Sırııa boıynsha 11-inshi Halyqaralyq kezdesýdiń barlyq qatysýshylary, sonyń ishinde kepilger-memleketter - Reseı, Túrkııa jáne Iran ókilderi Astanaǵa keldi, dep habarlaıdy Syrtqy ister mınıstrliginiń baspasóz qyzmeti.
Reseı delegasııasyn RF Prezıdentiniń Sırııa boıynsha Arnaıy ókili Aleksandr Lavrentev bastap keldi. Túrkııa atynan eldiń Syrtqy ister mınıstriniń orynbasary Sedat Onal qatysady. Irandyq delegasııaǵa eldiń syrtqy ister mınıstriniń saıası máseleler jónindegi Aǵa kómekshisi Hýseın Djaberı Ansarı jetekshilik etýde.
BUU delegasııasyna BUU Bas hatshysynyń Sırııa boıynsha Arnaıy ókili Staffan de Mıstýra basshylyq jasaýda.
Sondaı-aq, josparlanǵandaı, kezdesýge BUU-nyń Bosqyndar isteri jónindegi Joǵarǵy komıssarynyń basqarmasynan jáne Qyzyl krest Halyqaralyq komıtetinen baıqaýshylar qatysady.
Ahmad Al-Toma bastaǵan Sırııanyń qarýly oppozısııasy da Astanaǵa keldi.
Jekelegen delegasııalar Qazaqstanǵa keshe jetip, ózara birqatar ekijaqty kezdesýler ótkizdi.