Bıyl Qyzylorda oblysynda 87,3 myń gektarǵa kúrish egildi, ortasha ónimdiligi gektaryna 54,5 sentnerdi qurady.
Joǵary ónimdi sorttardy paıdalaný esebinen sońǵy 5 jylda kúrish jarmasynyń óndirisi 39 paıyzǵa artyp otyr. Al, osy jyldary kúrishtiń jalpy túsimi 2 esege artty.
Jalaǵash aýdanynda elevator bazasyndaǵy «Baıqońyr» agroholdıngin qurý aımaqta kúrish klasterin damytýǵa yqpal etti. Y.Jaqaev atyndaǵy kúrish óndirý ǵylymı-zertteý ınstıtýty Búkilreseılik kúrish ınstıtýtymen birlesip Qyzylorda oblysy úshin arnaıy sorttardy shyǵaryp jatyr.
Byltyr oblystaǵy kúrish sharýashylyqtarynda Iranda suranysqa ıe «Torem Hoshemı» sorty ósirile bastaǵan. Osyǵan oraı, qarmaqshylyq «Aqtóbe jáne K» JShS osy sortty 70 gektar jerge ekti, al Qazalynyń «Syr Marjany» sharýashylyǵy synaqtan ótkizý úshin 1 gektar aýmaqqa ekken edi.
2020 jylǵa qaraı oblysta Iran kúrishiniń egistik alqaby 5 myń gektarǵa deıin ulǵaıtylady. Sonymen qatar, óńdelgen kúrish eksportynyń kólemin 8 myń tonnaǵa deıin jetkizý josparlanýda.
Osylaısha, Syr óńiriniń kúrishi Túrkmenstan, Tájikstan, Qyrǵyzstan, Reseı, Belarýs, Armenııa, Ázirbaıjan, Mońǵolııa, Aýǵanstan jáne taǵy basqa elderge eksporttalatyn bolady.
Baqtııar TAIJAN,
«Egemen Qazaqstan»
Qyzylorda oblysy