Qostanaıda Parlament Májilisi Agrarlyq máseleler jónindegi komıtetiniń tóraǵasy Saparhan Omarovtyń tóraǵalyq etýimen atalǵan komıtettiń kóshpeli májilisi ótti.
Onda «Qazaqstan Respýblıkasynyń agroónerkásip keshenin retteý máseleleri jónindegi birqatar zań aktilerine ózgertýler men tolyqtyrýlar engizý týraly» zań jobasy talqylandy. Zań jobasy týraly aldymen Aýyl sharýashylyǵy vıse-mınıstri Berik Beısenǵalıev baıandama jasady. Ol salany damytýdaǵy túıindi máselelerge naqty toqtady.
«Eger aýyl sharýashylyǵy tehnıkalary jóninde aıtar bolsaq, bıyl jyl basynan bergi 9 aıda bul sala 50 mıllıard teńgege qarjylandyrylyp, oǵan 2650 - den asa tehnıka alyndy. Al ótken jylǵy bólingen qarjy munan az bolatyn, jyl aıaǵyna deıin bul qarjynyń barlyq kólemi 70 mıllıard teńgege jetip qalady» dedi Berik Beısenǵalıev.
Zań aktilerine ózgerister men tolyqtyrýlar engizý jónindegi qosymsha baıandamany zań jobasy jónindegi jumys tobynyń jetekshisi, Májilis depýtaty Murat Temirjanov jasady. Ol 30 zań aktilerine, 10 kodekske jáne 20 zańǵa ózgerister men tolyqtyrýlar engiziletinin aıtty.
«Osylardyń barlyǵy elimiz óńirindegi ósimdik álemin saqtaýǵa,jer paıdalanýdy retteýge, veterınarlyq qyzmetti jolǵa qoıýǵa, sýmen qamtamasyz etýge, balyq sharýashylyǵy men janýarlar álemin qorǵaýdy retteıdi», dedi Murat Temirjanov.
Ol zań aktilerine kiretin máselelerdiń barlyǵyn taldap aıtqan soń, osy jıynǵa qatysqan Qostanaı, Aqmola, Soltústik Qazaqstan oblystary ákimdikteriniń ókilderi óz óńirlerindegi aýyl sharýashylyǵyn damytý isine sholý jasady. Odan keıin bas qosýǵa shaqyrylǵan mamandar men aýyl sharýashylyǵy taýarlaryn óndirýshiler zań aktilerine enetin ózgerister men tolyqtyrýlardy talqylady. Onda aıtylǵan usynystardyń barlyǵy zań qabyldanǵanda eskeriletin bolady.
Názıra Járimbet,
«Egemen Qazaqstan»
Qostanaı