Astanada «Dinaralyq jáne órkenıet aralyq dıalogty damytýǵa arnalǵan N. Nazarbaev ortalyǵy» qurylady. Bul týraly BUU О́rkenıetter Alıansynyń Ǵalamdyq 8-forýmyna qatysqan Qazaqstan Respýblıkasynyń Qoǵamdyq damý vıse mınıstri Berik Aryn málimdedi. Atalmysh shara alǵash ret BUU Nıý-Iorktegi shtab-páterinde ótkizilip otyr.
Eki kúndik forýmnyń basty taqyryby «Álemdi birlese qoldaý jáne daý janjaldardy toqtatýǵa» arnalǵan.
Forýmnyń ashylý saltanatynda BUU-nyń Bas hatshysy Antonıý Gýterrısh, Birikken Ulttar Uıymy О́rkenıetter alıansynyń Joǵary ókili Nasır Abdýlázız ál-Naser, BUU Bas Assambleıasy 73-shi sessııasynyń Tóraǵasy Marııa Espınos, Túrkııanyń Syrtqy Ister mınıstri Mevlýt Chavýshoglý jáne taǵy basqa elderdiń aıtýly tulǵalary qatysty.
О́z sózinde BUU-nyń Bas hatshysy Antonıý Gýterrısh BUU О́rkenıetter Alıansynyń beıbit, ádil, turaqty qoǵam qurýdaǵy róliniń erekshe ekenin aıta otyryp, BUU Bas Hatshysy «túrli mádenıetter men din ókilderiniń kelisimge kelip, ózara úılesimde, bir birinen kemsitýshilikti sezinbeı ómir súrýi úshin jaǵdaı jasaýymyz kerek» dep atap ótti.
Elimizdiń Qoǵamdyq damý vıse mınıstri Berik Aryn órkenıetter túsinisýinde, dinaralyq tatýlyqty saqtaýda Alıanstyń alar orny erekshe ekenin aıta otyryp ultaralyq, mádenıetaralyq, dinaralyq dıalogty damytý, álemdik qaýipsizdikti saqtaýǵa oraı túrli baǵdarlamalar men jobalardy iske asyrý, jastar máselesi sekildi elimizdiń bastamalary BUU О́rkenıetter alıansynyń jumysymen úndesip otyrǵanyna toqtaldy. Aldaǵy ýaqytta da birlesken jumystar nátıjesinde azamattyq qoǵam qurý, jastar, áıelder máselesinde, terrorızm men ekstremızmmen kúres baǵytynda jumystar atqaryla beretinin jetkizdi. Sondaı-aq Astanada «Dinaralyq jáne órkenıetaralyq dıalogty damytýǵa arnalǵan N. Nazarbaev ortalyǵy» qurylatynyn jáne 2019 jyldyń Qazaqstanda jastar jyly bolyp belgilengenin jetkizdi.
Eske sala ketsek, 2005 jylǵy 16 qarashada Qazaqstan BUU О́rkenıetter alıansynyń Dostar tobyna qabyldanǵan bolatyn. 2008 jyldan bastap elimiz eki jylda bir ret, álemniń ártúrli elderinde ótetin BUU О́rkenıetter alıansynyń álemdik forýmdaryna belsene qatysyp keledi.