Elbasynyń «Uly dalanyń jeti qyry» atty maqalasy álemdik basylymdardyń nazarynan tys qalmady. Baspasóz quraldary men aqparat agenttikteri buǵan deıin jaryq kórgen «Bolashaqqa baǵdar: rýhanı jańǵyrý» atty baǵdarlamalyq maqalasynyń jalǵasy sanalatyn Elbasynyń jańa maqalasyndaǵy qazaq halqynyń kóp ǵasyrlyq murasyn jańǵyrtýǵa múmkindik beretin jańa jobalary men tarıhtan syr shertetin oılaryna toqtalǵan.
Máselen, Túrkııanyń «VATAN» gazeti Elbasynyń «Uly dalanyń jeti qyry» maqalasyndaǵy túrki álemine baılanysty oılarymen bólisti.
«Memleket basshysy Nursultan Nazarbaev «Uly dalanyń jeti qyry» maqalasynda Qazaqstannyń túrkilerdiń atajurty bolǵanyn atap ótip, tarıhymyzda oryn alǵan eleýli oqıǵalarda úlken úlesi bar túrki halyqtarynyń Jer sharynyń túrli tarapyna Qazaqstannan attanǵany týraly jazǵan.
«Túrki órkenıeti: túp tamyrynan qazirgi zamanǵa deıin» atty jobacyn qolǵa alý keregin aıtqan Nazarbaev osy maqsatta 2019 jyly Astanada Túrkologtardyń dúnıejúzilik kongresin jáne ártúrli elder mýzeıleriniń ekspozısııalaryna ejelgi túrki jádigerleri qoıylatyn Túrki halyqtarynyń mádenı kúnderin uıymdastyrý keregin nazarǵa alǵan.
«Sonymen qatar Túrkistandy jańa oblys ortalyǵy retinde damytý arqyly onyń halyqaralyq arenadaǵy bedelin júıeli túrde arttyrý qajet», degen Nazarbaev Túrkistannyń tek Qazaqstannyń rýhanı ortalyǵy emes, kúlli túrki áleminiń qasıetti mekeni ekenin aıtyp ótti. Odan bólek vıkıpedııa úlgisinde Túrki halyqtaryna ortaq týyndylardyń biryńǵaı onlaın kitaphanasyn ashý mańyzdylyǵyn eskergen. Bul jobaǵa Qazaqstan jetekshilik ete alatynyn aıtady», delingen gazet maqalasynda.
Al reseılik «REGNUM» aqparattyq agenttigi Túrkistan qalasynda «Kıeli Túrkistan jáne Túrki dúnıesiniń rýhanı jańǵyrýy» atty ǵylymı-teorııalyq konferensııa ótkenin eske sala otyra, Elbasy maqalasynan úzindilermen bólisken.
«Ataqty tarıhı tulǵalarymyz ben olardyń jetistikteriniń qurmetine ashyq aspan astynda eskertkish-músinder qoıylatyn «Uly dalanyń uly esimderi» atty oqý-aǵartý ensıklopedııalyq saıabaǵyn ashý máselesin, taǵy basqa ózekti jobalardy qolǵa alýdy usynǵan «Uly dalanyń jeti qyry» atty Nursultan Nazarbaevtyń maqalasy jaryq kórdi», deıdi reseılik jańalyq habarshysy.
«EVRAZIIа EKSPERT» Eýrazııa aımaǵynyń aqparattyq-analıtıkalyq basylymy Elbasynyń avtorlyq maqalasyna negiz bolǵan Uly dalanyń jeti qyryna jeke toqtalyp, olardy dáripteý men qundylyǵyn saqtaý maqsatynda usynylǵan jobalar týraly aıtyp ótken. «Nursultan Nazarbaev túrki áleminiń tal besigi, qyzǵaldaqtar men almanyń otanyna aınalǵan Qazaqstannyń jeti qyry retinde atqa miný mádenıetin, qazaq dalasyndaǵy ejelgi ǵasyrdaǵy metallýrgııany, ań stılin, 1969 jyly Esik qorǵanynda tabylǵan Altyn adamdy qarastyrǵan», delingen maqalada.
Tarıhı sanany jańǵyrtý maqsatynda «Arhıv-2025», «Uly dalanyń Uly esimderi», Astanada ótetin Túrkologtardyń dúnıejúzilik kongresi, «Uly dala» atty ejelgi óner jáne tehnologııalar mýzeıi uıymdastyrylatynyn, otandyq televızııa men kıno ónerinde serpilis jasaý máselesi kóterilgeni de aıtylyp ótken.
Daıyndaǵan Svetlana ǴALYMJANQYZY,
«Egemen Qazaqstan»