«Astana» fýtbol klýby Eýropa lıgasynyń toptyq týrnırindegi kezekti oıynynda chehııalyq «Iаblones» komandasynan basym tústi.
Oıyn alma-kezek shabýylmen bastaldy. Matchtyń 18-mınýtynda jartylaı qorǵaýshy Bahtıer Zaınýtdınov aıyp alańyna pas berdi. Urymtal tustan shyǵa kelgen Pedro Enrıke dopty qaqpaǵa dál baǵyttady. Esep 1:0.
Alaıda birinshi taımda elordalyqtar basymdyqty ustap tura alǵan joq. «Iаblones» klýbynyń oıynshylary buryshtama dobyn teýip, qarbalas sáttiń birinde B.Zaınýtdınov dopty baıqamastan óz qaqpasyna kirgizip aldy. Budan keıin esep ózgermeı, birinshi kezeń teń aıaqtaldy.
Ekinshi taımda da komandalar jeńiske jetýge baryn salǵan. Oıyn bitýine 2 mınýt qalǵanda «Astana» klýbynyń qorǵaýshysy Evgenıı Postnıkov gol soǵyp, komandasyn jeńiske jeteledi. Osylaısha, match 2:1 esebimen aıaqtalǵanyna qaramastan, úsh goldy da astanalyqtar soqty.
«K» tobynyń tórtinshi týrynan keıin «Astana» klýby 8 upaımen top bastap tur. Dál qazir osy toptaǵy qalǵan eki komanda – jergilikti «Dınamo» men «Renn» Kıevte sheberlik baıqasyp jatyr.
Kelesi týr oıyndary 29 qarashada ótedi. «Astana» óz alańynda kıevtik «Dınamomen» kúsh synasady. Al sońǵy týrda, 13 jeltoqsanda elordalyq komanda «Rennmen» kezdesedi.