Tuńǵysh Prezıdenttiń tikeleı tapsyrmasy boıynsha aldaǵy ýaqytta Qaraǵandy jáne Temirtaý qalalarynda áleýmettik jańa nysandar salynbaqshy. Bul týraly oblys ákimi Erlan Qoshanov Ortalyq kommýnıkasııalar qyzmetinde ótken brıfıngte málimdedi.
Mysaly, Qaraǵandyda zamanaýı balalar jáne jasóspirimder saraıyn salý josparlanǵan. Dástúrli úıirmelermen qatar munda jańa seksııalar, atap aıtqanda robot tehnıkasy jáne modeldeý, sondaı-aq planetarıı úıirmeleri bolady. Al kóktemde olımpıada standarttaryna saı keletin 50 metrlik júzý basseıni salyna bastaıdy. Sondaı-aq, oblys ortalyǵynda 1500 orynǵa shaqtalǵan konsert zaly men kúres ortalyǵy boı kóteredi.
Budan bólek, Qaraǵandynyń temirjol vokzaly tolyqtaı jańǵyrtylady. Sonyń nátıjesinde, jolaýshylar aǵymy 2,5 esege artpaq. Sonymen qatar, áıgili boksshy Gennadıı Golovkın aýmaǵy 5500 sharshy metr bolatyn sport keshenin salyp jatyr.
Al Temirtaý qalasynda «ArselorMıttal Temirtaý» kompanııasy 20 myń adamǵa arnalǵan jańa emhana, balabaqsha jáne kásibı sport keshenin salady.
Qaırat ÁBILDA,
«Egemen Qazaqstan»
Qaraǵandy oblysy