Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda birqatar máselelerdi atap kórsetti.
Prezıdent Joldaýynda aıtylǵan aıqyn mindetterdi júzege asyrý maqsatynda elimizdiń barlyq óńirlerinde órkendi ister qolǵa alynyp keledi. Bul rette Jambyl oblysynda da halyqtyń turmys sapasyn arttyrýǵa negizdelgen júıeli jumystar az emes. Bul oraıda Jambyl óńiri jańa nysandarmen tolyǵýda. Qazaqstan Respýblıkasynyń Tuńǵysh Prezıdenti kúnine oraı Áýlıeata óńirinde 41 nysan paıdalanýǵa berildi. Elbasy óz Joldaýynda medısınalyq qyzmet sapasy halyqtyń áleýmettik kóńil-kúıiniń asa mańyzdy komponenti bolyp sanalatynyn basa aıtqan bolatyn. Ult saýlyǵy qashanda turmys sapasyn arttyrýdyń naqty kepili. Sondyqtan da óńirde ashylǵan 41 nysannyń 32-si medısınalyq mekemeler bolyp otyr.
Elbasy «Eń aldymen, ásirese aýyldyq jerlerde alǵashqy medısınalyq-sanıtarlyq kómektiń qoljetimdi bolýyn qamtamasyz etý qajet. Alǵashqy medısınalyq-sanıtarlyq kómek kórsetetin qyzmetkerlerdi yntalandyrý úshin 2019 jyldyń 1 qańtarynan bastap aýrýlardy emdeý isin basqarýdyń jańa tásilderin engizgen ýchaskelik medısına qyzmetkerleriniń jalaqysyn kezeń-kezeńmen 20 paıyzǵa kóbeıtýdi tapsyramyn. Osy maqsattarǵa kelesi jyly 5 mıllıard teńge bólinedi. 2019 jyldyń 1 qańtarynan bastap barlyq emhanalar men aýrýhanalar medısınalyq qujattardy qaǵazsyz, sıfrlyq nusqada júrgizýge kóshýge tıis. Bul 2020 jylǵa qaraı búkil turǵyndardyń elektrondy densaýlyq pasporttaryn jasaýǵa, kezekterdi, bıýrokratııany joıýǵa, qyzmet kórsetý sapasyn arttyrýǵa múmkindik beredi», – degen bolatyn Memleket basshysy.
Jambyl oblystyq ákimdiginiń málimetinshe, búgingi tańda oblys kóleminde halyq densaýlyǵynyń sapasyn arttyrý maqsatynda aýqymdy jumystar júrgizilýde. Jekemenshik sektordy jumyldyra otyryp, qarjylandyrý men basqarýdyń jańa ádisteriniń qoldanylýy sonyń bir aıǵaǵy. Joldaý júktegen mindetter negizinde, medısınalyq qyzmet sapasyn arttyrý boıynsha ınnovasııalyq ádis-tásilderi engizilip, jańa ǵımarattar men nysandardyń qurylysy júrgizildi. Mereke qarsańynda oblys ortalyǵy Taraz qalasynda medısınalyq jedel járdem stansasyna beriletin avtokólikterdiń kiltin tapsyrý saltanaty ótti. Bul kúni barlyǵy jalpy sany 27 kólik tapsyryldy.
Dáriger, sonyń ishinde jedel járdem dárigeri – qoǵamdaǵy eń qajetti mamandyq. Bas aýyryp, baltyr syzdaǵanda júginetin úlken kómek. Atalǵan sala óte kúrdeli, janqııarlyqty, keıde adam ómirin qutqarýda shuǵyl sheshim qabyldaýdy talap etedi. Medısına qyzmetkerleriniń tájirıbesi, olarǵa tán adam ómiri men densaýlyǵyna degen joǵary jaýapkershiligi elimizdegi reformalardyń sátti júzege asyrylýynyń jáne qoǵamnyń turaqty damýynyń kepili. Iаǵnı, qoǵamnyń basty baılyǵy – adam ómirin saqtap qalýda eleýli eńbek etip otyrǵan jedel járdem qyzmetiniń, olardyń tehnıkalyq jaǵdaıynyń jaqsy bolýynyń mańyzy árdaıym orasan.
Aıtýly mereke qarsańynda ashylǵan 32 medısınalyq nysannyń 29-y memlekettik-jekemenshik áriptestik aıasynda boı kóterip otyr. Onyń ishinde 13 nysan aýysymyna 5 kelýshige arnalǵan medısınalyq pýnktter bolyp sanalady. Atalǵan nysandar Baızaq aýdanyndaǵy Shahan, Kókózen, Jańaturmys, Jibek joly, Sarybaraq, Tegistik, Qordaı aýdanyndaǵy Kókadyr, Merki aýdanyndaǵy Ekpindi, Sarysý aýdanyndaǵy Shaǵalaly, Qamqaly, T.Rysqulov aýdanyndaǵy Sholaqqaıyńdy, Talas aýdanyndaǵy Seıilbek, Turymqul aýyldarynda ornalasqan.
