Keshe О́skemende memlekettik «Daryn» jastar syılyǵynyń ıegeri, rejısser, akter, aqyn Rústem Esdáýletov atyndaǵy kishi formada sahnalanǵan spektaklderdiń II respýblıkalyq teatr festıvali bastaldy. Oblystyq drama teatrda ótken, 14 qarashaǵa deıin jalǵasatyn festıvaldiń ashylý saltanatyna Qazaqstan Jazýshylar odaǵynyń tóraǵasy, aqyn Ulyqbek Esdáýlet, qala ákimi Jaqsylyq Omar bastaǵan qurmetti qonaqtarmen qatar tulǵanyń otbasy músheleri de qatysty.
Elimizdiń túkpir-túkpirindegi 20 teatrdyń arasynan iriktelgen 9 teatr ujymy oblys ortalyǵynyń turǵyndaryna 4 kún boıy ónerlerin pash etetin bolady. Mádenı sharanyń ashylýynda sóz alǵan oblystyq Mádenıet basqarmasynyń basshysy Azamat Muhamedchınov eki jyl qatarynan uıymdastyrylǵan festıvaldi aldaǵy ýaqytta halyqaralyq deńgeıde ótkizýdi josparlap otyrǵandaryn jetkizdi. «Rústem Esdáýlet Shyǵystyń teatr ónerin jańa beleske kóterdi. О́skemen teatry elimizden shyǵyp, shet memleketterde óner kórsetti. Sondyqtan bul festıval jalǵasa beredi», dedi ol.
Qazaqstan Jazýshylar odaǵynyń tóraǵasy, rejısserdiń aǵasy Ulyqbek Esdáýlet quttyqtaý sózinde Rústemniń О́skemende eńbek etken 7-8 jyl muǵdarynda 25 qoıylym qoıyp, teatrdyń atyn áıgili etkenine toqtalyp, búgingi jańa teatrdyń salynýyn taǵatsyzdana kútkenin tilge tıek etti. «Osy teatrdy túsinde kórip júretin. Osy teatrdyń jobasyn jasatyp, maketin syzdyryp alyp kelip, sol kezdegi oblys ákimi Berdibek Saparbaevqa tapsyrǵan edi. Ol kisi maǵan sony kórsetip: «Mine, mynadaı teatr salyp bereıin dep otyrmyn» degen edi. Keıin Rústem dúnıeden ótkennen keıin teatrǵa onyń esimi beriletinin aıtyp, el aldynda ýádesin bergen edi. Almatydan osynda kelerde ataqty ártis Asanáli Áshimovtiń «qazirgi ákimderińe aıtshy, teatrǵa nege áli kúnge deıin Rústemniń atyn bermeı júr?» dep aıtty», dedi U.Esdáýlet.
Azamat QASYM,
«Egemen Qazaqstan»