Qazaqstandaǵy energııany únemdeý jónindegi zań jobasynyń tujyrymdamasy daıyndaldy. Bul týraly búgingi Úkimettiń kezekti otyrysynda Investısııalar jáne damý mınıstri Jeńis Qasymbek baıandady.
− Memleket basshysynyń 2018 jylǵy 10 qańtardaǵy Qazaqstan halqyna Joldaýynda kásiporyndarǵa energııa tıimdiligi talaptaryn jetildirý tapsyrylǵan bolatyn. Osy tapsyrmany oryndaý úshin «Energııa únemdeý jáne energııa tıimdiligin arttyrý týraly» zańǵa tájirıbelik taldaý júrgizildi. Bul rette múddeli taraptarmen birlesip, tıisti zań jobasynyń tujyrymdamasy ázirlendi («Qazaqstan Respýblıkasynyń keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly»), - dedi. Onyń aıtýynsha, tujyrymdama energııa únemdeýdiń qoldanystaǵy tetikterin jetildirýdi (memlekettik energetıkalyq tizilim, energııa aýdıtorlyq qyzmet, memlekettik baqylaý), jeke jáne memlekettik sektorlardy retteý tásilderin ózgertýdi, sondaı-aq energııa únemdeýdi yntalandyrý sharalaryn ázirleýdi kózdeıdi.
Mınıstr óz baıandamasynda elimizdegi energııa únemdeý boıynsha atqarylyp jatqan jumystarmen tanystyrdy.
− 2017 jyldyń qorytyndysy boıynsha elimizdiń Jalpy ishki óniminiń energııa syıymdylyǵy 2008 jylǵy deńgeıge qaraǵanda 18% tómendedi. 2016 jyly Dúnıejúzilik bank álemniń 111 eliniń energııa tıimdiligi salasyndaǵy memlekettik retteý baǵalaýyn júrgizdi. Qazaqstan ol reıtıngte reıtıngte 32-shi oryndy ıelendi. Qazirgi ýaqytta, Kartanyń 15 mlrd. teńge bolatyn 68 jobasy iske asyrylýda. Olardyń ishinde 12 joba energııa servıstik sharttar men memlekettik-jekemenshik áriptestik tetigi arqyly qolǵa alyndy. Jyl saıynǵy únemdeý 3,5 mlrd. teńgeni quraıdy, sonyń ishinde 12 joba boıynsha 660 mln. teńge únemdeledi. Kartanyń 72 mlrd. teńge bolatyn 76 jobasy ázirlený ústinde, qazirgi ýaqytta olarǵa ınvestorlar izdestirilip jatyr. Energııa servıstik jobalardy iske asyrýdy qoldaý úshin Birikken Ulttar Uıymynyń Damý baǵdarlamasymen jáne Damý Qorymen birlesip, jobalarǵa sýbsıdııalaý jáne kepildendirý túrinde qarjylyq qoldaý kórsetýdi bastadyq Búgingi tańda 28 joba osy qoldaýǵa ıe boldy. Sonymen qatar, halyqaralyq yntymaqtastyq aıasynda Dúnıejúzilik bankpen birlesip, 21,7 mln. AQSh dollaryn quraıtyn jobany iske asyryp jatyrmyz,- dedi J. Qasymbek.
Mınıstr baıandamasynda energııa únemdeý kórsetkishi boıynsha kósh basyna Pavlodar oblysy turǵandyǵy, al tómengi kórsetkish Almaty qalasyna tıesili ekendigi aıtyldy. «Mınıstrlik jyl saıyn energııa únemdeý salasyndaǵy jergilikti atqarýshy organdardyń qyzmetine mynadaı ólshemder boıynsha baǵalaý júrgizedi: ındıkatorlar men mindetterdi oryndaý, memlekettik mekemeler monıtorıngi, bıýdjettik uıymdarda energııa aýdıtin júrgizý, tıimdi jaryqtandyrý kózderine kóshý jáne taǵy basqalar. О́zderińiz kórip otyrǵandaı, Astana qalasyn qosqanda 10 óńirdiń kórsetkishi ortasha. Al, Almaty qalasyn qosqanda 5 óńirde kórsetkish tómen», - dedi Investısııalar jáne damý mınıstri Jeńis Qasymbek búgingi Úkimet otyrysynda.
Onyń aıtýynsha, Pavlodar oblysy kásiporyndarynyń energııa únemdeý qyzmetine joǵary baǵa berilgen. «Onda 2013 jyldan beri energııa únemdeý bólimi jumys isteıdi. Tórt memlekettik-jekemenshik áriptestik jobasynyń ekeýi Pavlodar oblysynda iske asyrylyp jatyr. Bul - Pavlodar men Ekibastuz qalalaryndaǵy kóshe jaryqtandyrýdy jańǵyrtý jobalary. Sondaı-aq, Atyraý men Qyzylorda oblystarynda memlekettik-jekemenshik áriptestik aıasynda bir jobadan iske asyrylyp jatyr. Bul - Atyraý qalasynyń kóshesin jaryqtandyrý jáne Qyzylorda oblysyndaǵy bir orta mekteptiń qazandyǵyn jańǵyrtý jobalary», - deıdi ol.
Mınıstr osyǵan baılanysty Úkimet basshysynan bul baǵyttaǵy jumysty kúsheıtý jóninde tapsyrma berýdi surady. «Barlyq óńirlerge energııa únemdeý boıynsha, sonyń ishinde memlekettik-jekemenshik áriptestik jobalaryn iske asyrý men energııa únemdeýdi nasıhattaý jumystaryn kúsheıtýdi tapsyrýyńyzdy suraımyz», - dedi Jeńis Qasymbek.
Erkejan AITQAZY,
«Egemen Qazaqstan»