesimen sıpattalady, bul jalpy energııa júıesinde qýatty retteýge múmkindik beretin sý elektr stansııalaryn damytýǵa yqpal etedi.
Budan ózge, energetıka vıse-mınıstri qatty turmystyq qaldyqtardy, qoqysty qaıta óńdeý boıynsha jumys isteıtin bıo elektr stansııalarynyń qurylysy máselesin pysyqtaý qajettigin atap ótti.
«Atalǵan sektorda barynsha kóp basymdyq pen yntalandyrýlar jasaǵymyz keledi. Polıgondar bazasynda birden birneshe máseleniń sheshimin tabatyn bıo elektr stansııalaryn ornatýdy kózdep otyrmyz. Bul – qaldyqtardy basqarý, taza jáne jasyl energııany óndirýde qaıtalama shıkizatty paıdalaný», — dedi ol.
Aıta ketý kerek, Qazaqstanda jańartylatyn energııa kózderiniń aýksıondyq satý júıesi alǵash ret 2018 jylǵy 23 mamyrda iske qosylǵan.