Sondaı-aq, bul kúnderi Baızaq aýdanyndaǵy Yntymaq, Jambyl aýdanyndaǵy Bektóbe, Besaǵash, Grodekovo, Prıgorodnoe, Aqbulym, Túrkisib, Jýaly aýdanyndaǵy Shaqpaqata, Merki aýdanyndaǵy Myhan, Sarysý aýdanyndaǵy Igilik, Shý aýdanyndaǵy Shoqpar aýyldarynda 15 kelýshige arnalǵan dárigerlik ambýlatorııalar da paıdalanýǵa berildi. Al, aýysymyna 10 kelýshige arnalǵan 7 feldsherlik-akýsherlik pýnkt Baızaq aýdanyndaǵy Aımantóbe, Jambyl aýdanyndaǵy Ernazar, Merki aýdanyndaǵy Ekpindi, Moıynqum aýdanyndaǵy Ulanbel, Kókjelek, Sarysý aýdanyndaǵy Uıym, T.Rysqulov aýdanyndaǵy Qaraqat, Shý aýdanyndaǵy Tasótkel aýyldarynda ashyldy.
Aıta ketý kerek, memlekettik-jekemenshik áriptestik aıasynda boı kótergen 29 medısınalyq nysanǵa barlyǵy 843 mıllıon teńge qarjy jumsalǵan. Atalǵan memlekettik jekeshelik áriptestik sheńberindegi bul nysandardyń qurylysyn salý barysynda ózge óńirlerdegi bıýdjettik ınvestısııalyq jobalarmen salystyrǵandaǵy quny tómen bolyp, 1,4 mıllıard teńge kóleminde bıýdjettik qarajat únemdelgen. Bul arqyly aýyldyq jerlerdegi alǵashqy medısınalyq kómek kórsetý qajettiligi 84 paıyzǵa qamtylatyn bolady. Búgingi tańda atqarylyp otyrǵan jumystar halyqtyń turmys sapasyn arttyrýmen qatar, medısınalyq qyzmet sapasyn ilgeriletýge de aıryqsha úles qosyp otyr.
Jalpy, Jambyl oblysynda 95 alǵashqy medısınalyq kómek kórsetý uıymdaryna ǵımarat qajet edi. Bul bıýdjettik ınvestısııalyq joba retinde júzege asyrylǵanda, oǵan jalpy 6 567,6 mıllıon teńge qarajat jáne 7 jyl ýaqyt kerek bolatyn. Al, bul nysandardy oblys ákimdigi memlekettik-jekemenshik áriptestik aıasynda salý arqyly merzimin 3 jylǵa, jumsalatyn qarjy kólemin 2 376 mıllıon teńgege únemdegen. Naqty aıtqanda, 4 jyl ýaqyt jáne 4 192 mıllıon teńge qarjy únemdelip otyr. Iаǵnı, 95 nysannyń 29-y bıyl ashylsa, kelesi jyly 40, al 2020 jyly 25 nysan boı kóteredi dep josparlanýda.
Elbasy Joldaýynda «Qaýipsizdik turmys sapasynyń ajyramas bóligi bolyp sanalady» deı kele, eń aldymen, polısııa jumysyn túbegeıli jaqsartýdy aıtqan bolatyn. Nátıjesinde, Tuńǵysh Prezıdent kúnine oraı Jambyl oblysynda halyqtyń medısınalyq mekemelerge degen qoljetimdiligin arttyrýǵa arnalǵan nysandardan bólek, jurtshylyqtyń áleýmettik turmys sapasyn arttyrýǵa negizdelgen mekemeler de el ıgiligine berildi. Atap aıtar bolsaq, Taraz qalasynda polısııa basqarmasy №1 polısııa bóliminiń qabyldaý bólmesi ashyldy. Sonymen qatar, Jambyl aýdanynda «Móldir», Jýaly aýdanynda «Ásem dostar» jekemenshik balabaqshalary, Qordaı aýdanynda 75 oryndyq «Balalyq-shýaǵy», 50 oryndyq «Nur-Ádil»», 50 oryndyq «Balalyq bazary» balabaqshalary jáne 120 oryndyq «Bolashaq» shaǵyn ortalyǵy, T.Rysqulov aýdanynda 120 oryndyq «Bota» bóbekjaıy jáne Aýqatty aýyldyq polısııa bólimsheleri paıdalanýǵa berildi. Aıtýly kún qarsańynda paıdalanýǵa berilgen bul barlyq 41 nysan aldaǵy ýaqytta da Elbasy Joldaýyndaǵy negizgi mindetterdiń oryndalýy jolynda el ıgiligi úshin jumys atqara beretin bolady.
Hamıt Esaman,
«Egemen Qazaqstan»
Jambyl oblysy