BUU Qaýipsizdik Keńesiniń qararyn qoldady

Qazaqstannyń BUU janyn­daǵy Turaqty ókili Qaırat Omarov Afrıkanyń múıisinde, sonyń ishinde Erıtreıa, Efıo­pııa, Djıbýtı jáne Somalı elderindegi teńdessiz oń ózge­ris­terdi atap ótti. Ústimizdegi jyl­dyń maýsym aıynda búkil álem Erıtreıa men Efıopııa arasyndaǵy tarıhı tatýlyqqa kýá boldy – eki eldiń basshylary saıası erik-jiger tanytyp, 80 myńnan astam adamnyń ómirin qıǵan 20 jyldyq teketiresti toqtatty.

Bul oqıǵa 10 jyl ishinde aýmaqtyq qaqtyǵystarǵa oraı bólingen Erıtreıa men Djıbýtı arasyndaǵy joǵary deńgeıdegi alǵash­qy baılanystarǵa jol ash­ty. Ekijaqty kelisimdermen qatar Erıtreıa, Efıopııa jáne Somalı saıası, ekonomıkalyq, áleý­mettik jáne mádenı baılanystardy nyǵaıtýǵa jáne óńir­lik beıbitshilikti, qaýipsizdik­ti jáne damýdy yntalandyrý jó­nin­degi kúsh-jigerlerin or­natýǵa kelisti.

BUU Qaýipsizdik Keńesiniń otyrysynda sóılegen sózinde Q.Omarov: 

«О́ńirdegi beıbitshilik óńir­lik kóshbasshylardyń batyl sheshimderiniń nátıjesi boldy. Bul uzaqqa sozylǵan shıe­lenisterdiń, qaqtyǵystar men básekelestiktiń dáýiri­niń aıaqtalǵanyn kórsetedi jáne beıbit, ózara tıimdi ynty­maq­tastyqtyń jańa dáýirine jol ashady. Dıplomatııa, deldaldyq, senimdi nyǵaıtý jáne dıalog, damýdaǵy ınvestısııalarmen qatar, elder arasyndaǵy daýly máseleler­di sheshýdiń senimdi joly. Biz Djıbýtı men Erıtreıa arasyndaǵy ózara is-qımyldy qoldaımyz jáne olardy eki­jaqty qarym-qatynastarda qalǵan máselelerdi sheshý úshin odan ári kúsh-jiger jumsaýǵa shaqyramyz», dedi.

Qazaqstan Erıtreıaǵa qar­sy sanksııalardy alyp tastaý týraly sheshim úshin daýys bergen kezde, óziniń Afrı­­kada beıbitshilik pen qaýip­­siz­­dikti ornatýǵa degen um­ty­lysyn basshylyqqa aldy. Elimizdiń Qaýipsizdik Keńe­sin­degi jumysynyń osy baǵy­ty Prezıdent Nursultan Nazar­baevtyń BUU Qaýipsizdik Keńe­sine saıası joldaýyndaǵy 7 ba­sym­dyqtyń biri boldy.

BUU Qaýipsizdik Keńesiniń Somalı jáne Erıtreıaǵa qatys­ty sanksııalar jónindegi ko­mıtetiniń tóraǵasy retinde Qazaqstan Erıtreıadan sanksııalardy alyp tastaý týraly Keńes músheleriniń she­shimine eleýli úles qosty. Qazaq­stannyń Erıtreıamen yn­­ty­maqtastyqty nyǵaıtý jó­nin­degi kúsh-jigeri osy elge qar­sy 9 jyldyq sanksııalar re­ji­mi aıaqtalýynyń mańyzdy alǵysharty boldy.

Qazaqstandyq delegasııanyń sanksııalyq komıtettiń bas­shy­sy retinde atqarǵan jumy­sy­nyń qorytyndylary Qaýip­sizdik Keńesi músheleri tarapynan joǵary baǵaǵa ıe bol­dy. Otyrys barysynda Erıtreıa men Djıbýtı delegasııa­lary Qazaqstanǵa óńirdegi turaq­ty beıbitshilikti ornatýǵa tolyq­qandy qoldaý kórsetkeni úshin alǵysyn bildirdi.

Erıtreıaǵa qarsy sanksııalar 2009 jyly engizilgen bolatyn.

BUU Qaýipsizdik Keńesi qa­byl­daǵan qararǵa qarý-jaraq embargosyn alyp tastaý, jol júrýge tyıym salýdy, aktıv­terdi toqtatýdy jáne maqsatty sanksııalardy joıý kiredi.

«Egemen-aqparat»