Prezıdent Nursultan Nazarbaevtyń «Qazaqstandyqtardyń ál-aýqatynyń ósýi: Tabys pen turmys sapasyn arttyrý» jańa Joldaýynda halyqtyń tabysyn arttyrý máselesi aldyńǵy orynǵa qoıyldy.
Osy talaptyń ataýly áleýmettik kómekke de qatysy bary sózsiz. О́ıtkeni ol júzdegen otbasy turmysynyń jaqsarýyna járdem berip keledi.
2018 jylǵy 5 qarashada Májiliste «Jańa formattaǵy ataýly áleýmettik kómekti engizý barysy týraly» taqyrybynda Úkimet saǵaty ótip, sol jerde Aýylsharýashylyǵy mınıstrliginiń ókili áleýmettik kómek alý týraly qoıylǵan suraqqa jaýap bere almady. Sondyqtan Premer-Mınıstrdiń orynbasary – Aýylsharýashylyǵy mınıstri О́mirzaq Shókeevtiń atyna saýal joldap, osy suraqty qoıýymyzǵa týra keldi.
Ataýly áleýmettik kómekti alýǵa úmitker az qamtylǵan otbasylardyń jıyntyq kirisin esepteýdiń qoldanystaǵy ádistemesine sáıkes adamnyń (otbasynyń) jan basyna shaqqandaǵy ortasha kirisin esepteýde jeke qosalqy sharýashylyqtan (JQSh) alynǵan kirister eskeriledi.
Bul rette joǵaryda atalǵan ádistemede kózdelgen, jeke qosalqy sharýashylyqtan túsetin kiristerdi esepteý boıynsha kózqarastar 2005 jyldan beri qaıta qaralmaǵan, bul kazirgi jaǵdaıda ataýly áleýmettik kómekti alýǵa úmitkerler kiristeriniń mólsherin asyra ulǵaıtýǵa nemese kemitýge alyp keledi. Eńbek jáne halyqty áleýmettik qorǵaý mınıstrligi óz tarapynan Aýyl sharýashylyǵy mınıstrligine tıisti usynystardy qaraý jáne bekitý úshin tapsyryp qoıǵanyn málimdep otyr.
Osyǵan baılanysty anyqtaǵymyz keletini – ataýly áleýmettik kómek taǵaıyndaýda Aýyl sharýashylyǵy mınıstrliginde jeke qosalqy sharýashylyqtan túsetin jıyntyq kiristi esepteýdiń qoldanystaǵy ádistemesin jańartý jáne qaıta qaraý úshin qandaı sharalar qaralyp jatqandyǵy, qaı merzimge deıin ol sharalar qoldanysqa enetini.
Baıdilda JYLQYShIEV,
Májilis depýtaty