Sońǵy on aıda Almaty kóshelerinde oryn alǵan jol-kólik oqıǵalarynyń saldarynan 114 adam ajal qushypty. Olardyń ishinde áli buǵanasy qatpaǵan órimdeı jastar da bar. Aıtqyzbaı keler apattyń aldyn eshkim boljaı almaıdy, alaıda, tas jolda úzilgen taǵdyrlardyń qyrshyn ǵumyry ózgelerge sabaq bolsa deısiń.
Kólik tizginine otyrǵanda «saqtansań – saqtaıdy» degen sózdi qaperimizden shyǵarmaǵanymyz abzal. Jol erejesin pysqyrmaıtyn júrgizýshiler óziniń ǵana emes, ózgeniń de ómirin ýlap jatady. Jan túrshiktirer apattardan qol-aıaǵynan aıyrylyp arbaǵa tańylyp jatqandar qanshama. Almaty qalasy PD Ákimshilik polısııa basqarmasynyń basshysy Jandos Muratálıevtiń sózinshe, jol-kólik oqıǵalarynyń eń basty sebebi – júrgizýshilerdiń jol erejesin saqtamaýy. Onyń ishinde, jyldamdyqty shamadan tys asyryp júrýi nemese túrli oqys qımyl jasap basqa kólikterge jol bermeýiniń saldarynan bolyp jatady.
Almatylyq polıseıler júrgizýshilerge sabaq bolsyn degen maqsatpen, jantúrshigerlik apatqa ushyrap, tas-talqany shyqqan kólikterdi qala kóshelerimen alyp ótti. Olar mundaı shara arqyly júrgizýshilerdi jolda abaı bolyp, saq júrýge shaqyrady. Jol qurbandaryn únsizdikpen eske alyp, olardyń qurmetine gúl shoqtary qoıyldy.
Budan bylaı kólik júrgizýshilerine burynǵydan da muqııat bolýǵa týra keledi Shaharda jol-kólik apatyn azaıtý maqsatynda polıseıler endi kólik jyldamdyǵyn qatań baqylaýǵa almaq. Osy oraıda barlyq beınekameralarǵa jańa ereje engizilgen. Endi qala ishinde saǵatyna 60 nemese 80 shaqyrymnan asyrýǵa tyıym salynǵan beıne baqylaýdan ótken soń, kelesi kameraǵa jetkenshe jyldamdyqty údetýge bolmaıdy. Aqyldy kameralar kóliktiń sol aralyqty qansha ýaqytta júrip ótkenin áp sátte-aq anyqtaıdy.
– Jańa erejeniń ereksheligi – jyldamdyq shegin tek posttarǵa jaqyn jerden emes, búkil baǵyt boıymen anyqtaıdy. Qazir júrgizýshilerdiń kóbi baqylaý kameralarynyń aldynda ǵana jyldamdyqty azaıtyp, posttan ótkennen keıin birden jyldamdyqty mólsherden asyrady. Budan bylaı eki post arasyndaǵy ýaqytty dál kórsetetin server ornatamyz. Máselen, siz sol aralyqty 5 mınýt emes, 3 mınýtta júrip ótseńiz, jyldamdyqty asyrdyńyz degen uıǵarym shyǵarylady, – deıdi Almaty qalasy PD tehnıkalyq qyzmet kórsetý ortalyǵynyń basshysy Olga Agafonova.
Qazir bul júıe qala boıynsha 110 beketke ornatylypty. Al taıaý kúnderi olardyń sanyn 140-qa jetkizý kózdelgen. Jol erejesin elemegenderge jeltoqsan aıynan bastap aıyppul salynatyn bolady. 550 myń kólik resmı túrde tirkelgen shaharǵa, táýligine ózge óńirlerden kelip-ketetin avtokólikter sany 250 myńnan asyp jyǵylady. Mundaı jaǵdaıda júrgizýshiler mádenıeti men tártibin qaltqysyz qadaǵalaý ońaı sharýa emes. «Tártipke baǵynǵan qul bolmaıdy». Aınalyp kelgende, ómiriń ózińe kerek, júrgizýshi!
Arman OKTIаBR,
«Egemen Qazaqstan»
ALMATY